الجــــ أب قرون ــــــن

Sit_Elkisra · 17-06-2007, 21:35

ماذا لو حدث في يوم من الأيام أن كانت لديك فرصة لتحقيق أمنية صعبة كانت أو مستحيلة!؟... و تكفل لك بها الجن المدعو أب قرون... ماذا لو ظهر لك أب قرون في يوم من الأيام... و ليس بالضرورة أن تكون في أسوأ حالاتك أو أحسنها... و لكنك في حاجة لأشياء تنقصك.. وبالتأكيد ليس هناك شيء كامل... أنت ناقص و المجتمع ناقص.. فقط الكمال لرب العباد ..
لذا أنت في حاجة ماسة لأب قرون حينما يظهر لك!!...
لكن ماذا لو بالفعل كان أب قرون خليل أحدهم في ليلة من الليالي العادية .. كان هو يحضر نفسه للإستلقاء على سريره.. في تلك الليلة التي تشبه كل الليالي.. يستلقي على السرير و هو يحاول أن يضع خطة ليوم غدٍ ؛ عسى ولعل أن يستطيع إنجاز ولو واحدة او اثنتان مما يفكر في حينه!!
أغمض عينيه في محاولة لإستجلاب النوم ، و أخذت الأفكار العشوائية التي تفصل ما بين حالة الوعي و ذهابه تزاحم عقله.
كان وعيه على وشك أن يغيب عما حوله من أصوات الليل الهادئة الرتيبة ؛ لولا أن انتفض جسده فجأة ،، مما جعله يستعيد وعيه ثانية ؛ و تلقائياً بالنظر حوله بعينيين تستميتان للراحة... فإذا به يخال له أنه يرى ملامح شخص أمامه.. لكن أليست هذه الملامح غريبة! أم أنني بدأت أحلم!؟
كانت هذه الخاطرة تجول في رأسه إلى أن تبين أنّ هذا الشخص يحاول أن يدنو منه بخطوات رتيبة! ... حينما بدأ يحس بأن هذا الموقف غريب بدأ يحاول أن يستدرك وعيه التعب.. و إذا به يجد نفسه بكامل وعيه أمام شيء لا يمكن تسميته إلا بجنّي و ذي قرنين... لم يكن ظلام الليل و حتى ظلام الجنّي يسمحان بإستبيان بقية ملامحه الغريبة سوى أنه ضخم ، كثيف شعر الجسد ، و لديه قرنان معقوفان في رأسه و يصدر لمعان مخيف من حجري عينيه.
تفاجأ الرجل ؛ إذ يجد نفسه من حالة الإستلقاء تلك إذا به يقف على قدمين حافيتين.
-إنت منو؟
-أنا أب قرون.
-داير شنو هسع نص الليل؟
-إنت الداير مني!
-ياخوي لا داير منك لا داير مني... كتر خيرك وبارك الله فوقك.
-يازول أنا جيتك أحقق ليك أي أمنية دايرا... أي أمنية بس قول و أنا عبدك المطيع..
-هي!! عليك الله سيبنا .. والله بكرة عندي مليون شي داير أسويهو و نفسي أنوم شوية عشـ..
-أعمل حسابك يازووول .. لو إتمنيت أي شي قدامي هسع حاحققو ليك طوالي.. بس إنت خليك عارف إنو عندك أمنية واحدة و مجرد ما تقولا لي حتكون عندك..
كان يحرك عينيه في إتجاهات عدة لتوتره الشديد.. وإذا به يكتشف أن أب قرون هذا (مهوي من الواطة) يكاد لا تلمس قدماه الأرض ؛؛ بل هما فعلاً لا تمسا الأرض... ثم أب قروب هذا تستطيع أن ترى الأشياء خلفه ؛؛ بل حتى الأكياس البلاستيكية المزعجة التي تجوب سماوات الخرطوم تمر من خلاله كلما حركتها الرياح!!
كأن أب قرون يتمايل مع كل فكرة تخطر في عقل الرجل ... و تتحرك أطرافه بطريقة كما أنه يسمع حديث الرجل في أعماقه.. تضايق الرجل من تصرفات أب قرون المزعجة و تمايله في كل فكرة تخطر بسرعة في عقله..
-أب قرون ، إنت مالك بتتعولق زي القرد؟
-ماااا أنا مستنيك توريني أمنيتك..
قرر الرجل أن يترجم بأفكاره أنه لا يريد أمنية و أن حياته سعيدة و شكراً لك يا أب قرون.. كان يفكر في فكرته هذه و عيناه مثبتتان على أب قرون كمن يتحدث معه ؛؛؛ هنا إتلخم أب قرون و قال:
-على العموم أنا حلبي ليك أي أمنية تقولها إلا إذا أصريت على رأيك!
-أب قرون إنت بتقرا أفكاري عديل كده.. أنا ما نضمت!
-إنت لسة بتشك في قدراتي... وأنا مصمم إني أحقق ليك أمنية.
أحس الرجل أن القصة فعلاً توحي بالصدق...
-طيب يا أب قرون... أمنيتي دي مفروض تكون حسية والا معنوية؟
-أي شي تطلبه أنا بعملو ليك..
-لا يعني يا أب قرون إنت جادي كده... أي شي كده بس!؟ بالغت!
-أكيد أصلاً إنت عندك أمنية والدايرو بعملو ليك..
