الدنيا دي .... ضيقة ... شدييييييييييد ... صح

هنــــاء · 26-11-2007, 11:38

قبل سنة ونص كده كنت راكبة القطر من القاهرة للاسكندرية وكان جاري في الكرسي الجنبي شاب مصري
كنت بقرا في رواية ومشغولة بيها جدا لكن كنت ملاحظة انو بين لحظة والتانية بعاين لي كده بطرف عينو وشكلو عاوز اي فرصة عشان يفتح معاي موضوع او حوار وواضح انو درجة الكيوور عندو عالية جدا جدا بالرغم من شكلو الهادئ وانا طبعا ملاحظة وبتغاتت وعاملة اني مشغوووولة خالص بالرواية الفي يدي
بعد نص ساعة كده صاحبنا غلبو شديد قام جاب مويتين واداني واحدة اتفضلي ياانسة .... مش انسة برضو؟ اتلفتا عليو وشلت الموية وقتا ليو مرسي ايوا انسة وطبعا لقى فرصة وبدا يسالني اول سؤال قال لي حضرتك مصرية؟ في اللحظة دي جاتني فكرة مجنونه كده وبدون تردد قتا ليو ااه انا مصرية من اسوان عشان طبعا بكون لفت نظرو اللون ولو في حبة لخبطة في اللهجة مع اني بتكلم مصري كويس
المهم بعد داك بديت االف واحكي وكنت مستمتعة جدا على فكرة لاني اول مرة اكتشف في نفسي موهبة التاليف والتمثيل والارتجال بالسرعة دي (بصراحة اتقمست الشخصية شديد وحسيت في اللحظة ديك انو لو لقاني مخرج حيرشحني للتمثيل ويكتشفني) واكتشفتا انو السفر عندو فايدة تامنة انو بخليك تكتشف مواهب مدفونة جواك
المهم انو صاحبنا كان مصدقني تماما وانا كنت مستمتعة بدرجة الاقناع الوصلتو ليها
لكن القصة وين؟؟؟؟؟
طبعا رجعتا من الاسكندرية ومنها للسودان ونسيت القصة دي تماما
لكن
قبل يومين غشيت خالي في بيتو وكان معاو ضيوف على العشا وانا بسلم على الضيوف فجاة اذا بي القى صاحبنا زااااااتو بتاع القطر قدامي
تراااااااااااااااااااااااااااااااااااااااااااااااا ااااااااااااااااااااااااااااااااااااااااااااااا
طبعا هو فتح خشمو وبحلق فيني
وانا انفقعت من الضحك وماكنت قادرة امسك نفسي
والناس كلهم مندهشين طبعا وبسالوني بتعرفو بعض قبل كده ؟ وانا طبعا ماقادرة ارد من الضحك وهو من الاندهاش كل القدر يقولو بعد مافاق من الصدمة انو قال لي انا ماشكتش لحظة ياكدابة
طبعا اعتذرتا ليو وحكينا للقاعدين الحكاية وكلهم قالو ليو انو هناء دي بتاعت مقالب دايما

لكن بالجد امنت من اليوم داك انو الدنيا دي ضيقة شديييييييييييييييييد

عروس الرمال · 26-11-2007, 11:51

هههههههههههههههههههههههههههه دا شنو يا بت والله حلوة منك والاحلى منها الفائدة الثامنة للسفر

هنــــاء · 26-11-2007, 12:11

تسلمي ياعروس الرمال
والحالة ماشفتيني وانا بكضب وبمثل استااااااااااااااذة

الفنان · 26-11-2007, 12:13

صحيح يا هناء الدنيا ضيقة جداً وكثيراً ما تمر مثل هذه المواقف .. فتلتقي بشخص بعد فراق سنوات عديدة في أكبر زحام في العالم مثل (الحــج) مثلاً ..
كذلك كثير من الأخوة الذين درسوا في مصر يوصون بأن لا تظهر هويتك السودانية تجنباً للنصب والإحتيال وأشياء أخرى ..
لكن إنت طلعت عفريتة أكتر منهم !!!! يا عفرييييييييتة

هنــــاء · 26-11-2007, 12:22

تسلم يافنان على المشاركة

انا بس بتجيني مرات كده لطشات عفرتة لازم افرغا مابقدر فمرات بقوم اصغر سني او اكبرو او اتقمس شخصيات تانية لكن بعترف في النهاية

بنت الشاطئ · 26-11-2007, 12:36

ههههههههههههههههه

اي والله يا هناء شده ما ضيقه اتخيلي
انوا البت عروس الرمال طلعت بت خالتي
وانا ما عارفة واتعرفنا بيها في عشاق السودان هنا
اتخيلي اضيق من كده في

portbail · 26-11-2007, 12:45

قصه وأقعية جميلة ولكن حقيقة الأجمل كان سردك وروح التشويق وضيق الدنيا كلها تجمعت لتجعل منك أديبة رأئعة وأصلي لتتحفينا بالمزيد ...
مع مودتي ،،،

ahmed hassan · 26-11-2007, 12:58

سبحان الدائم
حبل الكضب قصير

يا بت الشاطئ كدى احكى لينا القصة بتاعة تعارفكم

هنــــاء · 26-11-2007, 14:37

ههههههههههههههههه

اي والله يا هناء شده ما ضيقه اتخيلي
انوا البت عروس الرمال طلعت بت خالتي
وانا ما عارفة واتعرفنا بيها في عشاق السودان هنا
اتخيلي اضيق من كده في

شفتي كيف يابت الشاطئ اي دايما بتحصل انك تلقى زول في حتة وتتعرف بيو ويطلع قريبك
لكن من بلد لبلد دي هي الحيرتني وانا ماخدة راحتي وبونس الراجل واكضب واالف مااتخيلتا اني حالاقيو تاني

وكدي احكي لينا قصتك انتي وعروس الرمال

هنــــاء · 26-11-2007, 14:40

شكرا portbailعلى رايك ده
وشكلي حاالف قصص وامثلا واخرجا بعد ده
عشان مايبقى كضب ساي