قرنتية

Zankal · 27-09-2007, 18:47

قرنتية …

قرنتية ..
لا دبابة برمائية .
لا جاسوسة مدسوسة .. لا غواصة روسية .
جندية في "حركة" .. لا مختلسة مال شركة . لا
لا قصفت حدود "فشَلا" .
لا كسرت صريف كسلا .
لا معروفة ختمية .

قرنتية ..
لا صعلوقة لبست "شورت" .
لا بتعرف شنو البظبورت .
لا محتاجة جنسية .
هي قايلة النيل سقِف بيتها ..
وقايلة ضِفافو "محمية" .
جات منسابة عز الصيف ..
قايلة الناس بِكِرمو الضيف ..
وقايلة النيل أمان والقيف ..
وقايلة "الحاضرة" عصرية .

قرنتية ..
جات بصغارها دايرة الخير .
لا شافت يٍفَط تحذير .
لا نزحت تكوس توزير .
لا جاطت حركة السير .
لا دارت وسام تقدير .
لا مستلفة عشرين وش .
ولابتعرف تعيش بالغش .
كان محتاجة بس للقش .
وجات أحلامها دوغرية .

قرنتية ..
لا بلعت عديل السوق .
لا نضمت بدون طايوق .
لا كنزت دهب أو ماس .
لا ظلمت بدون احساس .
لا عصرت شباب الناس .
لا كتمت على الانفاس .
لا قطعت عشم بي فاس .
لا داستنا زندية .

قرنتية ..
لا دست سلع في الخيش .
لا شربت مريسة عيش .
لا ضبطوها في التفتيش .
لا خانت قسم او ديش .
لا اجتمعت "بمستر جون" .
لا أكلت "مؤنة العون" .
لا سدّت علينا الكون .
لا سبت كتاب أو دين .
لا سامتنا حمرة عين .
ولا باعتنا ضهرية .

قرنتية ..
جات مشتاقة للخرطوم .
تزور أحبابها خايفة اللوم .
تصيح وتنادي بالحلقوم :-
"جنينة النزهة" وين يا زول .
"جنينة النزهة" وين يا زول .
لقت حال الجنينة خلا .
حليل زمنها وحليل أهلها .
لا قرنتية .. لا أصلة .
لا صوت ككّو .. لا بغلة .
لا حلوف .. لا أسداً مهاب بالخوف .
لا نمراً يشد للشوف .
لا ضل فيل .. لا تيتل جريهو جميل .
ولا غزلان .. ولا طاؤوس يباهي النيل .
لا زفة طيور ونعام .
لا نمراً دفر قِدّام .
كل الشُلّة ياقرنتية غمضة عين ..
أحالوهم لصالح عام .
تقول الدنيا "مهدية" .

قرنتية ..
جات زي ضيفة ما غارة .
لا محتاجة لي فيزا .. ولا تصديق على زيارة .
جات والشوق دموع حارة .
تجدد في العيون الشوف .
بين توتي وعلالي أبروف .
قايلة الدنيا لسة سلام ما خيم زمان الخوف .
لسة هناك ضفاف حرة .
ما مطمورة للمُرّة .
قايلة الناس بعزو الضيف .

ما بسوقوهو لي حفرة وجوار القيف .
ما بياكلوهو في الصفرة ومصيرو مخيف .
قايلة الحاضرة ما غابة .
وقايلة حقوقها محمية .

قرنتية ..
لا قدلت في شارع القصر .
لا حامت في وكت الحظر .
لا خشت على المأمور .
ولا نطت سلك أو سور .
لا دخلت على أمد رمان .
ولا كسرت قفل دكان .
لا دفرت على التلفاز ..
ولا عضّت كراع فنان .
لا ذاعت بيان للناس .
لا احتلت كمان "حيشان" .
ولا نصبت شبك للحشّ .
جات بصغراها كايسة القش .
تلاقي القوت صبح محظور .
وخير البقعة جوة السور .
سماحة الدنيا منسية .

قرنتية ..
لا بتعرف عجن أو لخ .
وجات احلامها دوغرية .
عجب … ساقوها جوة الفخ .
عجب … من طولها وقعت تخ .
عجب … سلخوها صبحية .
عجب … ونحنا بنسلخ الانسان ..
كيف ما نغدر الحيوان .
عجب … والدنيا عصرية ؟!