-أب قرون ما تهزر معاي... أفرض قلت ليك حاجة ما عجبتك .. كـ..
-يا عمممك خلصنا... ماممكن!! كلامي كان واضح.. شوف ليك أمنية.. بي أي طريقة.. حسية والا معنوية... على صعيدك الخاص والا مجتمعك والا العالم.. أنا قدامك .. لا تدع الفرصة تفوتك!
لم يستطع الرجل بحدسه التقليدي الشكاك أن يقتنع بفكرة الأمنية التي ستتحقق و أب قرون نفسه... كيف له أن يصبح في ليلة واحدة يملك أمنية قد تغير عليه حياته..
بدأ أب قرون في حركات القرود في كل فكرة جديدة تخطر في رأس الرجل...
لم يكن يعرف هل يتمنى أمنية تصلح حاله من الناحية المادية .. أم أمنية تساعده على النجاح ... ولم لا يختصر النجاح و المال و يجعلهما في أمنية واحدة... ثم ماذا إذا كانت الأمنية الواحدة هذه تشمل إصلاح له و لكل من حوله من أهل و أصدقاء... ماذا لو كانت الأمنية عبارة عن شيء واحد ناجح لكن سبب نجاحه هو و من يحبه و ويحبونه؟
أستدرك الرجل.. أن صلاحيات أمنيته الواحدة هذه قد تكون إصلاح للمجتمع... أو إعمار فيه و رقي في المباديء... ماذا لو تمنى ذلك!!؟
ولكن هنالك ماهو أعظم... العالم ... البشرية! كيف لم يفكر في بتر العادات و الصفات القبيحة و أن يعيش الناس بدون أي ضغائن!
كانت رأسه تدور و تعج بالأفكار... لم يكن يثبت على فكرة إلا و يفكر في أخرى... الجني أب قرون كان يحرك أطرافه بطريقة هستيرية!!
-ياخ ما تثبت على فكرة.. عذبتناا..
-براك شايفني ما قادر أحدد... إنت ما بتقدر تجيني بكرة ...؟
-أهاااا قمنا علي حركات المصالح الحكومية... أبيييت!
-والله يا أب قرون الحكاية ما هينة... أديني فرصة يوم بس ؛؛ بكرة نفس المواعيد.. إتفقنا؟
-لو ما كنت حاسي انو امنيتك دي حتغير الدنيا كان اتغاتت عليك و سويت قولة (أديني فرصة تانية) دي أمنية... بكرة!
ذهب أب قرون من هنا ، و تكرفس الرجل حول نفسه محاولاً أن يتوصل للأمنية التي ستصلح حال البشرية.. و تتخلص من الشرور.
لم ينتبه لنفسه و هو قد أمضى ساعات طوال محاولا التوصل لفكرة جيدة...
وبدأ يفكر فيما إذا حاول أن يغير في أشياء ربما بها تنصلح البشرية..
لم يبرح مكانه و لم ترمش عينه.. و في كل ساعة تمر ؛؛ يزداد لديه الإحساس بمسئولية الأمنية في كل شيء.. على صعيده الخاص و عمن ناحيتها كسلاح أكيد للتجديد...
و مع مرور الوقت هذه الأمنية تزداد أهمية في رأس الرجل... و كم هي إمتحان من الله عز وجل.
لم يكن الرجل يحس بما أو من حوله... كانت الأمنية تسيطر على كل حواسه.. أصبح في حالة مزرية و كل من حوله أقسم غليظاً أن من المستحسن من ذويه أن يدخلوه مصحاً عقلياً...
بالطبع لم يستطع الرجل الإيفاء بوعده لأب قرون... أتى أب قرون للرجل ليجده في نفس جلسة البارحة و لكن تبدو حالته مزرية..
-أب قرون!!! عليك الله أدينا مهلة تاني .. الزمة فيك الزممممة فيك.
لم يستطع أب قرون سوى أن يلبي طلبه في تأجيل اللقاء لأربعٍ و عشرين ساعة أخرى ؛؛ الرجل بدأ يفقد الإحساس بأي شيء... سوى إحساسه بأنه صاحب أكبر هم في الدنيا.. و رئيس جمهورية العالم ؛؛ عليه أن يصدر القرار الصائب حتى لا يقوم بما يغضب الله!!!
ظلت حالة الرجل في تدهور بعد المهلة الثانية... و إذا أب قرون يظهر..
-أب قرون! سنة يا أنا .. لكن ما لقيتك خواجة بس.. شوف يا أب قرون ..
أنا وصلت للأمنية خلاص!
-أحلف!؟ ياخ طلعت زيتنا ... بالجد يعني خلاص حتفكفك منك وأتحل ...
أها قول أمنيتك!!
-براحة كده يا ب قرون و من غير تنرفز... إنت متابع معاي مش!
-آاي..
-أنا ما داير أمنية... و كتر خيرك خلاص ما قصرت
-يازول.. إنت باين علي السهر و التفكير لحسو ليك مخك... كدي قول براحة!
-مـ ا د ا يـ ـر ... كده مش براحة..؟
-بسسس..! على كيفك..
لم يقتنع أب قرون بكم الأفكار التي كانت تجول في رأس (أخينا) يبدو أنه تعمّق في فكرة صلاحيات أمنيته .. لدرجة جعلته يهرب منها!...

