نُفاس نفيسة لحس قريشاتي

vivid · 17-07-2007, 11:44

النصيبة المتلحاني في نومي دي شنو . . الشكية لي الله بقيت أشيل هم من النوم و غميد العينين . . المكاجرة دي بقت متلحاني في صحوي و في منامي . . يعني ما ننوم و الا شنو؟؟؟ . . الواحد بقى من يخت راصو في المخدة يحلم طوالي . . و حلم مشاتر خلاس . . كلو حلم مشربك و مسيوط . . الحلمة تبدأ في أمان الله . . فجعة تنساط و تتكوجن . . في اللوال كنت وكتين أحلم بي شيء بتحقق طوالي . . و فكرت أقوم أضرب لي طوب اخدر . . و ازرب بيهو أوضة سغيرونية عشان اعتكف فوقا . . و اخت مصلاتي و إبريقي و سبحتي . . و أقعد أحلم للناس . . و البعصروها لي . . أختها في جيبي لا أنضم بيها لا أجيب شوطا . . يعني على سبيل توضيح الأمور . . كنت وكتين أحلم لي بي زول عرس . . أمشي أبشرو بالعرس الموكد . . و أقول ليهو عروسك المرتقبة هي فلان بنت فلان . .و بعد يومين تلاتة من حلمي الظريفوني دا. . باب بيتنا يدق . . و أمشي أفتح الباب و أنا في حالة هدوء و سكينة . . ألقى زولي الحلمت بيهو مشحوط قدام خشم الباب . . هاشي و باشي و سدرو مشروح. . و يمد لي كرت الدعوة حق عرسو . . و يقول لي العشاء فوق نادي الظباط يا فيفيد . . شفتو كيفن؟؟؟ . . و كان حلمت انو عروسو في الحلم كانت شينة . . باكلها في حناني غمد لبد . . و أقعد أضحك و أقرقر براي . . و أقول . . و الله الجنا دا ورط جنس ورطة!!! . . و بكرة أشوف القرنتية قاعدة معاهو في الكوشة و كاتمة ليهو نفسو.
و كان لحقت حلمت لي بي زول مات . . أقوم إتصل بي الولية أم سلمة . . و أقول ليها . . هوووي يا مراة سيبي المحركة البتسوي فوقا دي . . قومي أمشي لي ناس فلان ديل . . ضايري معاهن البيت . . و كان عندهن عدة وسخانة غسليها معاهن . . ولدن دا الليلة بإذن الله بلاقي ربو الليلة . . البحر المشى يعوم فوقو دا . . الليلة ببلعو ليهن . . جبط . . و جنازتو بتطلع بعد تلاتة يوم . . و كراع ما فوقا . . يمكن يكون أكلها تمساح.
و الحمد لله كنت مرتااااح في حلمي . . كان شفت لي شي سمح . . و الشيء السمح دا كان عندي فوقو نصيب . . بمشي بعملو طوالي . . و كان شفت لي شي كعب بزوغ منو . . و أقول ليهو . . تلقاها عند الداقس.
الحكاية دي استمرت معاي لا أقول ليكن أربعة لا خمسة سنوات . . بعد شوية شريط المنوعات حق الأحلام . . قلب الجمبة التانية . . بقيت وكتين أحلم بي شيء ما بتحقق . . لكن بحصل عكسو . . بمكن حسدوني . . عاد الناس ما برتيح . . بتظكر اني حلمت بي خالي بلة قاعد في دكانو . . جاهو واحد وقوووووور . . ليهو كرشة و دقنو معشعشة لي عند سدرو . . راكب ليلى علوي . . قال ليهو . . يا حاج بلة . . انت راجل فاضل . . هاكا عكشة القروش دي حلحل بيها ديونك . . خالي بلة اتكيف . . خت القروش في طرف جلابتو و جا جاري بيهن البيت . . قبل الحساد يشوفوها . . و يقلعوها منو . . وكتين صحيت من النوم قالوا لي . . يا فيفيد انت لسع نايم؟؟؟ . . دكان خالك بلة سرقوهو الحرامية . . قلت ليهن . . وحات أبوي أنا من حلمت و شفت أب دقن دا خامي كرشتو قدامو . . عرفت ما فوقو خير.
السنة الفاتت . . حكاية الحلم بقت بتشكل لي مصدر ضيق و قلق . . بقيت كان نمت و جات حاجة قطعت لي حلمي . . شريط الحلم يقوم يعصلج . . و ما ينفكا عيلا وكتين أرجع أنوم تاني . . و وكتين أنوم . . الحلم يواصل في الحتة العصلج فوقها . . يعني كان حلمت لي بي زول مد لي يدو عشان يغمت لي قروش . . و أثناء ما هو مادي لي يدو فيها القروش . . قام زنقني بول و صحاني من النوم . . بقوم أمشي اللدبخانة أبول سريع سريع . . و أجي راجع متل الساروخ لي زولي المادي لي يدو في النوم . . و أتم نومتي و حلمتي لحدي ما استلم منو قروشي قبل يزوق بيها .
و كان حلمت لي بي زول طبزني في عيني . . و صحيت مع طبزة العين . . أقوم اقعد و اتمحن في بطن اللحاف . . و أحلف بالتقطعتني ما أنوم . . و لا أتم نومتي . . عشان كان نمت . . بشعر بي حشرة الأزبع في عيني . . تقوم عيني تحرقني و تتورم و تتنفخ و يقوموا يودوني الازبتالية.
الأزبوع الفات . . قصة الحلم دي اتطورت . . و بقت غريبة خلاس . . حلمي كلو بقى مغالتة . . غلات في غلات . . يعني كان حلمت بي زول عرس . . و يوم دخلتو و هو ماشي لي أوضة مرتو . . الحكاية تتلخبت عليهو . . يعني كان أوضة العروس كانت في الشرق . . يقوم يمشي لي أوضة حبوبتها في الغرب . . و يفتكرها دي مرتو . . و يمسكها يحضنها و يقول ليها . . هلووووووو عفاف الليلة أمانة ما ورطتي.
اها البارح الولية أم سلمة اتصلت بي . . قالت لي . . يا فيفيد هووووووي رسل (900.000) قوام قوام . . نسوان الحلة يتخاتتن في حق الصرفة . . و دايرة اشتري لي عدة لي نُفاس عمتي نفيسة . . و بتاع الدكان بقى يشوفني أربعة أربعة . . كان زغت منو بي التلاتة يقبضني بالرابعة. أها اليوم قمت نمت . . و كلام أم سلمة زاني لي فوق راصي . . و نُفاس عمتها مشيلني هم كبير خلاس . . قمت حلمت مشيت البنك . . و سلمتهن مبلغ و قدره (900.000) ربطة في خيت. . و موظف البنك بعد حسب القروش . . مسح شنبو بي مكر . . و بدل يكتب لي في الورقة تم تحويل (900.000) قام كتب لي تم تحويل (100.000) بس . . و استكرتني فوق (800.000) . . و قمت صحيت مهجوم و مخلوع . . و ركبي مسيبات . . و قلت دي ورطة جاهزة . . انا الراجل دا من مسح شنبو قلبي أباهو . . هسع الولية تستلم قروشها ناقصات . . و كان جيت راجع لي ناس البنك يقعدوا يغالتو فيني . . و قلت أحسن أرجع الحلم تاني . . عشان انضم مع ناس البنك ديل . . و أقول ليهن أنا حولت عبركم مبلغ (900.000) و ليس (100.00) . . لكن وكتين نمت . . ناس البنك قالوا لي خلاس قفلنا تعال لينا بكرة . . و بكرة نُفاس نفيسة عمة أم سلمة . . كان ما واجبتها . . الرماد كالني قبل يكيل حماد . . و تقول فيفيد الكلتان القليان استكتر فوقي مدت الليد . . لملم قريشاتو . . و أبى يرسل لي التقول أنا ولدت لي كلبة.
هسع أسوي شنو يا أخوانا . . كان فيكن خير . . سووا لي صندق فكوني من الحيرة دي . .

