Bit alriad says :
وين مشيت يا بلبل . انا لي 5 دقايق بتكلم معاك و ما معبرني
Bolbol says :
لا بس كنتا بتكلم مع عم ( بتاع النت) عشان يزود لي زمني تاني
Bit alriad says :
أوعى أكون معطلاك يا بلبل وللا حاجة ..
Bolbol says :
لا يا ست البنات لا عطلة و لا شتين . يعني وراي شنو ؟
Bit alriad says :
أها يللا ما قلتا لي رايك ؟ حتجي تزورنا في جامعتنا متين ؟
Bolbol says :
والله يا ست الناس انا ما عندي مشكلة .. حددي انتي الزمن المريح معاك و انا تحت أمرك
Bit ariad says :
خلاص رايك شنو يوم الخميس الجاي .. أنا بخلص محاضرات من بدري و ممكن نتلاقى زي الساعة 12 .. مش بتعرف كليتنا بي وين ؟
Bolbol says :
لا لكن البيسأل مااا بتوه
Bit alriad says :
خلاص إتفقنا .. دة رقم موبايلي لمن توصل أضرب لي عشان أطلع ليك في باب الكلية 09xxxxxxxx
أدخل البلولة يده للمرة التالتة و أخرج هذه المرة مفكرة مقطعة تفوح منهت رائحة العدس ..حيث مرت هذه المفكرة بلحظات عصيبة من قبل..و إنتشلت من صحن فتة عدس و ضاعت كثير من الأرقام المكتوبة فيها .. لكنها صمدت في وجه المصاعب برغم قوة قدحة فتة العدس و كمية الشطوط الكانت مكبوبة فيها.. أخرج البلولة أيضا قلم كوبية مبري بي موس توباز مصدية.. و أداهو مصة بي قدومو لضمان بل السنة حتي لا تنمحي الكتابة بي الساهل و خط رقم بت الرياض بسرعة و بخط مكعوج رقمين بالانجليزي و رقمين بالعربي المهم شخبتو سرعة سرعة كدة و قلب راجعا لمواصلة حديثه مع بت الرياض.................................
Bit ariad says :
خلاص يا بلبل كتبتا الرقم ؟
Bolbol says :
ايا خلاص .
Bit alriad says :
طيب بعد دة انا أقول ليك شاو عشان طالعين بعد دة
طبعا البلولة ما فهم ليك شاو دي معناها شنو لكن مشاها و فهم من سياق الحديث ان بتستخدم للوداع .. إتوكل علي الله و قال يعوم مع التيار دة و ربك يستر.................................
Bolbol says :
خلاص ماشا قلتي لي .. وداعة الله عند الرسول. و ما تنقطعي
Bit alriad says :
اوكي .. يللا ما تنسى يوم يوم الخميس... بااااااااااي
Bit alriad says :
T. C
Bolbol says :
قلتي شنو يا ست الناس .. ما فهمتك !
Bit alriad :
هههه دى معناها خلي بالك من نفسك يا بلبل
Bolbol says :
النبي !! طيب هاك دي ...
Bolbol says :
GMT
Bit alriad says :
ههههه و دي معتانا شنو يا بلبل.. توقيت جرينتش ؟
Bolbol says :
دي يعني قشة ما تعتر ليك ( قالها مزهوا بنفسه لأنو ختا بت الرياض في علبها و شاكرا في نفس الوقت لأستاذو حمدنالله بتاع الأنجليزي )
Bolbol says :
هههههه... عليك جنس حركات يا بلبل ... يللا بااااااااي
Bolbol :
ودعتك الله و الرسول
Bit alriad appears to be off line, messages you send will be delivered when they sign in
البلولة ما عرف باقي الساعة يعمل فيها شنو و حرام الألفين جنيه تروح فشوش ساكت.. فقام قال يدخل كدى المواقع الكتبوها ليهو الشباب .. مرق النوتة تاني و بدا يكتب أسامي المواقع موقع موقع ... الغريبة كان أي موقع يكتبو بتجيهو رسالة بدايتا ( أخي المواطن .. أختي المواطنة ) .. فتمتم قائلا و مفتخرا بأولاد حلتو الشفوت الذين حيرو النت زاتو و خلوهو يتجرس : و الله يا العوض لقيتك ما هين جهجت الشبكة العنكبوتية ظانو..........................
