كيف تثبت بعد رمضان !!!!

alsagri · 06-10-2007, 14:02

السلام عليكم ورحمة الله وبركاته ... الاخوة والاخوات الاعزاء اتانا ضيف كريم فرحنا جدا لقدومه استقبلناه بالدموع فرحا وهانحن نودعه بالدموع حزنا .... شهر من ذاق فيه حلاووة الايمان وحلاوة القرب من الله تمنى أن يكون كل العام رمضان .... اخواني من المحزن جدددا ان نرى اشخاصا يسعدهم جدا ان هذا الضيف سيذهب...
ياترى هل ادينا فيه ماعلينا هل ياترى نحن من المقبولين أم من المحرومين؟؟؟
سؤال اسأله لنفسك ,,, أيها المقبولون هنيئا لكم
أيها المحرومون جبر الله كسركم ولكم ان تبكو على انفسكم ...
نسأله سبحانه ان يجعلنا من المقبولين وان يختم لنا شهر رمضان برضوانه والعتق من نيرانه..
السؤال هنا اخواني
ماذا بعد رمضان ؟؟؟؟؟
الكثير من الناس بعد رمضان يعود للمعاصي مرة اخرى وكأنه يقول لرب العباد لن اعبدك الا في رمضان,,,
كل عام بعد انقضاء رمضان نجد المساجد وقد غادرها العابدون الا قليلا ... ومن المشاهد ايضا انو المصاحف بترجع تاني للدولاب ولا للمخزن عشان لما يجي رمضان القادم نفتش عليها وننفضا من الغبار ... دي حقيقة ياناس ولا شنو ؟؟؟
والدعاء بيقيف وتبدأ تسمع الاغاني في الحافلات بعد ماكنت تسمع المحاضرات والقرآن كل صباح وانت في الطريق للعمل .... وحاجات كتيييييييييرة بتتغير وكل سنة بيحصل الكلام ده واتمنى انو مايكون واحد من اللي بيقرو الموضوع ده من هؤلاء .
في كلمة خطيرة قالها عدد من العلماء ياريت نسمعا بأذان صاغية
( من علامات قبول الحسنة الحسنة بعد الحسنة ومن علامات عدم القبول السيئة بعد الحسنة )بالله تأملو هذه الكلمات.....
ده معناها انت لو عايز تعرف نفسك من المقبولين ولا لا شوف نفسك بعد رمضان.... طبعا اكيد ماحتكون زي ماكنت في رمضان لكن قيس نفسك بالايام قبل رمضان وبعد رمضان فاذا وجدت انك تركت حاجات في رمضان وبعد رمضان رجعت ليها فأخشى عليك ان تكون من المحرومين أما اذا ثبت وتغيرت للافضل فانشاءالله انك من المقبولين

alsagri · 06-10-2007, 14:22

في ناس كتاااار سيعتقو في رمضان يارب نكون منهم
والعتق من النار فيهو معنى راااائع جدا .... ممكن تقول كيف يعتقني وبعد رمضان اعود للمعاصي مرة اخرى؟؟
يااخوانا العربي الاصيل اذا اعتق لا يأسر مرة اخرى فما بالك برب العباد واكرم الاكرمين واجود الاجودين بالتاكيد اذا اعتقك من النار ... مبرووووك فقد فزت بالجنة
صحيح انك بعد رمضان حتعصي ولكن من عتقه لك ان يجعل حسناتك تغلب سيئاتك وخيرك يغلب شرك بعد رمضان فأي فضل واي نعمة هذه .....؟
طيب ياجماعة رايكم شنو نعمل خطوات عملية كدة عشان نقدر نثبت بعد رمضان ونتفق عليها
طيب ياجماعة كلنا عارفين انو الجماعة الطيبين ديك حيفكوهم بعد رمضان ( الشياطين )
يعني في اخر ليلة في رمضان الجماعة بيجونا طايرين وطبعا بيكونو مليانييييين حقد علينا لانو عبدنا ربنا في رمضان واقمنا الليل وختمنا القراااان و....و......
المهم حيجو وكلهم قوة واصرار على انهم يوقعوك في اكبر الذنوب من اول يوم في العيد
عشان يضعفو روحك المعنوية ويصيبوك باليأس.
كيف ؟
يعني مثلا انت قبل رمضان كنت بتعمل الذنب الفلاني ولما جا رمضان قررت تخليهو نهائيا وربنا ثبتك طول رمضان بس اول مايجي العيد الشيطان يوسوس ليك ويصر انك تعمل الذنب ده لأنك اذا عملتو في اول يوم بعد رمضان عزيمتك حتموت وتقول مافي فائدة مابقدر اخلي الذنب ده ويبقى مجهودك اللي عملتو في رمضان كللللو ضاع هباء منثورا من اول يوم بعد رمضان...
الشياطين حتحاول تضلنا وترجعنا للحالة السيئة الزمان وحيحاولو بكل طاقتهم انهم ينجحو في اول الايام بعد رمضان وده مشهد متكرر معاي ومعاك ومع ناس كتار كل عام
عشان كدة اول حاجة مطلوبة مننا للثبات بعد رمضان
هي مجاهدة الشيطان بقدر الامكان وبكل قوتنا خاصة في الاسبوعين الاوائل بعد رمضان.
في اية خطيرة اسمعوها جيدا قال تعالى ( وصدق عليهم ابليس ظنه ....)عارفين ظن ابليس شنو؟؟
بيظن انو ممكن يضلنا بأقل مجهود فبالله عليكم اوصيكم ونفسي بأن لانستسلم للشيطان خاصة في الايام الاول بعد رمضان حتى نخيب ظنو فينا
ودي اول نصيحة ...

