نكورك ليكم ماتجو نجيكم تكوركو

معز مختار · 01-07-2007, 17:53

[طبعا هذا عنوان طريف وغريب في نفس اللحظة ولكن اقتبسته من اعلان لمسرحية سودانية بطولة الممثل محمد المهدي ،مناسبة هذا العنوان والموضوع انني تلقيت اتصال من صديق قديم من ايام الدراسة في جامعة الخرطوم في اول التسعينات مسأ امس وكانت مفاجاة مفرحة لي خاصة انني منذ التخرج اكثر من احدي عشر عاما لم التق به ، والصدفة هو ايضا خارج الوطن سايح مثلي في بلاد الله الواسعة ،المهم استرجعنا الذكريات القديمة من ايام الجامعة وعلي وجه الخصوص مغامراتنا وقصصنا الغرامية مع الجنس اللطيف في ذالك الوقت ، طبعا كنا (دنجوانات) عصرنا ،فسألني صديقي سؤال هل اولاد الجامعة الايام دي زينا زمان ولا مختلفين ، فقلت له اكيد مختلفين كثير لان هذا زمن الموبيل والمسج والقنوات الفضائية ، طبعا في عصرنا في بداية التسعينات الكلام ده كله كان ماموجود ، علي سبيل المثال اذا كان الواحد ناوي يتعرف بواحدة طالبة زميلته (كانت روحه تطلع ) علشان يتعرف عليها، فسألني صديقي هل طالبات الجامعة لسع مسكينات وخجولات زي زمان ، فقلت له لا اعتقد ، اعتقد انهم اكثر جرأة ، فذكرني بقصة حدثت لنا مع بعض (طبعا كنا دنجونات عصرنا)والقصة كالتالي:
[
انا وصديقي كنا نتمشي في المين رود (main road ) (وطبعا هذا االطريق الرئيسي للمكتبة بجامعة الخرطوم) وماعندنا محاضرات وشوفنا بنتين جميلات اول مرة نشوفهم وحبينا نتعرف عليهم ، ففكرنا كيف المدخل اليهم ،المهم بعد تفكير وتردد قررنا نعزمهم عصير (ليمون بزنس الشهير) لكن كيف نكلمهم ونقول ليهم اتفضلو اشربو عصير معانا ، فناديتهم : يا اخوات ثواني عايز اتكلم معاكم ... ياأخوات اتفضلو اشربو ليمون معانا ..... يأاخوات نحنا زملأ في جامعة واحدة ماصاح تطنشونا كده .......! ،البنات طنشونا ومشو اسرع ، ببساطة تنجاهلونا وهربوا مننا.

المهم رجعنا نجر اذيال الخيبة كما يقولون وفشلت الخطة . لكن بعد كم يوم وانا وصديقي كنا في الكفتريا وصادف شفنا نفس البنتين ،ففكرنا المرة دي لازم باي شكل لازم نتعرف عليهم فقلت ليه المرة دي مانكورك ليهم ونشتري اثنين عصير ونمشي ليهم دغري ونديهم كبايتين العصير ، واكيد ماحيحرجونا ويشكرونا وكده تتم المعرفة.
طبعا صديقي اناني قال لي: البنت الحلوة لي انا والثانية ليك انتا (الغريبة كانو الاثنين عسل) وانا اشيل العصير واقدمه ليهم ، لكن صديقي عنده شوية تهور مشي طوالي واشتري العصير وهو مضطرب جدا لانه اول مرة تقريبا ويبادر بالتعرف( لاني كنت دائما اقوم بالدور ده وهو يجي بعدين ويبقي سيد الموضوع)، اثنا ماهو ماشي امامي وشايل كبابي العصير لاحظت انه مرتبك وارجله بيضربه في بعضهم ، حسيت انه الموضوع مافيه خير ، وفجاة اول ماقرب من البنتين وهم بينظرو لينا ، اتعتر صاحبنا وكشح كبايتين العصير في البنتين طبعا البنتين كوركو بصوت عالي وملابسهم اتبهدلت وقالو ليه : عميان انت مابتشوف ، طبعا كل الموضوع فشل واصبح الموقف محرج جدا ، وعملت نفسي مابعرف صديقي ومشيت طوالي .
بعد كده اصبح كل ما البنتين يشوفونا مع بعض يهربوا ، وفي اللحظة ديك اقول: ليه انت السبب . يقوم يقولي: نعمل ليهم شنو يعني ؟نناديهم مايجو ..... نمشي ليهم يكوركو !قصدت من هذه القصة الطريفة ان اسأل سؤال مهم وخاصة ان لي سنين طوية خارج السودان ، هل الطالبة الجامعية اصبحت اكثر جرأة من الطالب الجامعي ام مازالت تلك البنت الخجولة ؟ هل الطالب الجامعي اصبح اكثر شجاعة من ما كنا عليه في ايامنا في التعرف بالجنس اللطيف؟ وهل حيلة العصير والعزومة موجودة ام هناك حيل وافكار اكثر تطورا ؟ وماهي المواضيع التي تدور بين الطالب والطالبة لمل يتعرفوا ببعض لاول مرة ؟ اكيد بيتكلمو في موديل الموبايلات والفديو كليب واشيأ هذا الزمان ! هل احاديث الاكاديمية لها دور في الحوار زي ماكنا نعمل زمان مثل كتبتي المحاضرة الاخيرة او حضرتي اللاب , ولا احاديث اخري غير هذه ؟