يا ترى إن حظيت بمثل هذا عرض ؛ كيف ستكون ردة فعلك؟
و هل ستكتفي بأمنية تصلح شأنك الخاص... أم مشكلة تصلح شأن المجتمع الذي بالتأكيد سيؤثر فيك... أم ستحل مشاكل البشر أجمعين!!؟ و لماذا..!!؟

البرق · 17-06-2007, 23:12

والله كلاااااااااااام
انا ابوقرون دا كان جاني بقول ليهو عايز لي فكره للركن الخاص

..............................
لكن واضح انو حكاية ابو قرون دي نتاج لي الاحباط العام العند الشباب ....
اعمامنا وابواتنا الكبار سيطروا علي كل حاجه سلطه وثروه وتعليم
انا خايف يجيني ابو قرون ويقول لي امنياتك دي اتصرفت زماااااااان وكبار القوم ما خلوا اي
حاجه
انا شخصيا" بطني طامه جدا" لكن برضو ما حأنتظر ابو قرون ولا حامشي افتشو

الصريح · 18-06-2007, 00:35

والله يا ست الكسرة حريتيني زاتو بالموضوع دا لكن انا لو يوم من الايام وجاتني حاجة زي دي..

حاختصر الحكاية واقول ليهو اديني مهلة 24 ساعة اها اقوم ارتب الافكار في رأسي واقول ليهو

مش انت عاوزني اتمني امنية الوقت داك بكون رتبت الافكار في رأسي خلاص وعرفتا حأتمني شنو

طبعا مراعيا لكل الاطراف حأقول ليهو يا ابو قرون بأختصار كدة امنيتي ان الكب بفكر فيهو عاوزة يتحقق

عشان احيو ليك وبي كدة حأكون ارضيت كل الاطراف علي الصعيد الشخصي والاجتماعي والعالمي....

