ممكن يا أبوها ... ويا أمها

الطاهر التاي · 23-01-2008, 10:36

ممكن .... يا أبوها ... ويا أمها
( من ألفية الزواج العرفي )

ممكن .... يا أبوها ..... تقول لينا .. السبب
وكيف ضاعت ... بنيه ... أغلى من الذهب
تركت .. كل طيب ... ومشت ...... للكعب
في دربا ... خطير ..... كلو شقا ... وتعب
ضاقت فيهو الشقى ..... الويل .. والنصب
وسوت ليك فضيحة ...... انتشرت كاللهب
وبالعرفي القبيح ......... بيت العز انخرب
وضاعت أمنياتكم ..... في الزمن الصعب

وممكن يا ياأبوها ....... تقول لينا الجواب
لسؤال سألوه ناسك ...... وكمان الصحاب
وناس الحلة كلهم ..... سألوا عن المصاب
ليه بنتك ... براها ......... سارت للخراب
وتتزوج براها .......... كـأنـك مـا مـهـاب
وزي عميانة وقعت .... في هاوية العذاب
لا هماها تخطيء ...... وتجانب للصواب
ولا هماها زول .......... ولا زجر الكتاب

هل أنت مسؤول .........وكل الدنيا غـاب
فيها أسود كواسر ...... وفيها كمان ذئاب
سؤال حيرنا والله ....... ودايرين الجواب

وممكن .. يا أبوها ... نعرف.. كنت وين
وبنتك حايمه تهدم ... في الصرح المكين
ودخلت في متاهة .... بدون أخلاق ودين
خليته تعيش حياته .. تمشي شمال.. يمين
وما عرفت البيحصل .. في البيت يا أمين
وبقيت ... أكبر مغفل ..... وشيخ الغافلين
ومين غيرك مقصر.... بس قول لينا مين

وممكن ..... نسألك ....... يا الأم الحزينة
وليه ما صنتي بنتك ..... السمحة الخدينة
لما بدت مسيره .......... مع الشلة اللعينة
وما شفتي الجراح ......... وآلامه الدفينة
وشروده وبكاها ... وآثار ...... من غبينه
والأم الحريصه .... تـكون راعـية وأمينة
وتعرف كل حاجه ..... عـن الدرة الثمينة
تحميها وتصونه .......... من شـر المدينة
وين بالله إنتي .......... وبـتك ويـن رهينة
وعصفت بيها دنيا ...... لا تعرف سكينة

وممكن برضو نسأل ........ يا أم البنات
ليه ما سألتي بنتك ... وين راحت وجات
وصـديـقاتـه هـــل .... بــنات ومــؤدبات
عارفات للأصول ..... وبالدين عاملات
ومن أسر كريمة ..... واعيات ومهذبات
ولا ما عارفه حتى .... أسماء .... البنات
وبتك حايمه دايما .... لا هدى لا عظات
وهيه أمانه عندك ....... الى يوم الممات

وممكن كمان نسأل عن الصلاة والصيام
والصحبة الجميلة ...... والهدى والسلام
والبيت المؤطر ...... بالود ..... والوئـام
والـقدوة الجـمـيلة ......... والناس الكرام
والأم الصديقة ................. لبناته دوام
ده سلاح البنات ....... يا إخوان يا كرام
و دروب الحـياة ..... حـلال .. أو حـرام

العجب · 29-01-2008, 10:30

نسأل الله أن ينعم على بيت كل مسلم بالستر والعافية فى الدنيا والدين .. المشكلة ياخوى إنو الناس ما عندها غيرة ولا أهلية .!!

تولستوي · 04-02-2008, 15:30

الطاهر التاي..

عظيم حبي..

وإعجابي لكل سطر خطه (كيبورديك)

الطاهر التاي · 05-02-2008, 18:21

العجب ...؟

نسأل الله الهداية للجميع .... وأن يحفظ شبابنا كله
من هذا الشر الوبيل .... والسؤولية مسؤولية الجميع .

توستوي ... ؟

كما البدر ... غيابا ... وحضورا
وكما السموق ... إشراقا .. وحبورا

وأهلا أخي .... ويا لها من أيام رائعة ... ونحن نلتقي
في رحاب الأخ سوداني ساكت .. أين هو وأين بايا ؟؟
وبقية الشلة الظريفة ...

...... تحياتي ... ومودتي ... وكل حبي