هوامش على هامش التهميش

Talal · 31-10-2007, 01:40

دارفور وكردفان ( الغرب) مهمشة
الشمالية من شندي لحدي حلفا (الشمال) مهمش
الجزيرة ومشروعها الخرطوم وضواحيها النيل الأبيض( الوسط) مهمش
كسلا القضارف الدمازين بورتسودان ( الشرق) مهمش
جنوب السودان أبيي جبال النوبة ( الجنوب) مهمش
الحزب الشيوعي, البعث,حق ( اليسار) مهمش.
أنصار السنة, الأمة بفروعه,الإتحادي, الأخوان, المؤتمر(وطني وشعبي) اليمين (مهمش)
الحركة الشعبية, جيش التحرير, البجا, العدل والمساواة, جبهة الخلاص الوطني (الوسط) مهمش
خلاصته يعني التهميش حارسنا (جغرافيا)من الشمال والجنوب والوسط والشرق والغرب و (سياسيا) من اليمين واليسار والوسط
دا غايتو الطلعت بيه من واقع الحياة في السودان .. والأهمش من كده إنو في المنتديات كل جماعة ( جغرافية, سياسية, إثنية, دينية) دايرين يردوا إعتبارهم ويستردوا حقوقهم... من منو؟؟
رأيكم شنو نفضي السودان دا كلنا ونمشي نتهمش في حتة برة ( وأهو هميش الغريب ولا ود عمك القريب) و ندي السودان لشركة من شركات محاربة التهميش وإعادة صياغة الدول المهمشة- لانه طالما السودان في نظرنا هو مهمش إقليم إقليم- فهو أكتر من مهمش في نظر الدول والدويلات البرة.

المهم بعد ما يصلحوه لينا نرجع كلنا ونبقى حلوين ونهمش الهمشونا زمان.

بنت الشاطئ · 31-10-2007, 11:58

اخي talal

التهميش وما ادراك ما التهميش؟

جميل منك والله الموضوع ده
بالجد انتوا نحنا لوكلنا مهمشين وعلي الهامش الفي نص بين الهمشين منو
اها يا طلال نحنا لو خلينا هامشنا المهمش ده نمشي وين
اكيد حنتهمش اكتر (هميش بلدنا ولا هيش بره)

وهمش يا اخوي يعيش المهمشين في الهامش

**طارق** · 31-10-2007, 15:25

العزيز طلال ... تحيه ....

فعلا الجميع يحس انه مهمش هنا في وطننا السودان وبتنا لا نعرف من الذي همش من ؟
من كثرة المطالبات والقضايا المرفوعه في الوطن وبإسم الوطن ... وضاقت ارض السودان على
الجميع رغم اتساعها .. ليحترب الجميع تحت شعار ... أنا الأصلح وأنا الحاكم ... دون أن يقول
الشعب كلمته في من يحكمه .... حقيقة .....!

وصار البعض في جغرافية السودان يطالبون بحقوقهم ... من السودان وثرواتهم ... ليتحول الوطن
الى شركة مساهمه خاصه ... قد تنفض يوما عندما تنتهي قوة المركز المسيطره الان !

والى الان لا ندري من حكم السودان مخلصا لهذا الوطن !

الفنان · 31-10-2007, 15:41

زمان كان يقول الفكي عبد الرحمن في عزيزي المستمع
"في ناس بقولوا البلد دي حفرة" يعني ما بتتملي .. أنا المحيرني شديد ما التهميش الحمد لله كلنا في حظيرة واحدة مهمشين ..
لكن حكومة الهنا دي .. قروش من البترول .. قروش من الضرائب .. قروش من المغتربين .. قروش من الجمارك .. قروش من الرسوم في الدوائر الحكومية .. قروش من بيع الأراضي والمشاريع .. قروش من البنوك والمصارف .. قروش من المنح والتبرعات .. قروش من الحافلات والركشات وستات الشاي .. قروش .. القروش دي كلها بتمشي وين ؟؟

Talal · 31-10-2007, 19:07

طبعاً لااااااااااااااااابد وما داير أرد
داير أحسسكم أني همشتكم
على الأقل أمام الله تقدروا تقولوا : هذا هو الشخص الذي همشنا في البوست
بدل أزمة البحث عن الذي همشنا؟؟

