1960 بدأت محاولات عمل نظم تشغيل تعمل على المينفريم – نظام المشاركة الزمنية – يعني
نخلي كل واحد يشتغل شوية في الجهاز – ليه ؟ لانو الجهاز كان غالي شديد وما مكن زول واحد يقدر يشريهو – يقوموا الناس يعملو شيرنغ (كل زول يدفع شوية) طيب عملية الشيرنغ في السعر وكمان الشيرنغ في استعمال الجهاز الشيرنغ في استخدام الجهاز يكون : "كل زول يجي يربط شاشتو وكيبوردو
في الجهاز (الطرفية حقتو) ويقعد يشتغل ، نظام التشغيل هنا بيساعد كل زول عشان يستفيد من الجهاز الواحد دا ويقسم زمن المعالجة بين طرفيات الناس جامعات وشركات كتيرة بدأت تعمل نظم تشغيل حقت مشاركة زمنية ومن المشاريع اللي اتعملت نظام تشغيل سموهو Multics هذا النظام ما مشى لي قدام واخد سنين لكن بدون نجاح يقولوا عليهو من المشاركين في النظام دا ناس Bell Labs ، قاموا حردوا الموضوع وسوو واحد براهم سموهو ينكس وبقوا يوزعوا مجاني في الجامعات خاصة وانتشر واشتهر في 1990 خش سوق السيرفرات وكمان منتشر في الجامعات الطلاب اتعودوا عليهو لكن هو في الزمن داك بقى بالقروش وغالي وكمان ما بيشتغل في الكيبوترات العادية
في داك الوقت ظهر اللينكس في اكتوبر 1991.
العملو وليدا يقولو Linus Torvalds كان طالبا نجيض في جامعة هيلينسكي، الوليد دا اتعود على اليونكس لكن الينكس زي ما قلنا غالي وما بيشتغل في الكمبيوترات الشخصية. قام فتش نظيم حق تشغيل كان بيدرسوهو في الجامعات اسمو minix عملو واحدا اسمو تننباوم . قام استفاد منو وعملو نظام تشغيل جديد سماهو لينكس.
لينكس دا القلب حق نظام التشغيل (يوقولو الكرنل kernel) – القلب هو البيشغل باقي البرامج ويتعامل مع العتاد بعدين في برامج تانية تجي فوق القلب دا البرامج البنشتغل عليها زي الغلاف (shell program) الغلاف دا هو البنشوفو في نظام التشغيل والقلب هو البينفذ شغلاتنا بي جوه
الوليد لينس (Linus) ما كتب كل البرامج دي براهو ، لكن استفاد من برامج مجانية موجودة ، ودا قلل عليهو العمل كتير من البرامج دي جابا من ناس GNU (ديل ناس طيبين وكرمين وكلسين تب – بدو عملن في 1984). يمكن نحكي قصتم في عصراويتن تانية ناس GNU ديل دايرين يعملو نظام تشغيل يشبه الينكس لكن مجاني في 1992 و1993 اضيفت حاجات كتيرة لي لينكس من بروتوكولات TCP/IP و النوافذ البي سموها x-windows وبدأت الكتير من الشركات في تطوير اللينكس وتوزيعه وظهرت مجلة لينكس في 1994
النسخة 1.0 حقت لينكس ظهرت في 1994 و من ديك وعيك
كل ناس سولون غلاف لقلب اللينكس بي الوان وبرامج واشكال مختلفة وقالوا دا لينكس اسمو فلان
ودا لينكس اسمو فرتكان ودا علان المهم الان يمكن في اكتر من 400 توزيعة حقت لينكس ، من شركات وناس مختلفين وأي شخص ممكن يعمل ليهو غلاف لقلب اللنكس المجاني وتقول دا لينكس فلان نذكر من التوزيعات الشهيرة في اللينكس :
رد هات
أبونتو
سوزي
ماندريف
فيدورا
ديبيان
جواثا
اربيكس
لينكس اكس بي
العرض العادي