**هشام عوض** · 17-07-2007, 13:00

عوداً حميداً فيفيد الشفت ( جداً جداً ) ..!!
افتقدنا إبداعك الثر ..وكتاباتك الرائعة ..ونرجو ألا تنقطع .. ( مهما كانت الظروف ) ..!!
دمت بألف صحة و عافية ..!حسن !!

3ashg hana · 17-07-2007, 15:00

الجميل جدا"فيفيد الشفت لك التحيه ..

بتلك القصاصه قد تحيل بقية يوم متهالك إلى فرح حقيقي ..

فمرحبا" بك من جديد ... وفي أنتظارك .. هنا وهناك .. فلا تبخل ولو بالقليل ...

وكل أحترامي ..

عوض مجذوب عبدالماجد · 17-07-2007, 15:34

ود اعمي فيفيد

ياخ اولاً بالتبادي النقولك كيفنك وعلك طيب

وياربي مالك انقطعت مننا وبقيت تأبى علينا بجنس الكلام السمح ده

اها خسمتك بربك أكان تنقطع مننا تاني

اقعد معانا في ديوانا ده والله زهجانين وقرفانين وروحنا دي طالعة

وضليعاتنا ديل من شدة ما بتنفس بهن بقن رقاااااق زي المساويك

وما ظنيتك جنس الحالة دي بتدوره لينا

اها دحين اتفرجخ فوق كريعاتك المشققات ديل واهجص والزارعه الله

في صلعة هناي بتقوم

**Silent Storm** · 17-07-2007, 18:22

كالعادة إبداع × إبداع

روعه ما خطته أناملك يا رجل

تسلم يا شفت

vivid · 18-07-2007, 20:58

تسلموا يا شباب على المرور

و الشغل مانعنا من الطلة