سؤال
الحاجة دي هبة ربانية لعياد الله السودانيين ولا شنو؟؟

المهند الكشميري · 01-11-2007, 01:15

لن يختلف التهميشـ الحاصل في سودانـ الخير عن أي تهميش في أي بلدٍ عربيـ ..
فحينما تصبح "الخيانة" وجهة نظر .. و "العمالة" رأي معتبر .. و "الجهاد" فكرٌ خطِر .. يمكنك توقع كل شيء

مشكلة السودان أن هناك من تجرّأ وانتفض لمصالحه الشخصية ، ليشارك "العم الكبير" الحصة في البلد ، فكان جنوب السودان .. وشرقه .. وغربه .. ولا أدري ما هو القادم !

نحن يا سيدي في أوطاننا "جاليات" .. وأصحاب "القروش" هم الأغلبية ..
تحيــة كبيرة لـ"الجالية السودانية" في السودانـ ..

تقبل مروريـ ..
المهند الكشميري

حسن فاروق · 21-11-2007, 21:45

التهميش تحس بيه بالجد أول ماتطلع من بلدك من باب حب الإستطــــــلاع وتمشي

أي دولة وتلقى الإحترامات والقانون وسهولة الإجــراءات والمعاملات الرسمية ومعرفة

قيمة الوقت في العمل والرقي في التعامل ,رجال الشرطةيتعاملون معك معاملة راقية

جداً وفـي نفس الوقت ينطــبق عليهم القانون كما ينطــبق عليك وتتم محاسبتهم لو

مخطئين... ومن ثم تعود وتفاجأ بالواقع المرير الذي تعيشه أنت في بلدك حيث كل شئ

مختلفٌ ومخالف ومتخلف وله خليفة يخلفه على هذا التخلف .....وتندب حظك

وأيضاً في بعض البلدان تجد مواردها مقارنةً مع مواردنا أقل بكثير ولكن مواطنيها

يتمتـعون أبسط شئ بمجانية الخدمات الأساســــية وفرص في التعليم والعمل

بل حتى فرص أحسن في السكن (ويكون ذلك بتوفير الدولة قطع أرض وسهولة

إقتراض مبلغ بغرض البـــــــــناء ويــــتم تسديد المبلغ على أقسـاط مريحة جداً .

شتّان مابينهم وبيننا وشتااااااااااااااااااااااااااااااااااااااااات

Talal · 22-11-2007, 13:01

بنت الشاطئ
طارق
الفنان
المهند الكشميري
حسن فاروق

أغرب ما في الموضوع أننا سلمنا يالتهميش وأعتبرناه ضرورة ونستغرب للأشياء الإنسانية والتي هي من حقوقنا
إسقاطات التهميش على الجانب النفسي للسودانيين جعلت قلة التهميش هي الشئ الغريب بدلاً عن العكس
وجعلت الفرد يسعى للشكوى الدائمة أنه في الجانب الذي لا يحظى بحقوقه بينما يستأثر الآخرون بها
فوضعنا أنفسنا بأنفسنا في خانة المحروم والمظلوم دوما على الصعيد الشخصي والإجتماعي والإقتصادي وحتى السياسي!!!
وأكتفينا من النظر في الدنيا للنصف الفارغ من الكوب
وعشنا على ذلك
نجتر من ماضينا ونكتفي
وما نلبث ننادي أن يا تهراقا ويا بعانخي ويا المك نمر ويا مهيرة وعبد الفضيل الماظ وعلي دينار وأننا كسونا الكعبة وأسسنا إتحاد كرة القدم وكنا من اوائل من إفتتح الدخول للجامعة العربية
ولكننا نعاني الآن من التهميش
وكأنما تاريخنا سيشفع لنا ويقوم بالنيابة عنا بالنهضة المطلوبة لنوازي العالم
وكأنما العالم سيقف لينتظرنا نلحق بركبه ونجاريه

المسألة في دواخلنا نحن

ولذلك سألت أعلاه

هل هذه الرؤية القاتمة هي هبة ربانية من الله تعالى لعباده السودانيين؟؟