رسوم عبور

Talal · 31-10-2007, 01:25

ظروف عملي بتحتم علي سفر كتير بالطيارة داخل السودان (الشقيق) - كماوصفه سفيرنا بالسعودية. المهم مرة نزلنا في مطار المتمة الدولي غرب شندي. نزلت في فندق المك نمر (خمسطاشر نجمة) صحيت الصباح حاسي بشوية وجع في اضاني, مشيت المركز الصحي وقلت اشوف الحاصل شنو....... دخلت لقيت الجعلية الفي ( Reception ) سمحة عدييييييييييييل ... المهم زولتك قاااعدة وفاتحة الكمبيوتر تتصفح في سودانيز بييوند لاينزSudanese Beyond lines)) شافتني طبعا قفلت البايج(Page) وإبتسمت لي وقالت: مرحبا أي خدمة (How can I help you)؟؟؟
قلت يا أخواننا أقول ليها عندي شنو وللا أحسن أدخل للمساعد الطبي جوة ( ما هي في النهاية قطرة أضان وإنتهى الموضوع) ........... إتوكلت و كلمتها. سألتني من إسمي وتاريخ وصولي للمتمة ( قلت في سري: الموضوع حايجيب ليهو تلفونات و مواعيد طوالي)
زولتنا نزلت البيانات في جهازها وقالت لي : عاوز تقابل (بروف) منو تحديدا؟ أنا في سري طبعا كنت متوقع مساعد طبي أو ممرض أو بالكتييييير كدة داية. المهم قلت ليها أي زول ............. إستغربت (هي) وقالت لي: إتفضل أقعد ... إنت رقمك 6 عاين في الشاشة الفوق دي لما يولع الرقم أدخل طوالي للدكتور !!!!!!!!!!!!!!!
أمك الرقم 6 ولع .........
طوالي جريت دخلت للدكتور وصلت جوة لقيتو فاتح الصفحة بتاعة حالتي في الكمبيوتر, سألني عن أخباري و الأولاد والجري والمعايش وحاسس بي شنو بعد شوية كدة قال لي أمشي المعمل جيب لي الفحوصات دي ( أنا طبعا منتظر الورقة بتاعة الفحص) قال لي يا إبني أمشي المعمل بس. أها مشيت المعمل – انا تفتيحة- أنتظرت لما رقم 6 ولع في شاشة المعمل حتى دخلت .....
شالوا الفيها النصيب من دمائي الطاهرة وقالوا لي: أرجع الدكتور ......... جري مشيت و زي الفالح أنتطرت الرقم 6 ولع ودخلت الدكتور تاني, طمني وقال لي دي أصلا فطريات في الأضان بتنشط في حالة الطيران لفترات طويلة عموما أمشي الصيدلية تحت وأصرف القطرة دي وبرضو رغم إني تفتيحة لكن دقست تاني لأني وقفت منتظر الروشتة قال لي يا إبني أمشي الصيدلية بس ........ يا خواننا الشغلانية كلها طلعت (paper less)
أخوكم نزل الصيدلية واستلم القطرة و قالوا لي عندك قطرة تانية حاتنزل بعد 27 يوم
رجعت لزولتي السمحة قلت أدفع الحساب ..... ضحكت و قالت لي ( Sorry we are not dealing with cash here) الحساب حايتحول من رصيد الشركة بتاعتكم لينا هنا.

الدواء نفع معاي شديد وبعد 27 يوم من الكلام دا كنت في الضعين وقلت ياسيدي نشتري الدواء القالوه دا. مشيت جبت الفتيل الفاضي و دخلت لإقرب صيدلية وقلت ليه داير من ده...... بتاع الصيدلية عاين لي ( شذراً أنا متأكد أنها دي شذراً ذاتها البقولوها) وسألني من إسمي وتاريخ وصولي الضعين ... نزل ال (data) في كمبيوتره وقال لي: فعلاً إنت عندك دواء نزل الليلة يا دوب... خد إتفضل ,,,,, إستلمت الدواء و قلت أدفع الحساب ..... ضحك و قالت لي ( Sorry we are not dealing with cash here) الحساب حايتحول من رصيد الشركة بتاعتكم لينا هنا.
وأنا شايل الدواء و عايز أطلع من الصيدلية ,,, إتزلقت في الرخام و راسي خبط في باب القزاز وشفت ليك الدنيا دي حمراااااااااااااء
من بعيييييييييييييييد سامع صوت الناس : يا زول يا زول والله دة الزول نمرة 6 لما فتحت لقيت نفسي واقع في حفرة في نص الظلط قدام مركز صحي (...............) المزدحم بالمرضى في قلب العاصمة الخرطوم.
قبضت يدي شديد و طلعت من الحفرة الوقعوا فيها قبلي خمسة أنفار من الصباح!!!!
ولما فتحت يدي لقيت فيها فتيل الدواء ( الفاضي طبعا) لأنه في رحلة العودة من الحلم إتصادر الدواء كرسوم عبور من الحلم للواقع

**رغــَــد** · 31-10-2007, 02:20

اولا مرحب بيك اخي طلال في عشاق السودان

وواضح خالص انك حتضيف لينا كتير جداً بوجودك

بالنسبة لــ (رسوم عبور)

اقول ليك شنو بس....!!!