قرنتية ..
لا دبابة برمائية ..
لا جاسوسة مدسوسة ..
لا غواصة روسية ..
لا جندية في حركة ..
لا مختلسة مال شركة ..
ولا حزبية بعثية ..
قرنتية !!!

bad boy · 28-09-2007, 15:44

وين اسم الشاااااااااااااااااااااااااااااااعر يا مان

دي كمان بتاعت ..... الرائع دوما" .... الاستاز

هاشم صديق .......... و النص دا كان بي مناسبه

ان و في مره من المرات و في شاي ابروف تم القبض علي

قرنتيه و كان ذالك في الخريف ..... و تم قتلها .... و علي ما اعتقد

تم بيع لحمها كمان .... عليكم الله دي بلد

الموضوع بتاع كتلها دا كان موضوع كدا الفتره دي .....

و بس هاشم صديق قام بي كتابة النص دا ......

ECHOO · 28-09-2007, 17:02

يبدو ان الشاعر اراد ان يسخر من المجتمع وكيف ان الناس قتلو القرنتيه في توريه انهم تركوا الحكومه الظالمه وهي احق ان تاكل .
بس لكن شويه كده مطه الموضوع ولا شنو مع كل الاحترام بالتاكيد .

Zankal · 28-09-2007, 20:46

7elmak 3li ya bad boy alna9 da qdeem o kida

u3ni qabli ma atoop o kida

6ab3an ana banzil alna9 o ostazy badboy befasero
a7yeek wallahi ya badboy

thanx echoo lilmroor lakin a'6in alma6 da wajib 3ashan uwa6i7 fada7t aljareema almortakaba b3deen law la7'6ta betlaqeoo enoo alna9 etnawal aktar min maw6oo3

حسن فاروق · 03-10-2007, 13:10

القرنتية مسكينة خربوا علاقاتنا مع المجتمع القرنتيتي ساكت
أسي شوف من الوكت داك تاني مافي قرنتية جات ولا عابرة
المياه الاقليمية بتاعتنا بالغلط أقول ليك سر حتى سفارتم
القفلوها زمان مافكروا يفتحوها تاني إلا بس بقت علاقات
إجتماعية وصداقات فردية وبعداك قامت فاردور ومعركة بني
جنجود وكونت الاسود تحالفا سمته حرية الاسود وحقوق
عدلان ومساواة فلان ودا كلو نكاية في موتة القرنتية قصة
تسغرب المخ وتمخول العقل .

عروس الرمال · 03-10-2007, 16:37

القرنتيةرائعه من روائع الحردلو على ما اعتقد

Zankal · 03-10-2007, 19:15

thanx ya 3roos 3la almroor lakin qarenteya de 7aqat hashim
9deeq

Zankal · 03-10-2007, 19:18

اقتباس:

المشاركة الأصلية كتبت بواسطة حسن فاروق

القرنتية مسكينة خربوا علاقاتنا مع المجتمع القرنتيتي ساكت
أسي شوف من الوكت داك تاني مافي قرنتية جات ولا عابرة
المياه الاقليمية بتاعتنا بالغلط أقول ليك سر حتى سفارتم
القفلوها زمان مافكروا يفتحوها تاني إلا بس بقت علاقات
إجتماعية وصداقات فردية وبعداك قامت فاردور ومعركة بني
جنجود وكونت الاسود تحالفا سمته حرية الاسود وحقوق
عدلان ومساواة فلان ودا كلو نكاية في موتة القرنتية قصة
تسغرب المخ وتمخول العقل .

da shnoo da ya 7asan shaklak kida '9arbta leek 7aga o geet 9a7 ?
?
kkkk
lol

حسن فاروق · 03-10-2007, 20:58

اقتباس:

المشاركة الأصلية كتبت بواسطة Zankal

da shnoo da ya 7asan shaklak kida '9arbta leek 7aga o geet 9a7 ?
?
kkkk
lol

haga x ramdan wallah min zaman ana agool int mn ismk zankal da bta3 7agat?