والله يا بنادول مبالغه عديل كده ربنا يديك العافية ومنظرين ومتابعين معاك أحلي حاجة Gmt ختا بت الرياض في علبه بالجد وحمدنالله أستاذ الإنجليزي بستاهل الشكر شكرا كتير ونتمني تواصل بنفس المستوي قلت لي شنو صدفة البحر يا عسوله حيييييييييييييييينه أنحنا ما بترد علينا لي؟ لكن لقيتك بناتي يا بندل أعمل حسابك صدفه ساكنة الخرطوم وإحتمال تكون في الرياض سلام
التوقيع
أشهد أن لا إله إلا الله
وأن محمد رسول الله
عليه أفضل الصلاة والسلام
اللهم أغفر وأرحم أخانا محمد حسن (البروف) وأسكنه فسيح جناتك مع الصديقين والشهداء يا أرحم الراحمين
التعديل الأخير تم بواسطة : كبد الحقيقه بتاريخ 11-12-2007 الساعة 23:21.
والله يا بنادول مبالغه عديل كده ربنا يديك العافية ومنظرين ومتابعين معاك أحلي حاجة Gmt ختا بت الرياض في علبها بالجد وحمدنالله أستاز الإنجليزي بستاهل الشكر شكرا كتير ونتمني تواص بنفس المستوي قلت لي شنو صدفة البحر يا عسوله حيييييييييييييييينه أنحنا ما بترد علينا لي؟ لكن لقيتك بناتي يا بندل أعمل حسابك صدفه ساكنة الخرطوم وإحتمال تكون في الرياض سلام
يا كبد و الله انا ملاوز منك من قبيل قلتا تكون ضارباك حمى نزفية وللا واحد من الامراض الختيرة الحايمة الايام دي
بعدين يا خوي و الله ما بدسها .. بحب الجكس زي عيوني تسلم لي مرورك العطر
الله يخلي الجكس .. كل الجكس .. أريتني ابقى ليهم بنادول و تتراسايكلين و فكس
خرج البلولة من محل النت بعد ما كمل الساعة بتاعتو و خرج ميمما دارهم العامرة.. الوطا كانت مغربية و الجو برد و الشهدا زحمة خرافية , إتلفت يمن و شمال لقى الكتاحة قايمة و مواصلات الثورة عدم.. قرر البلولة أن يملح و ربك يسهل القواسي, بس يا ود يا بلبل الملح من الشهدا صعب , قال البلولة مخاطبا شخصه , يعني يا حبة لازم ندق الكدنكة من هنا لي صينية أزهري و نقنص للمعلمين الجايين من بحري , الشارع هناك حركتو خفيفة و العربات بتهدن , يعني ممكن تلخم ليك واحد بتاع بوكس بي يا عم و تلب تتلب قبل ما يدرك الحقيقة زاتو , و بالتالي تكون ختيتو قدام الامر الواقع.. الله كريم .. و شد بلبل الخطوة نحو صينية أزهري .. و أداها سندة بي سندوتش طعمية حااااارة من الصاج من عمك بتاع الطعمية الفي عمارة تاجوج.. و قال يونس رويحتو بي غنية لحدي ما يوصل.....................................
و مبروك علييك , الليلة ياااا بلولة ... يا حليل إسحق الخنقتو الفوولة
يا بلووولة انتا.. راكز ما طاااااااااااشي
ولي بت الرياض.. في جامعتم ماااااشي
ألبس البنطال........... و خليك حااااشي
و ما تكون مبهدل .... و بي الشدة كااااااااااشي
و أداها ليك صفارة إنطراب كدة و قرمة من السندوتش و واصل الكداري بتاعو......
لم يخب ظن البلولة و نجح تكتيكه ( الملحي ) الناتج عن خبرة سنوات في شارع المدارس أيامات الثانوي , تلفت ذات اليمين و ذات الشمال و إختار بعينه الفاحصة حتة ينصب فيها كمينه .. قهقه ضاحكا لأنو إتذكر نفس الوضع في برنامج مجلة زيرو ون البجيبوها في التلفزون .. لمن جابو ليهم أم شبتو قانصة لي ضبانة .. ما أشبه الليلة بي أولت أمبارح .. و يقولو تلفزيون السودان ما مفيد ؟ و حاة سيدي الحسن الناس دي مفلهمة و مقرضمة في الفاضي...
