ليه احلامنا

elfatihshowaa · 18-09-2007, 12:23

ليه احلامنا تكون الامنا
وليه الامنا تكون احلامنا
ونحن بقينا مجرد دمعه
سايقه خطانا علي إعدامنا
بقت الدنيا مسارح آهه
شك خطاها الخوف قدامنا
لا واصلنا طريق الرجعه
ولا افراحنا بقت تغشانا
والاحساس الصادق دائماَ
هو المبيوع في سوق الحاصل
ومهما كان الواقع قاسي
تلقى الناس لساها تجامل
تبكي عشانك
ومرات تضحك
وجوك في الاخر باعو حواسك
وجردو روحك من انفاسك
ولمن ترجع تاني اساسك
تلقى الناس البشتنو عيشتك
هم من ناسك
ونفس القلم الياما كتبلك
قاطع راسك
وآخر زول تتخيلو خانك
زول من قلبك شارب وناهل
وكل الحاصل تحصيل حاصل
تصبر لامن زيتك يطلع
تطلع انت وزيتك قاعد
ولسه الواقع ياهو الواقع
ناس بتصارع
وناس بتباصر
وناس بتحلحل
وناس بتربط
وناس بتفتق
وناس بتلتق
دون ما تتحقق أي منافع
الاّ بنامل انو الباكر يصبح
احسن من الليله
والالام الفينا انغرزت بكره
نقول يابت يا حليله
لا حزبيه ولا لونيه ولا عرقيه
وغايتو بنحلم إنو الحاصل يوم يتغير
وهوي يا بت ضرَّاك احساسك
يوم كراسك جنن راسك
حسن الشاطر نسى فاطِمتو
تحت الغول النايم وصاحي
وعزمك قعده وبيره وفمتو
وهو ما لاحقكم وين ما كنتو
وين ما كان الغول في الدنيا
قصدو شريف في الاخر برضو
وما ضراك يا بت غير قلبك
يوم نسّاك الزول الرادك
وباعك خرده بلا احساس
وشال من سِبَحِك
نور اورادك
والله ارادك
تبقي معاي في الدنيا الواسعه
وغايتو عموماً
درب الريد يابت ما دربك
عرسي ساكت دون احساسك
وجردي قلبك
ولو تنسيني بقول كضابا
ومهما كان عرستس وفتي
وزي ما قتي
ما الحُب الاّ للحبيب الاولي
فتركتني قد جاء دورك فاقبلي
واستحملي هذا جزاء العاشقين
واستحملي كيْ العشق
جرح اليتاما الياما ماتو من العذاب
وان اصلي عارف في النهاية
ما بملا عينيك التراب
واتيقني انك قمر
كان في حياتي وهسي غاب
وانا بكره بعشق زوله اجمل من عيونك
زوله زي قلبي الحَلفْ
في الريد يقاسي وما يخونك
زوله دونك في الخداع
زوله تبقالي الشعاع
زوله بي كل الحنان
تغمرني وتزيل القناع
زوله ما بتعرف ضياع
والضياع الجاني منك
ما بقول يغشاك برضو
ما لانك كنتي قلبي
وكنتي شوقي وكنتي نبضو
بس لانك كنتي زاد الريد وفرضو
وفي الحقيقه الريده قسمه
ومافي ايد في الكون تعارضو
ومهما كان الزول هو خاسر
في النهايه بلاقي ارضو
والله خايف لما تمضو
وفي الحياة الزوجيه تمضو
تنفتح قدام عيونك
من جهنم الف طاقه
وتبدا تتدهور حياتك
وتنفقد سبل العلاقه
وتاني ترجعي تفقديني
وفي دواخلك تكتبيني
وفجأة القاك في حياتي
جايه تحفري لي مماتي
والحقيقه الغايبه عنك
اني اهديت المشاعر
لي حبيبه براها زاتي
ومن حشايا وزكرياتي
انا.................
ما زمااااان بوخت حبك
وابتديت مشوار حياتي ٍ
واصلي ماشي بدون حنانك
وما بخاطر يوم عشانك
كان زمان جواي مكانك
الا هسي الخاني خانك
والقدر واقف معايا
وما مهم كان فيك غنايا
اصلو عينيّ من وجودك
فتحّن صارن عمايا
حقو تنسي اني ممكن يوم اخونا
ما الغرام الفي عيونا
خلي ريدك يبقى دونا
واحتوتني واحتويتا
يوم لقتني ويوم لقيتا
وفيني ظاهر برضو لونا
ما ها زيك زول خادعه
اصلي زولا حبيب قساها
وكاسره في اضلاعي ضلعه
زوله انسانه وخدومه
ولما تقسى علي دنيا
بلقى في جوفا الاموما
ومن همومي تشيل هموما
والعلاقه البينا اسمى
من تجافيني والوما
وديمه بالاشواق تجيني
وتبدا بي كلماتي يوما
ولما تعلن لي قدوما
نفسي بالاشواق تددفق
وتتبتسم تظهر نجوماٍ
وتنعكس جواي مباهج
وديمه زايد فيني كوما
وانتي يالساكالي مالك
بكره ترجع تاني حالك
ويفقد الزول احتمالك
ما السعاده الكنتي فيها
وجلسة الروح في حبيبا
ماف قروش تقدر تجيبا
والسعاده المني كانت
ياما زادت فيك هانت
وفي النهايه الريده خانت
والحصل مكتوب علينا
انتي في دنياك تايه
وقلبي تايه في حبيبه
انشاء ما يفقد طريقه
واصلي ما بفقد طريقه
مش هواي انا ديمه وافي
وانتي ما عارفه الحقيقه
اصلي زول مليان محنه
وقلبي جنه
وما بفرط في البريده
ما البريده هي زاتا جنه
بت رحيقه كما بريقه
ساكنه في اعماق عميقه
زوله بتقول الحقيقه

