طبعن يا شبابنا البوست ده هديه خاصه للمغتربين والطرايف البتحصل لمن الواحد فيهم يكون عايز يعرس
واي زول عندوا موقف يقولوا لينا طوالي
ودي نكات عن مواقف في عرس المغتربين
قالو ليك مغترب يازول جنو شرائط عرس وحفلات بس ما يصدق شريط عرس يصل إلا يكون مقنبر وقاعد اول واحد وصاحبنا مسخن وداير يعرس قام شاف ليهو واحده في الشريط عجبتو ليك عجب مبالغة بس قال يا ناس بس دي زولتي يازول الجماعة قامو كلمو اهل البت ويازول العرس تمه وآخر بهجه وطبعاً صاحبنا ما اتكلم معاها نهائي بس بالصور بس لامن وصلت ليك المطار هنا واول ما شافا قال ليها : انشاء تكوني سعيدة ... قامت قالت ليهو سجمي ما عرفتني انا ما "بخيتــــــهِ"
&&&&&&&&&&&&&&&&
قالو ليكي مغترب جاء إجازة وعايز يعرس بعدين سامع بالجكيس ودي مجكسة ودي ودي ... قام سأل اولاد الحلة قال ليهم شوووفو انا زول جيت داير اعرس والليلة شايف في عرس في الحلة ولازم انا اختار من العرس ده قاموا الشباب قالو ليهو خلاص تمام بس انت ارقص مع اي واحده ولو فيها حاجة حنقول ليك عوووك قام صاحبنا قشر يازول ديك القشرة ومشى العرس وآخر رقيص قام شاف ليهو واحده قام مشى يرقص جنبها قامو الجماعة شبكو ليك عوووك تاني قام مشى جنب واحده قامو شبكو ليك عوووك تاني وتالت لغاية البنات ما خلصو صاحبنا احتار قام جاء ليهم شنو يا شباب كل ما الواحد يرقص مع واحدة تقولوا عوووك والله والواحد ما فاضل ليهو إلا يرقص مع اختو قامو الجماعة قالو ليهو عووووووووووووووووووووووووووووووووووووووووووووووووو ووووووووك.
ولكم التحيه ايها الرائعون المهاجرون
التوقيع
zizi
التعديل الأخير تم بواسطة : بنت الشاطئ بتاريخ 12-01-2008 الساعة 13:33.
السبب: لون الكتابه
قالوا ليكم مغترب جلدة شديد يا زول نزل السودان يعرس وحاسبا ليكم حساب صاح العرس بكده ، الفنان بكده، السكر ، الشاي، الخرفان، المهم يازول صاحبنا يشيل ويحسب لامن جاء يوم الحنه حقتو بس سوى ليك الدرب ساساك للشباب الماسكين الكشف: أها يا شباب الكشف ماشي كيف كل دقيقة وصاحبنا القلق ماسكو اها يا شباب الكشف ماشي كيف بالطريقه دى لافى ليك فوق الشباب كرهم ليك حياتم وكرهم ليك الإغتراب والجلدنه، قام جاهم تاني وقال ليهم يا شباب قولو لى كان ماغطى خلونى الاقوم اوقف البيبسى ده .!!!!!!