كان الموقع الذي إختاره البلولة بالقرب من إحدى الفتيات التي يبدو إنها كانت بتسترزق .. الحتة دي و الله هواها كتير بس المجبور يركب الصعب , قال البلولة , لكن حتة حكيمة أكتر من هنا مافي.. أهو الواحد يأشرلو لي بوكس .. و كان البنية إتوفقت , أتلب معاهم في العربية.. أيوة أصلو الشاب الجزاب ما حيرفض عشان حيكون ما داير شوشرة .. طبعا دي كانت مدرسة اليسع ود حلتم ,, ود ما شاء الله الصلا على النبي تفتيحة و شايل مفاتيحا و شارب قزازت الريحة....
قنص البلولة في موقعه و لمح بي طرف عينه الثاقبة الفتا تحدر ليهو .. و أكيد أكيد نعلت سلسبيل أجدادو و شكتو لي الله على المقص العملو دة... البلولة ولااا هماهو .. يا روح ما بعدك روح ,, بعد الحنان الطافحو دة داير يمشي البت ينقف البلاعة و يديها حمام كاارب بي صابونة لايف بوي جديدة إشتراها أمس من الفراشين الفي البوسطة.. و يشوف ليهو عضة فاهمة قبل ما يطلع لي الضمنة جنب دكان عباس الحلاق... يعني جدول أعمالو مزحوم و ما فاضي للمجاملات الفارغة دي ..و للمرة التانية شكر البلولة أستازو حمدنالله القال ليهو ( يا بلولة يا ولدي .. ليدز فيرست .. آند دوقز فولوز ).. الله يرحمو كان مليان حكم .. عللا لم فيهو الجزام عدمو الصباع و مات في الكرنتينة زيو و زي البهيمة الطاقيها حمى نزفية................
إنت ما لقيت ليك حتة تقيف فيها غير هنا يا شاب انتا ؟,,, قالت البت , ابتسم البلولة و ظهرت أنيابه بارزة و قرب خطوتين منها و قال ...........
يعني بجي الشهدا بدوس الطعمية بتاعة عمك دا زاتو وبمشي قداك شوية أضرب لي نص جك بتاع عصير قصب وكان قعدت كشفت شوية كدا وأديتها لفة في الملازمين مروراً بيبيت المال . وبي تحت بي أبروف وجنب البحر وألف بي سوق الشجرة وأشتت بي ود أرو وبعد داك اضرب ( أقاشي عند عمك الفي الناصية ) في صينية ود أرو . لأنو الطعمية بتكون خلاص ساحت مع المشوار .
خخخخخخخخخخخخخخخخخخخخخخخخخخخخخ
حقيقي صورت واقع الشباب ولو كانو جزء لكن هذه حقائق موجودة
تسلم أخي بنادول
ورجاءً وصل لينا في المسلسل .
لكن قبل ما تبدا دقيقة بس .
يا ولد جيب العنقريب دا بي جاي وهاك دي 500 جنيه جيب لي تسالي من عشة ست الفول .وبعدين أغشى معاك حسن بتاع المديدة جيب لي منو كورة بالدين . قول ليهو ما تخاف بنرجع ليك الكورة .
يا حسن يا ولدي هاك بالله الرتموت دا ( يا أبوي دا إسمو الريموت )
يموت ولا يعيش جنس الكلام بتاعكم دا .
هاك جيب لي قناة عشاق السودان في مسلسل ظريف كدا
من إخراج بنادول .
بتعرف بنادول ؟ موش دا الأبيض المدور دا ؟ الببلعوهو لي وجع الراس ؟
أي ياهو تب
تسلم لي مرورك العطر
.. الحتة دي و الله هواها كتير بس المجبور يركب الصعب , قال البلولة , لكن حتة حكيمة أكتر من هنا مافي.. أهو الواحد يأشرلو لي بوكس .. و كان البنية إتوفقت , أتلب معاهم في العربية.. أيوة أصلو الشاب الجزاب ما حيرفض عشان حيكون ما داير شوشرة .. طبعا دي كانت مدرسة اليسع ود حلتم ,, ود ما شاء الله الصلا على النبي تفتيحة و شايل مفاتيحا و شارب قزازت الريحة....
