يعود التيار الكهربائي و تبدأ الأضواء في الأشتعال رويدا رويدا و البلولة يخاطب نفسه متكبكب
ا
( الشكية لاب إيدن قوية .. حسي دة وكتو ؟ الدامة بدت تقسم و الحنك دور .. بس أن شاء الله ما تكون اتجارخت )
Signing in>>>> Bolbol online
Bit alriad says :
دة شنو يا بلبل ؟ مشيت وين ؟
Bolbol says :
و الله يا ست البنات النور قطع و إستنيت لحدي ما شغلو الجنريتر
Bit alriad says :
لا ما بيناتنا .. عادى .. المهم كنتا عايز تقولي لي شنو ؟
البلولة يتصلح في قعدتو و يدخل يده في جيبه مخرجا كيس الصعوط
فط جط فط .. ينفض الكيس و يدردم سفة معتبرة لزوم المزاج.. ثم يمسح يده في طرف الكرسي القاعد فوقو و يستطرد
Bolbol says :
حكاية المسنجر دي يا ست البنات بقت وهمة كبيرة .. حيث ما أن الواحد ممكن يتدقس عادي في المسنجر دة.. اضرب لبك مثال.. إسحق ود التجاني أبحمد.. كان بحبلو بنية لاقاها فوق المسنجر دة بالشهور .. و يكب الحنان و يشيل و يرسل ليها في الوشوش البضحكن و البغمزن و الوردة الحمرا و القلب.. اتوتك لييييي حلمة أضانو
Bit alriad says :
ههههه و ما تقول لي بس في النهاية طلعت ولد !
Bolbol says :
لا لا بت كانت .. بت بي صحها
Bit alriad says :
أها طيب الحصل إيه ؟
Bolbol says :
البت الممسوخة دي طلعت و العياذ بالله من البنات الما ياهن ديلك
Bit alriad :
????????
Bolbol says :
لا ما تفهميني غلط
Bit alriad says :
أها يا بلبل حرقتا لي روحي
Bolbol says :
طيب النحكي ليك القصة بالتفصيل
Bit alriad says :
يوووووووووه يا بلبل ما تبقى سغيل كدة
Bolbol says :
البت بدت معاو كويس و إسحق ما قصر معاها البتة ... في البدايات كانت ونسات ونسات .. بعد شوية بدت تحكي ليهو عن إنها ما سعيدة في الدنيا و ووو .. و قالت ليو في النهاية دايراك تسلفني مليوون .. مليون؟! يعلم الله إسحق كان باعوهو هو شدتو ما بجيب المليون
Bit alriad says :
لا حولة ولا قوة إلا بالله .. و عمل شنو أسحق ؟
Bolbol says :
كب الزوغة طبعا و عمل فيها مسافر العمرة و كدة و من اليوم داك الود ما بجي بي جنب محل النت زاتو
Bit alriad says :
انت عارف يا بلبل دي بقت مشكلة حقيقية و كتيرين من الناس بيستغلو النت في حاجات ما صاح .. بس أوعى تكون يابلبل شاكي فيني !
Bolbol says :
أفو يا ستهن (
و يضحك في سرو .. و يقول لي نفسو .. حرررم ما يحصل لي زيك آآ إسحق ) انا واثق فيك للطيش
Bit alriad says :
خلاص يابلبل عشان انا ما بحب اكون مدية زول شعور زي دة .. انا ممكن أقابلك في الجامعة و نقعد نتونس سوا
انتفض البلولة و قفز مقهيا في الشاشة و هو يعاود قراءة ما كتبته بت الرياض حرفا حرفا
Bit alriad says :
بلبل وينك ؟ ليه ما بترد
بلبل و بت الرياض .. مسلسل في حلقات