ابداااااع X ابداااااع

اقتباس:

المشاركة الأصلية كتبت بواسطة Talal

ولما فتحت يدي لقيت فيها فتيل الدواء ( الفاضي طبعا) لأنه في رحلة العودة من الحلم إتصادر الدواء كرسوم عبور من الحلم للواقع

اتمنى ان يتبقى لنا بعض الهــــواء فقط .. لنتشبث به.. إلى ان يأذن الله....!!!

احلى تحية

Talal · 31-10-2007, 09:52

اقتباس:

المشاركة الأصلية كتبت بواسطة رغــَــد

اتمنى ان يتبقى لنا بعض الهــــواء فقط .. لنتشبث به.. إلى ان يأذن الله....!!!

احلى تحية

الشكر ليك يا رغد
وإبداعكم هو ما دعاني للمشاركة

لكن بالحاصل دا
مش ممكن الهواء ذاااااااااااااتو يبقى دقع مقدم ويقطعوه زي الكهرباء والموية وشبكات الإتصال؟؟
ويبقى مدفوع القيمة ومقطوع برضو؟؟

بنت الشاطئ · 31-10-2007, 10:49

لك التحية Talal

لك التحية مثني ورباع علي السرد الجميل لاحلام من الصعب تحقق في هذا
الزمن ولكن كلنا رجاء انها تحقق في يوم من الايام
ماذا تبقي لنا غير التشبث بمثل هذه الاحلام
ولك التحية علي نبش هذا الجرح الغائر الممتلئ بالملح

وارجوا منك انك تتحفنا بمواضيعك ومشاركاتك

قلب حنون · 31-10-2007, 11:05

ههههههههههههههه

تصور انى كنت صدقت بجد انك لقيت مركز صحى بالشكل دة..

لكن فى النهاية فقت انا برده من الحلم

لكن موضوع روعة

Talal · 31-10-2007, 11:17

بنت الشاطئ وقلب حنون
شكراً للمرور اللذيذ

نبش الجرح الغائر والمتمثل في بند الرسوم (على أي حاجة) هو فعلاً ما دعاني لأن احلم بواقع دول أخرى (الحاجة دي واقعية وعايشها زول سوداني في دولة متقدمة) بس ما وقع في حفرة ولا إتصادر حلمه لأنه ما كان بيحلم وحتى لو حلم ما في رسوم على الأحلام!!!

جومو كنياتا · 31-10-2007, 17:02

شـــــــــــــــــــــــــديدة يا Talal ....
يا طلال العلاج ده هين ,رسوم بتدفع مقابل خدمة حقيقية كانت او وهمية ....
انا المجنانى وعامله لى صداع رسوم (المغادرة) ....يعنى شنو رسوم مغادرة ...؟مع العلم ان قيمة الticket تشمل الضريبة ورسوم المطارات ودمغات واى حاجة ممكن تتخيله ....
رسوم الجن دى يا طلال فى القاموس مافى ليها تصريف....

تخريمة ....

الحفرة هينه بس ما يطلع ليك كلب عامل زى فلينة الصقط ....

جومو كنياتا

bad boy · 31-10-2007, 17:42

في الاول مرحب بيك يا مان في المنتدي

و الله ما في اي شي اقولو غير ..........

اني اقف بكل نا عندي و اصفق لك اعجابا"

بلجد ممتع و طريقة سردك رهيبه بلجد

تخريمه لفي زول جديد بي زقاق مرشوش ...........

في الاول حيرتني انا قلت يا جماعه السودان دا غيرو و لا شنو

هههههههههههههه

كل الحب و الود اخي الغلي

تقبل مروري ................

Talal · 31-10-2007, 19:00

اقتباس:

المشاركة الأصلية كتبت بواسطة جومو كنياتا

انا المجنانى وعامله لى صداع رسوم (المغادرة) ....يعنى شنو رسوم مغادرة ...؟مع العلم ان قيمة الticket تشمل الضريبة ورسوم المطارات ودمغات واى حاجة ممكن تتخيله ....

العزير كنياتا
فكرة رسوم المغادرة دي فكرة بعيدة المدى
ما ينقدر نفهمها نحن بفهمنا القاصر دا وهي كالتالي:
أنه الزول المسافر بيكون ناس الحلة أو الشغل أو البورداب عملوا ليه حفلة وداع وطقطقوا الشيرينق وفيهم من إستدان حق الشيرينق ومن زوغ وما دفع وفيهم من ينتظر
والزول الوحيد الما بيدفع في حق حفلة الوداع هو الزول المسافر صاح؟؟؟
أها حكومتنا ممثلة في الطيران المدني ولا المطارات ما عارف ما بتقبل الظلم
بتقوم تشيل الشيرينق من الزول دا وبترجعوا للجماعة كمساهمة من الراجل السافر دا!!!!
وقع ليك

تماماً زي ما قلت إنت أنه طالما أنا دفعت كل ما يلزم دفعه من رسوم لسفري ما هو البند الذي تخرج من رحمه هذه الرسوم؟؟؟
وأجمل ما في الموضوع بيحصل فيها زيادة كل فترة!!!!
وكأنما هنالك خدمة أو أنها تؤدي غرض

اقتباس:

المشاركة الأصلية كتبت بواسطة bad boy

في الاول مرحب بيك يا مان في المنتدي

في الاول حيرتني انا قلت يا جماعه السودان دا غيرو و لا شنو

ركز معانا ياخ !!!!
في الأول ياتا بالتحديد؟؟؟؟ مرحب بي أم السودان غيروه؟؟

شكراً يا جميل!!