اها جاوبت ليك...

لو جاك انتي حتعملي شنو....

Sit_Elkisra · 18-06-2007, 00:54

البرق،،،،،،،،
بطنك طامة !!! هاكا الليمونة دي امصورا في خشمك!

الصريح،،،،،،،،
حركة منك ما بطالة يالصريح... و برضو كمان انت نظام تلعبو ... تقوليهو في فكرة في راسي دي امنيتي.. و هي تكون بلاوي زرقا عديل...

لو كان جاني أب قرون حعمل شنو؟؟؟

((((( حقولليهو : بــســـــــــــم الـــلـــــه )))))))

الصريح · 18-06-2007, 01:11

اقتباس:

المشاركة الأصلية كتبت بواسطة Sit_Elkisra

البرق،،،،،،،،
بطنك طامة !!! هاكا الليمونة دي امصورا في خشمك!

الصريح،،،،،،،،
حركة منك ما بطالة يالصريح... و برضو كمان انت نظام تلعبو ... تقوليهو في فكرة في راسي دي امنيتي.. و هي تكون بلاوي زرقا عديل...

لو كان جاني أب قرون حعمل شنو؟؟؟

((((( حقولليهو : بــســـــــــــم الـــلـــــه )))))))

بسم الله حرام عليك يا شيخة انتي لاقية انا بقول ان طريقتي دي احسن واحدة

امينة تكون شاملة وكاملة عشان الجني زاتو يتحير.

هههههههههههههههههههههه

لفتة جميلة منك يا ست الكسرة...

.

Sit_Elkisra · 19-06-2007, 16:21

الصريح... إنت راجل ظريف ياخ... في زول قالليك كده!؟

أقولليك شي .. أغريني بي أفكارك عشان إمكن أغير رايي و تفتح لي مخي كمان والا شنو؟؟

عموماً المعادلة صعبة ... و قد تخطر ليك فكرة إنو بما انو امنية واحدة أي الأفكار أكثر تأثيرا و فعلا بالجد دايرة ليها عفريت!!

البرق · 19-06-2007, 23:31

واضح يا ست الكسره انو عندك امنيه كبييييييييييييييييييييييييييره
ربنا يحققا ليك
وواضح انو اذا جاك ابو قرون ما حتقدري تقولي ليهو حاجه

لكن واضح اكتر انو الاماني الكبار اذا تحققت بين عشية وضحاها بتفقد معنى الامنيه

وواضح وواضح

تخريمه مهمه

واضح دي كترتها لاني بسمع في غنية يا سمرا يا واضخه

وااااااااااااااااااااضح كلمة حلوه مش؟

A.Abass · 20-06-2007, 10:32

ربنا يحقق جميع الاماني الطيبة ، ويكفينا شر الجن والجنون، ومشكور ست الكسرة

الصريح · 21-06-2007, 07:01

اقتباس:

المشاركة الأصلية كتبت بواسطة Sit_Elkisra

الصريح... إنت راجل ظريف ياخ... في زول قالليك كده!؟

أقولليك شي .. أغريني بي أفكارك عشان إمكن أغير رايي و تفتح لي مخي كمان والا شنو؟؟

عموماً المعادلة صعبة ... و قد تخطر ليك فكرة إنو بما انو امنية واحدة أي الأفكار أكثر تأثيرا و فعلا بالجد دايرة ليها عفريت!!

والله كلامك صاح لكن الاختيار فعلا صعب شديد...

لكن مش انت قلتي لي اغريكي يعني مصلا لو الجني دا جاء لي زول

شايل هم الدنيا كلها فوق رأسه وهامي لي اي بشر في الدنيا دي

اها دا يكون حله كيف...؟؟؟؟

حل بسيط جدا...يقول للجني عاوز اي حاجة انابتمناها

تحصل وبس....وبي كدة تكوني ريحتي ضميرك من كل النواحي...

اها قلتي شنو...؟؟