التغير وفن التقليد

ايمن كاسترو · 13-02-2008, 22:19

اعزائى الاولاد والبنات ....

تحية حارة بقيمة الشوق للوطن وللوطن ( الام )

قريت كم بوست كتر خيركم عن التغير وفن التعامل مع الناس وتغير المفهوم السودانى البسيط وبدون التكليف ... والتعامل ( بالنية )

بس ممكن سوال فى الحته دى .... انت عايز تغير عشان حاسى انو فهمنا نحن غلط ولا شفت الحاجة دى برة وعجبتك وحابى تغيرها ....

انا فى رأى فعلا فى كتير من التصرفات ما حلوة وبالجد محتاجة لى اكتر من وقفة .... مثلا حكاية الدخول توشك و الونسة بصوت عالى ...

حاجات كتيرة عندنا ما جميلة ... لكن اكان مسكتها بتلقاها جاية من تركيبة السودانى البسيط .... تركيبة القلب الابيض .... وياما اشتهرنا بى القلب الابيض والطيبة الفايتة الحد ... مع اننا عارفين انو دة ما صاح لكن برضو دى الحاجة الاتربينا وشربنا الطيبة والقلب النظيف من الشارع ومن البيت فى تعاملاتنا ومعاملاتنا اليومية ....

اسألوا روحكم نحن لمن عرفنا فن التعامل والدعوة الانتو بتنادوا بيها وصل مجتمعنا وين ؟؟؟

وزمان كنا وين ؟؟؟

وداير اذكركم :

ود باب السنط ... والدقة والنفاج
والحوش الوسيع للساكين افواج
واللمه التى ربت جنى المحتاج
والنار الدغش والريكة جمب الصاح

انا شايف انو نرجع لى بساطتنا الاشتهرنا بيها ... ايوه فيها كتير من العيوب البتعكس تخلف التفكير والمعتقدات ولكن اليست بإفضل من مجتمعنا الان ؟؟

اذا دعونا من فن التقليد .... ونرجع ذى زمان

ونحمد الله

ونقول

عرب ممزوجة بى دم الزنوج الحارة ديل اهلى

ونقول

كيف يكون الحال ....... لو ما كنت سودانى

هو السودان بى بساطته وبى بشاشة اهله

.................................................. .................................................. .............................

هو السودان

حكم التوم · 14-02-2008, 00:00

ايمن

هذه نعمه كبيره نحمد الله عليها لكن الفرق كبر ى بين السودانى اليوم وزمان