حلف بالله مابنساك
حلف بالله مابنساك
حلف بالله أشيلك ذكرى في الخاطر
أقولك حجوة للاطفال
أشيلك نسمة في الاسحار
حلف بالله مابنساك
** ** ** **
أذكرك أطيِّب الخاطر
وأمسح لليتامى الراس
أذكرك أساعد المسكين
واكون فوق القبيلة الساس
وارفع في الضعيف لافوق
واحمد زين إله الناس
دة بي ذكراك حلف بالله مابنساك
** ** ** **
ولا دمعاتي غالية عليك
ولا سهر الليالي غريب
على زولاً ضهب في اليم
يفتش في دريباً راح
حلف بالله مابنساك
** ** ** **
ولابنسى السنون براق
يضاحك فوق جروف النيل
ولا بنسى الحنان في الإيد
بتمسح والدموع بتسيل
احس بالرعشة من قدميّا لي راسي
وعليكي اميل
تتكليني وتسنديني
وعليكي اقيف أشد الحيل
حلف بالله ما بنساك
** ** ** **
أشيلك نغمة فوق بتي
أناديلك صباحي سعيد
وأناديلك مساءي سعيد
وأناديلك وأقول للدنيا ديك بتي
تعالي علي .. تجري علي
أشيلة علي .. وأضمها لي
وأقولها ياصباح الخير
مساء الخير وكل الخير
تعالي علي.. تعالي علي
وكيف أنساك واسمك فوقا متل الضي
حلف بالله مابنساك
** ** ** **
وكيف أنساك
وبشوفك في نجوم الليل
بشوفك في جري الجنُّون
بشوفك وإنت زهرة فُل
بشوفك في سماحة النيل
بشوفك وانت شجرة ضُل
بشوفك جنة للعشاق
بشوفك واحة للتعبان
وانت الدالِ للضهبان
بشوفك في الشجر أخضر
بشوف وإنت غيمة خير
ترشي تفرهدي العطشان
بشوفك طالعة من القيف
بشوفك فوق هجير الصيف
بشوفك في مسارب الضي .. بشوفك ضي
بشوفك إنت في كل شي
وكيف انساك حلف بالله مابنساك
** ** ** **
اشوفك في قعِِدت الشاي
وأشوفك والفطُور حين جاي
واحسك في البرد رعشة
واشوفك في الخريف شاشاي
وفي غصن الفريع قوقاي
واشوفك انت في كل شئ
لانك انت في جواي
وكيف انساك حلف بالله مابنساك
** ** ** **
واشوفك في صباح العيد
واباركلك جديد وسعيد
واحسك في الضلام همسة
واحسك بين ايدي لمسة
واحسك انت في كل شئ
وكيف انساك حلف بالله مابنساك
** ** ** **
واشوفك كل صباح يطلع
تسالمي النْاس تقالديهم
واشوفك مرة زعلانة
تقولي لي دة ماهو كدي .. وليه هو كدي
اقولك ايوة ماهو كدي .. وليه هو كدي
وكيف هو كدي .. مادام قولتي ماهو كدي
وكيف انساك حلف بالله مابنساك
** ** ** **
وبي كامل قواي والروح
وبي كامل احاسيسي وكلي جروح
وبي طوعي
اعاهدك ياخريف الخير
اعاهدك يارفيق الروح
وديل البصمة بالعشرة من إيدي
ودة التوقيع (ابومصعب)
واعاهدك تاني مابنساك
وحلف بالله مابنساك
وهاكم إذني يالحاضرين اشِهْدو لي
ويكفي المولى لينا شهيه
مابنساك .. مابنساك
** ** ** **
اهداء خاص لآمنة تودا
حلف بالله مابنساك ( استمتع)
العرض العادي