silver · 19-09-2007, 14:09

خالص التحايا أخي elfatih وأنت تمزق صمت الدواخل وتمتطي صهوة الكلمات لتقتفي فينا أثر التواجد والحضور , وتشعل في صحرائنا ناراً نأنسها لنجد بالقرب منها بقايا وجدٍ قديم لحبيبة باعت لعسس السلطان فستانها لتعيش على ما يلقى إليها من بقايا العشق المستهلك.. وثورة شمس أخرى تأتي من خلف أكمام السحاب لتعلن في دواخلي أنها شمسي الأخرى التي اذوب فيها حتى الثمالة , فلا عجب إن أحرقتني شمسي لأنه لو لم تكن الشمس تحب الطبيعة لما منحتها الحياة فأنا أحب شمسي عندما تحرقني.....
شكراً أخي لأنك أخرجت من دواخلي مالم أكن أنوي إخراجه حتى لنفسي فأنت بحق رائع بقامة التواجد ومتفرد كنكهة الإرتياح......

محمد الامين عبدالرحيم · 20-09-2007, 22:32

متعة زمااااااااااااااااااااااااان

وشعر زماااااااااااااااااااااااان

وجدان ملاااااااااااااااااااااااان

شبعان حنااااااااااااااااااااااان

وآآآآآآخ

يا قدر

الله يديك العافيه يا الفاتح

طلعتا انا و زيتي قاعد هههه

عاشقةالرومانسية · 20-09-2007, 23:18

ماعارفه اقولك شنو
بس كلماتك في غاية الروعه وقمت الاحساس الرائع
بجد كلماتك روعه
والله لايحرمنا من كلماتك والى الامام دوما

nusa · 22-09-2007, 19:33

ابداع واكثر واصل لي قدام واتحفا بقلمك

الفنان · 23-09-2007, 11:55

اقتباس:

ليه احلامنا تكون الامنا
وليه الامنا تكون احلامنا
ونحن بقينا مجرد دمعه
سايقه خطانا علي إعدامنا
بقت الدنيا مسارح آهه
شك خطاها الخوف قدامنا

جميل .. جميل .. رائع أخ الفاتح كلمات تتمتع بالعمق والإيقاع السريع الأخاذ الذي يشبه دواخلنا .. ودعني أقسم هذه القصيدة إلى مقطعين أو قصيدتين الأولى تحكي واقعاً عاماً بأحلامه وآهاته وإيقاع ضبر الحصان السريع أو بحر المتدارك ..
ولسه الواقع ياهو الواقع
ناس بتصارع
وناس بتباصر
وناس بتحلحل
وناس بتربط
وناس بتفتق
وناس بتلتق

والمقطع الآخر والذي يتحول فيه إتجاه الريح إلى العشق الخاص الحبيبة ومن عبارة (ما الحب إلا للحبيب الأول) :
وانا بكره بعشق زوله اجمل من عيونك
زوله زي قلبي الحَلفْ
في الريد يقاسي وما يخونك
زوله دونك في الخداع
زوله تبقالي الشعاع
زوله بي كل الحنان
تغمرني وتزيل القناع
زوله ما بتعرف ضياع
كما يتحول الإيقاع فيه إلى بحر الرمل (متفاعلن) وهو كذلك سريع سرعة اللهث في النفس ..
أخي الفاتح الكلمات تدق في الأعماق وحتى العشق عندك يأتي عنيفاً .. لك كل التحيات والود
وداوم لإثراء الأدبي ..