&&&&&&&&&&&&&&&&&&&&&&
قال ليك مغترب امه كرهتو كل شوية تتصل وتقول ليهو ما عافية منك الا تعرس .. ما عافية منك الا تعرس .. بعد زهج قال ليها خلاس عرسوا لي .. المهم عملوا الذي منه وبس يتصلوا رسل رسل رسل .. بعد تموا المواضيع رسلوا ليهو العروس (طرد ) مشي يتسقبلها في المطار ومخه يودي ويجيب .. بعد العروس جات طالعة لقاها ليك قمة في الروعة والجمال .. راكبه جمبه في العربية كل مرة يقبل يعاين ليها ويقول .. لكن السرة مااا بالغت .. لكن السرة ما بااااالغت (السرة دي امه)
قصه احتمال تكون حقيقيه
&&&&&&&&&&&&&&&&&&&&
قالو ليكم مغترب مشى خطب ليهو وحدة وبعد ما وافقو اهل العروس , طلب العريس انو يطلع مع خطيبتو ووافق ابو العروس بس بشرط انو يطلع معاهم اخوها الصغير ولما رجعو سالتا امها رايك شنو في العريس قالت ليها واللهي كويس بس بلوك لبان كتير امها قالت ليها سجمي لبان شنو كمان البلوكو ده يايما عريس التابا واليابا ده، كده طيب نخلي ابوكي يشوف الموضوع ده قام أبوها سأل العريس شنو موضوع اللبان الكتير ده قام قال ليهو ده لمن اكون شارب سجارة قال ليهو انت بدخن اي بس لمن اكون شارب عرقي وبتشرب عرقي كمان اي لمن اكون قاعد مع الشباب العرفتهم في السجن وكمان كنت في السجن ليه عملت شنو قال ليهو ما سويت شي بس كتلتا لي واحد قال ليهو وكاتلو مالك قال ليهو عشان كنت خاطب بتو ورفضني لمن لقاني بلوك لبان كتير. لمن رجع البيت بتو سالته قالت ليهو اها يابا قال ليك شنو ؟، قام الابو والرجفه ماسكاهو قال ليها يابتي ده مجرد لوك لبان ما اكتر من كده لكن العريس ده كويس
بنت الشاطي .. خلاس قبلت على الجماعة ديل .. الله يكون في عونهم .. ..
لكن بتاع اللبان دا أخطر منو مافي ....
والله الواحد بتحضرو قصص في (هذا المقام) معظمها واقعي أو بقولو إنها واقعية ..
يحكي أن مغترب عرس بالمراسلة وفي انتظار عروسه ومعه (كفيله) في المطار .. وعندما ظهرت العروس والسلام والكلام والمش عارف إيه داك .. قال ليها أقدم ليك الكفيل .. أقدم ليك العروس فلانة .. والراجل آخر إنكسارة .. فقامت العروس حلفت حرام إلا يرجعوها أسع بالطيارة الجاية ...
وأخر في استقبال زوجته وإبنه في المطار ومعه أصحابه والجماعة أصحابو آخر تريقة وتنكيت عليه والراجل يحلف ويتقطع بأن الولد واحشو شديد ... وأبرموا أمرهم أن يعملو فيه مقلب .. فالراجل في عز الكبكبة والرجفيبة ساعة الإستقبال الحار ... الجماعة شالو الولد وزاغو بيه وأخونا شال المرة وسافر على البيت .. ولم ينتبه إلى عدم وجود الولد إلا بعد ساعات من الوصول .. وسأل المرة .. عادل وينو .. سجمي ..
والله يا بنت الشاطي المغتربين ديل غلبانين شوية شوية عليهم ..
hi amazing post its really stuff from real life ..keep it up sister and go ahead suprise us as u used to do becouse all what u write is a piece of art admire u so much..with all my respect..becouse u deserve it
بنت الشاطى السعل ازيك .......
قصصك حلوه مووووووووت بالجد بتحصل حاجات مضحكه شديد .........
مساكين المغتربين يا تصدف معاهم يا لا .........
بس ربنا ما يرمينا فى البياكلوا اللبان ديل خالص هاهاهاهاهاهاهاهاها.......
للشباب الماسكين الكشف: أها يا شباب الكشف ماشي كيف كل دقيقة وصاحبنا القلق ماسكو اها يا شباب الكشف ماشي كيف بالطريقه دى لافى ليك فوق الشباب كرهم ليك حياتم وكرهم ليك الإغتراب والجلدنه، قام جاهم تاني وقال ليهم يا شباب قولو لى كان ماغطى خلونى الاقوم اوقف البيبسى ده .!!!!!! 
.. المهم عملوا الذي منه وبس يتصلوا رسل رسل رسل .. بعد تموا المواضيع رسلوا ليهو العروس (طرد ) مشي يتسقبلها في المطار ومخه يودي ويجيب .. بعد العروس جات طالعة لقاها ليك قمة في الروعة والجمال
.. راكبه جمبه في العربية كل مرة يقبل يعاين ليها ويقول .. لكن السرة مااا بالغت .. لكن السرة ما بااااالغت (السرة دي امه)
