إحصائية العضو

قولو معاي


قولو معاي
لاني براي مابقدر
وانتو معايا مابقدر
اقول الميم معاها الشين
اقول مشتاق
** **
جريت عانيك تقول مجنون
عقابي عجاج وكلي ظنون
اقول بالله طاريني ووين حيكون
اريتني أكون مكان ما تكون
عشان ياغالية أشفي غليلي من عينيك
ومابقدر اقيف ياغالية انظر ليك
** **
اقوم أحتار واساسق ليك
وبعد أصلك واحس عينيك
اشوف إيديا ماشة عليك
تجيني الرغبة أعبر ليك
اقول والله مشتاق ليك
ومابقدر أقول والله مشتاق ليك
** **
وماعارف أكان بهواك
ولا السر جمال محياك
ولا وجودنا نحنا معاك خلق إلفة
يغلبك فرزو من الريد
وبنسى الناس وكت القاك
ومابقدر اقول السر جمال محياك
** **
أحاول أجمع الاحرف والملم فيها بي تلتيق
عشان أكتب رسالة قصيرة بيكي تليق
وأجيب كلماتي ليك اسوق
وما بقدر أكتب حتى كلمة شوق
وحاتك انتي مابقدر وحات عينيك
** **
أقول بطراك
أقول بهواك
أقول طول علي برجاك
أكون داير أقول يازاهية روحي فداك
ومابقدر أقول يازاهية روحي فداك
** **
جزبني اللون بياض أسنان
جمال الروح علو الشان
كمال الرقة والتحنان
حلاة مشية فريع البان
شقاوتي شقاوة بالبسمات
أريت لو كان ظهرت زمان
ومابقدر اقول ياريت أريت لو كان
** **
أشوفك ديمة إتذكر جمال الريف
فريع نديان
في ضل نخلة فوق للقيف رقد نعسان
صوت القمري صوت الموج
تراب تريان
وبحلم إني فوق للموج رقصة قمري في الأغصان
وبحلم بيكي نسمة جميلة من زولاً ودر ولهان
ومابقدر أقول والله بحلم بيك
** **
حلمي معاك متل حلم الصغير ياداب
جنب النيل بنالو قصر أساسو تراب
وكان فرحان متل حالتي
وكان عارف نهايتو خراب
ومابقدر أقول حلمان وماعشمان
** **
تخيل كيف تكون الفرحة من أطفال
تخيل انو امك جات تزغرد ليك
مع الشبال
تخيل وإنو إنت غريق وفجأة صحيت
وكت حلمان
تخيل فرحة المحروم وجابلو عيال
دة حالي معاك وكت القاك
وكان داير اطير بالفرحة من القاك
مابقدر أقول فرحان
** **
عشان بتذكرك بالحيل
متل لعبة بطان بالليل
حامو كتير وكاسو شليل
ولمن تعبو بالتفتيش
خلو اللعبة راسا عديل
ومابقدر اكوسك انت باقي الليل
ياكي شليل
** **
قولو معاي
لاني براي مابقدر
وانتو معايا مابقدر
اقول الميم معاها الشين
اقول مشتاق
1
1

اهداء خاص لام مصعب هيام

إحصائية العضو

إحصائية العضو

إحصائية العضو

إحصائية العضو

إحصائية العضو

إحصائية العضو

إحصائية العضو

إحصائية العضو

إحصائية العضو