اخوتي ارجو ان تجيبو لي علي هذه الاسئلة علشان نشوف زمنكم في مجتمع السودان اليوم كيف اتغير عن زمنا سابقا خاصة انا لي سنين خارج الوطن الحبيب .
مع حبي لكم جميعا

**رغــَــد** · 01-07-2007, 20:26

اخي معز

والله ضحكتني جدا قصتكم ..

دي الحالة "دنجوانات عصركم" .. صاحبك يتشلهت كدا ويدفق العصير وانت تعمل رايح

بالنسبة لي ما عندي اي فكرة عن الموضوع دا .. لأني ما درست في السودان..

لكن لو عايزني انظر ساي برجع تاني

batou · 02-07-2007, 14:50

سلامات .
يا ريت لو زمنكم كان زى زمنا هسى (هيهات ) .
قلت عاوز تعرف الحال واليك : درست فى احدى الجامعات فى الخرطوم ( كلية الاعلام والعلاقات العامه ) .
والله يا اخى بقولو الزمن اتغير لكن الزمن ما بتغير ( كل شىء فى مكانه الشمس والقمر والسماء والانسان والطبيعه ) ما فيهم حاجه اتغيرت ولكن اتغيرت طباع الناس وافكاره .
اتخيل يا اخى بعض من الفتيات للساعه الثامنه مساء بكونو قاعدين فى الكفتيريا .
زمان الواحده لو اتاخرت عند الجيران تجد ابوها ( مشقى حاله وقيامت قامت ) .
كان عندنا واحد زميلنا طريف جدا من (ابو حمد ) ومعانا زميله حياته كلها فى الجامعه ( علاقات ) ويمكن ما تحضر ولا محاضره , كان بقول ليها ( واحد للف... واحد للسف ........ واحد فى الرف... ) اتخيل يا اخى
الزمن دا فوضة المشاعر والتلاعب بها باسم0(الحب ).
زمان البنت لما الواحد بجى يتعرف عليها ( تجدها تتصبب عرقا وقلب بالله تقول عاوز يطلع من ضلعه ) .
اما هسى الواحده بقت على عينك يا تاجر ( ضحك ... وتشابك يدين ... وهمهمات... ).
بقى الحياء والخجل معدومين فى زمنا ديت , انت عارف انو البتستحى والبتخجل بقولو عليها شنو ( معقده ومتخلفه) .
و لو قلت ليك بيتناولو المواضيع الاكاديميه يبقى كذبت عليك , الحديث كلو .. الفنانيين .. والموضه ... وماركة الموبايلات .. والقنوات واخر افلام الروتانات ... الخ .) دى الحال فى جامعتنا احنا اما البقيه الله اعلم .

sudany ana · 07-07-2007, 12:34

والله العاقل يميز
نحنا بقينا في زمن يخوف.......... البت ما بتخجل .......... البعض يقابض.......والبعض........
تعالو للصرحة شوية سبق وأن تحدثت في موضوع مماثل لهذا ..... ولكن في كل يوم تزيد المحن والمصائب
فلا الشوارع شوارع ولابنات بنات ولا الأولاد.
غايتو زمن صعب.
ولنا عودة.
دمتتم