الى الام

elfatihshowaa · 07-11-2007, 11:25

ست البيت
مدخل:-
امي ...
اليك الوفاء
وربي السماء
بقدر السماء
وقدر الربيع
وقدر الشتاء
................

نص:-
بلاقيك في قليب الناس
نضار وحماس وغنيه
وبيوت عشاق مزارعيه
عليها تكلت ما القيت
هداي اليك
شارع البيت
ونفاج الهوى الجواك
وممشي الشعب
في موكب زفاف مزحوم
هتاف وهتاف
عديله وزين
ونسمة حب وحس قوقاي وقمريه
وبسمة حب وحنيِّه
وتلاوة شيخ
مُُلقي عليهو ضحويه
وشروق الشمس
وحضن الامس وحنيه
وصباح الخير
وكيفي معاك حنين يا أُم
وكيفن كيف وكيفن كم
وكيف نقدر نجازيك ونذيد احسان
مع انك انتي القومتي
جواي الحب في كل مكان
لكنك انتي الخشيتي
وبقيتي معايا الانسان
في الفرح الحن الطاريكي
تلقيني جناك ومباريكي
شيدت هواك ومبانيكي
في داخل ارض الوجدان
يا أم لو قت النجزيكي
وبالروح والدم النفديكي
ما ظنيت بنساويكي
منو الغير عيونك
تساهر الليالي
وتخش في خيالي
وتذيد الحنين
منو اللما ابقي حزين في البرايا
بتبقي المحايا
وكلام الدوايا
وتكون همبريب
منو الكان تنور في ضلمة هوايا
وتكون الحليب
ولما يسود جواي الخوف
والعتمه تذيد
بلقاك دوام
مشكاة الضوء
وعصا موساي
وشعاع ممتد
ما بين الامس
وغموض الغد
بلقاك هواي
بلقاك معاي
تبتيب للروح
في يوم مفتوح
مليان بالهم
بالشوق مجروح
والريده هداي
وكِملْ البوح
يا مُشيّده قصرك
في دنياي
بانياهو سطوح
بلقاك اريج
جواي يهيج
احساسي حجيج
من بحر الود
شارب سكران
يا أم تعبان
في الغربه تعيس
مليان بالهم
والهم ابليس
مشتاق عينيك
وكفايا عينيك
ما دام ايديك
بتمس الراس
وتشيل الهم
بتصفي الدم
من عكر الغم
بلقاك دعاش
حاويني وماش
يا يمه عليك
خطوات الشوق قدامي تفوت
والقلب يجوط
زي المجنون
مهوس مفتون
بلقاك الشعب
بلقاك الحب
بلقاك القلب
الروح الدرب
بلقاك الدم
بلقاك انسان
يا امي وابوي
يا اختي واخوي
يا ست البيت
يا نفس النفس
جنات الرب
تحتك يا يمه ادفنت

Mohand_Alsir · 07-11-2007, 11:27

لو كتبنا الدهر كله لما أوفينا بحق أمهاتنا

وأشكرك على القصيدة الجميلة

شايقية · 10-11-2007, 18:02

وتعجــــــز حـروفـــــــي عـــــن التعبيــــــر .. فـــالتــزم الصمـــــــت علـــه يبلغــــك روعــــة ما تنحتــــه من حـروف ..

وقدر ما حنـــــــكتب ما أظــــن يـوم نقــــــدر نوفــــيها حقهـــــــــا .. ربنـــــــا يخلــــــينا لينـــــا أمهـــاتنــــــــا..

يديــــــــيك العـــــــافية .. ودمــــــت بخيــــــــر

baloza-06 · 13-11-2007, 02:06

الام مدرسة اذا أعددتها أعدت شعبا طيب الاعراق

تسلم يا غالي على الابيات الجميلة في الام...

تحياتي