الحقيقه الغايبه عنك

elfatihshowaa · 21-01-2008, 14:44

الحقيقه الغايبه عنك
اني مفتون من زمان
زي لقيتك نسخه منك
وافره بالحب والحنان
كست عنك في المقاهي
وفي الدروب البشبهنك
وفي الملاعب وفي الملاهي
وفي الروابي الشالو حنك
ما لقيتك في البدايه
وما فشل جوايا ظنك
وكنت عارف قبل منك
انو بلقاك في المرافي
وفي السواقي الشاطرنك
فيني جلسة اغنيات
ياما قصيت الحكاوي
والغناوي السامرنك
وشلت كم مرات وضوحك
في الشموس القالو عنك
اني موعود بي عيونك
واني لا بُد من اكونك
زات يوم لَجُوني حبك
يوم فطمتي الروح وشلت
مني انفاس الضياع
يا حبيبه من المحبه
ويا قريبه كما الشعاع
الضاوي في ليل الغلابا
وباقي للناس امنيات
ما حصل فيني اشتبهتك
الا شاهدتك معاي
في الخلوق المني مارقه
وشايله عز الليل هواي
ضوُّا بيهو الدنيا منك
وحجو شفّع
بيك جايه
جايه من زات البقاع
الغازلن يومداك عيونك
وناظرن فيني إلتياع
خلي روحك لم تطلع
فيني تدخل يا حبيبه
ما الحقيقه الغايبه عنك
اني مفتون من زمان
وفي الدواخل شلتو ريدك
ومني ستفتك امان
لا غشاك الخوف معايا
لا مشاك الشوف ورايا
لاني سويتك مكان
فيهو بنيت بالحب ضريحك
وطفت من حولك حقيقه
زي مريدك كنت عايش
وشلت من حبي الطريقه
الشموس الواضحه فيك
فيني عاكسك من بريقا
والنجوم الحايمه حولك
والندي البطفي الحريقه
والمدي الببعدني منك
ما اظن عرف الحقيقه
اني منتظرك هناك
بره مني وفي مداك
لا قدرت اقاسي صدك
لا قدرت اجافي مدك
لاني اتحمّل هواك
كلما شاهدت نفسك
بتطمئن برتاح ثواني
ومره بحلم بالاماني
ومره كان يا حلوه بحلم
شُفت عتمه وضو ظلام
خُفت من ظلم المحبه
وخُفت من قدر الايام
الا حبَّه وجات عيونك
سكتت فيني الكلام
زي احاجي بهاتي بيها
وزي حلم اكد لِي جيتك
في الدروب الماش عليها
نفسي اشرح ليك حالي
واطرح الهم من خيالي
او احاور مره زاتك
او اقولك
بالحقيقه الغايبه عنك
اني موعود بي عيونك
واني شايف نفسي منك

المرتحل · 21-01-2008, 18:33

والحقيقة الغايبة عني
اني بعشق غصب عني
وانو حبك ما الجروح
هو الدماء السايلة مني
وانو شوقك كان سبب
كل الحروف الرايحة مني
وانك انت سبيل سروري
والسكوت العامي جني
نظرتك اقوال كتيرة
فيها تغرير وتمني
ومشية القمري الجميلة
في العصير الهني هني
للألئ في الخشم
مافي زول بيرده مني

والحقيقة الغايبة عني
انو حسنك كم فتني
وكان سبب عشقي لكيانك
انو حبيتك لاني

افتقدتك في وصالك
وانو الغرام كان ناري نارك
بنتظر قبل انتظارك
بستعر قبل استعارك
برسم الييوم بي طريقك
وبفقد الليل في نهارك
بركب الموج في بحارك
في الشراع كاتب قصيدة
فيها أوصاف وخصالك
فيها حبك كان منارك
و القلب والشوق مزارك
القمر الجاري جارك
ببقى مسؤول عن وصالك
بابتسامة او ملامة
او قصيدة صغيرة
مني

لما تسمع لي بغني
الهبوب الجاية مني
فيها ارواح إلتقني
وسمعو اشعاري وترني
وللطيور قالوها عني
الشوارع في البلد
بقوا يربكني
عارف السكك البهني بتضحى ماشي
وتمسي تدني
بلمس الباب في صراخو
يا محب حبك فتحني
بسألو انملو هل ريحنك
رد قال بل عزبني

النجيل في القيف سنادس
جنب نيل ياقوت جمني
تحت نخلاتي البهني
بنتظر قبل انتظارك
كل اشواقي البجني
ويحملني
وفي بحارك يجرفني
لي جزيرة
فيها نخلات بعرفني
هن نخلاتي البهني
بنتظر قبل انتظارك
كل اشواقي البجني
والحقيقة الغايبة عني
اني بعشق غصب عني

المرتحل · 22-01-2008, 08:22

معليش بس دي تكملة للقصيدة الكانت عبارة عن مشاركة بسيطة امام الكم الهائل المترف بالمعاني ذات القدسية الشعرية والتراكيب البلاغية النامة عن فكر ومشاعر واحلام شاعر جسدها في بيت واسكن البيت خيالة البديع البعيد......
شكرا ليك يالفاتح....

والحقيقة الغايبة عني
اني بعشق غصب عني
طلعة الشمس شرق مني
راسمة في حنين ملكني
للبيوت الواقفة سني
بزكره وديمة فمظني
نيمة الحوش العجوزة
كان تصد الريح دي عني
وصبحنا وشاي اللبن
بصحى واتوضأ فتأني
وازكر الرحمن لاني
كنت مؤمن رغم سني

وكنت بعشق رغم سني
وبهوى فيك انك بكلمة
تمحو كل احزاني مني
بسأل الاولاد كأني
جيت مرسل أو مهني
يمكن ألقاك أو أصادفك
أو اقع في يوم ببالك
عارف اني دوام ببالك
والغرام كان ناري نارك
البراءة الفينا قالت
اني قادر لي وصالك
حتى ما كان حالي حالك
والطفل جواي سجني
بهوى الواني وفني
والغيوم مبتعدة عني
ولحظة ابعد عن ديارك
بلقى اشواق تلتهمني
عبرة تقرب مرة مني
وابسامة
كل خطوة فبعد عني

والحقيقة الغيبة عني
اني بعشق رغم عني
وكنت بعشق رغم سني
وبنتظر قبل انتظارك
كل اشواقي البجني
ويحملني
فوق صراع موجك بحارك
لي جزيرة
فيها نخلات بعرفني
هن نخلاتي البهني
بنتظر قبل انتظارك
كل اشواقي البجني
ولمى توصل وتلقى حضني
بستعر قبل استعارك
وتبقى مني وابقى منك
وابقى منك وتبقى مني.......

شكرا جزيلا للاخ الفاتح