أسمع كلامي ووديهو الكوووووووووووشة

selvister · 23-12-2007, 17:55

سلامات يا شباب

كل سنة وإنتو طيبين وربنا يحقق ليكم كل أمانيكم

بعد ما ضربنا اللحمة ( وقلنا ربنا يستر ) إستنشقنا ريحة ( الله لا شممكم ليها ) عفنة بكل معنى الكلمة أتاريها دي رييحت الكمونية والعفشة
قالو شنو النسوان ( الكميونية دي فيها المرض بتاع الحمى النزفية ) يعني عشان ما يقطعهوا والمرض ينتقل ليهم وخصوصاً إنو بتتاكل نية ومن غير تحمير فجدوعها في الكوشة من غير تردد
( والغريبة اللحمة دي ما خافو منها ولا حاجة ).
وحتى الرجال إنتقلت ليهم عدوى الخوف من الحمى دي لي درجة الزول بيربط في يدو كيس بلاستك لمن يجي يمسك الخروف .

العايز أقولو إنو مقالب الزبالة ( الكوش = جمع كوشة ) بقت ملانة مصارين وكرشات وحاجات تانية والريحة تقتل قتل .
وحرام يا ناس نحنا ناقصين ريحة سمك موردة تاني ؟؟؟؟؟؟؟؟؟؟؟؟؟؟؟؟
وزي ما قالو في الجرايد وفهمو الناس إنو أي واحد يدفن مخلفات الخروف بتاعو . لكن الشايفو انا الناس بتدفن الدم بس وباقي الحاجات بيرموها - وين - في الكوشة .

وانا بكتب الموضوع دا إتزكرت موضوع كان كاتبو صديقي العزيز ( فيفيد الشفت ) تحدث فيهو عن مشكلة النظافة في العاصمة القومية وطالب بمجانية قضاء الحاجة في دورات المياه العامة
وتوفير ميزانية كبيرة تخصص للنضافة _ وتحدث عن تقصير الحكومة وعدم وعي الشعب السوداني .

وصراحة الشعب دا نهائي ما واعي .

الفنان · 27-12-2007, 10:39

أخي سلفستر
لك خالص التحية
الشيء الذي استغربته حقاً أن هذا الموضوع حيوي وهام وهو يتعلق بالنظافة والصحة معاً .. ورغم ذلك كم يوم لم يحظ الموضوع بتعليق واحد ... هذا أولاً ..

ثانياً موضوع نظافة العاصمة .. والله ياخي حاجة عجيبة جداً ... والأعجب أن موظفي الدولة المسؤولين يتحاومون بسياراتهم الفارهة وسط هذه الشوارع التي هي (كوش) جزئية ولا يهمهم حاجة والمشهد عادي دا إذا بحوموا فيها ... لكن لازم يشوفوها يعني بطيروا .. وحتى كان بطيروا برضو بشوفوها ... والغريبة التالتة إنو الناس داخل المنازل آخر روعة يعني بي جوة هلة هلة ومن برة يعلم الله ..
يا جماعة المشكلة وين ؟؟
بعدين في كل مدن الدنيا .. خليك من العواصم .. هناك عمال إسمهم عمال نظافة يتبعون لإدارات البلديات أين هم في بلادنا ؟ ولو في .. شغلتهم شنو ؟؟ أما إذا تحدثت عن النظافة في الأسواق .. فلن تتحرج ولا يحق لك أن تتحرج .. قل أي شيء ستجده أقل من مستوى النظافة .. إذا قدر لك أن تزور السوق المركزي أو المحلي أو الشعبي أو حتى العربي ... ستجد مياه تخر وبركا تشر وأكوام مدفونة وأوساخ مركونة وروائح مدهونة وعفار وغبار وطين وربوبن بألوان وأشكال مختلفة والناس تأكل وتشرب في العصائر بجانب أشياء مقرفة ... يا خوانا نحن وين ؟؟
الأمة دي ما بتخجل ؟؟

selvister · 25-02-2008, 16:49

يديك العافية يا فنان كلامك مية المية

وأديك منظر شفتو قبل فترة

الحمامات العامة في موقف إستاد الخرطوم
هل تصدق إنو الحمام مويتو مدفقة في الشارع ؟

والأفظع من هذا إنو الناس عاملين مصلى بيصلو فيهو .
وعارفو وين ؟

يا سيدي المصلى دا قدام الحمامات مباشرة يعني حوالي مترين قدام الحمامات ؟

عليك الله تقول شنو بس في المنظر دا

وأنا إن شاء الله حأصور ليكم المنظر دا لأنو بومباً بشوفو

عشان في ناس ما حيصدقو كلامي دا

بنت الشاطئ · 26-02-2008, 11:11

selvister

موضوع حيوي جدا النظافه
(النظافه من الايمان ) كما قال رسولنا الكريم
ليس العاصمه فقط بل كل مدن السودان تشكوي من هذه الافاه
المتعاظمه وهذا ان دل انما يدل علي المزيد من التخلف والتاخر
لان كل الدول المتقدمه تقاس بنظافتها من شوارع الي كل مرافقها العامه
والخاصه

عندك هنا في السودان وبالذات الشباب (السفه)يعني الواحد عامل فيها الولد نضيف
ومسبسب الشعر ونظافه الف ممكن عادي يرمي السفه في اقرب محل هو قاعد فيه
واللبان والتسالي في المواصلا والنبق وطبعن يا اخوانا دي ابسط انواع الوساخه
عندنا في السودان ما قادرين عليها معقوله نقدر علي مشاكل الصرف الصحي
والكوشه المفرهده في نص الحي

لازم الناس تنظف شويه

selvister · 26-02-2008, 19:45

مشكورة أختي بنت الشاطئ

والله كلامك أصاب عين الحقيقة

وكدا أكدتي إنو العيب فينا كشعب

لأنو في لا مبالاة شديدة بالنسبة للموضوع دا

مع إنو برضو الحكومة مقصرة

لكن لا أعتقد إنو في تنظيم سياسي يرضى إنو يكون البلد وسخانة

يعني برضو الحكومة ما لاقية طريقة تنضفنا لأننا ما مساعدينها لأننا ( الأغلبية يعني ) ما واعيين ولا مبالين بالصحة العامة

وللحديث بقية