alsagri · 06-10-2007, 14:39

النصيحة التانية .... في 5 حاجات لازم نعاهد نفسنا اننا نحافظ عليهم بعد رمضان بكل مانستطيع من قوة ,,,خاصة في الايام الاولى بعد رمضان ونواصل عليها باذن الله
أول حاجة : المحافظة على الصلوات الخمس في المسجد للرجال والصلاة في اول الوقت للنساء...
بالله عليكم خلونا نبقى جادين شوية من المؤسف انو العبادة حاجة طارئة في حياتنا والمصية حاجة عادية .. ليه مانقلب الاية ونخلي المعصية هي الحالة الطارئة والعبادة والتقرب الى الله هي ديدننا ؟؟
يللا شدو الهمة
لازم نحافظ على الصلوات الخمس في المسجد ولو ماقدرنا في المسجد نحافظ عليها في اول الوقت اوكي اتفقنا ؟؟؟؟
تاني حاجة : أبدا ختمة جديدة من اول يوم في رمضاااان
( طبعا حمرت لي عيونك ) نبدأ ختمة جديدة بعد رمضان عشان نثبت للشيطان انو خلاص ماحيقدر علينا تاني وانو حنواصل قراءة للقران ..يللا نبدأ انشاءالله بي صفحة واحدة كل يوم .... ماضروري تختم في شهر ,, المهم يكون عندك ورد يومي للقرآن ماتخليهو ابدا ابدا
رايكم شنو؟؟؟؟
تالت حاجة: اذكر الله تعالى ولو 5 دقائق فقط يوميا ,, يعني اجعل لسان رطب بذكر الله وانت ماشي للعمل او للجامعة وانت في انتظار حاجة معينة خلي لسانك شغال ويلهج بذكر الله والله اذا عودنا السنتنا على كدة خلاص حتبقى تلقائيا بتلقى نفسك شغال : سبحان الله ,, لا اله الا الله ,, الله اكبر ,,, الحمد لله
رابعا : ادعي ربنا سبحانه وتعالى كل يوم .... يللا نعود نفسنا على الدعاء ياجماعة مافي زول مامحتاج انو يدعي رب العباد ومن المحزن اننا لانلجأ ليهو الا في الحالات الطارئة حتى اذا نجانا نسينا الدعاء
الحمد لله رمضان عودنا على رفع الاكف لله تعالى فلازم نحافظ علي النعمة دي انشاء الله 5 دقائق يوميا
خامس حاجة واهم حاجة لأنها لو مااتحققت الفاتو ديل كلهم مابتحققوا : ابحث عن صحبة صالحة واترك الصحبة السيئة,,, تأكدو تماما اخواني مهما بلغت درجة من الايمان كبيرة وكانو اصحابك اصحاب سوء ف والله لن تثبت وحترجع للأسوا مرة اخرى ,, الشئ الوحيييد اللي بيخلينا نلتزم ونحافظ علي الحاجات الفاتت اننا نصاحب صحبة صالحة.....
يللا يااخوان رايكم شنو في الكلام ده حنقدر نطبقو ؟؟؟

alsagri · 06-10-2007, 14:48

النصيحة التالتة والاخيرة :
اجعل خدمة الاسلام ورفعة الاسلام همك الاساسي
ياجماعة نحن مشكلتنا انو خاتين الاسلام ده حاجة كدة ثانوية وكتيرييييين مننا ماشالو هم الدين ولا حصل سأل نفسو مرة واحدة .. انا كيف ممكن اخدم الاسلام
بتقول لي مافي حاجة اقدر اعملا .... او تقول لي وريني حاجة اعملا ؟؟؟
لكن ديل مابتقدر تحددهم الا انت لأنك ادرى بامكانياتك فكل انسان له ميل لشئ معين... لو كنت شاعر شيل هم الاسلام وانصرو بشعرك ولو كنت فنان انصر الدين بفنك ولو كنت رسام انصرو برسمك ولو كنت طبيب انصروا بأبحاثك وبجودة عملك ولو كنت ..... ولو كنت......
الاسلام والله محتاج لينا جدددا ,, نحن ابناؤه ونحن الشباب حرااااام والله تعدي مرحلة الشباب دي من غير مانعما حاجة كدة نقابل بيها ربنا سبحانه وتعالى...
ولك ان تسأل نفسك تخيل لو ان الحبيب صلوات ربي وسلامه عليه ينظر اليك هل حالك سيسره ؟؟؟
هل عندما تأتي يوم القيامة سيناديك ويقول لك يافلان تعال اسقيك من يدي شربة هنيئة لاتظما بعدها ابدا أم انه سيقول لك سحقا سحقا بعدا بعدا
إخواني واخواتي هذا كل مالدي واتمنى ان تكون كلماتي هذه ذات تأثير ويارب ربنا يتقبل مننا جميعا صيامنا وصالح اعمالنا ويثبتا بعد رمضان وان لا يطردنا من رحمته ....آمييييييييين
لاتنسونا من دعائكم....

monytop · 08-10-2007, 08:29

جزاك الله عنا خيرا

وربنا يقدرنا ويهدينى ويهديكم يارب

اسال الله ان لايحاسبنا بزنوبا فرحمة تنزل اللينا ونحن

نعصيه .