المغتربين وفساد حواء السودان

عزة محمد · 27-05-2007, 13:03

كلما ما اخش الماسنجر القى سؤال من واحد من اخوانا المغتربين صحي يا عسلنا بنات السودان بقو حاجة تانية صحي السودان بقى فيهو فساد 100% وحاجات تشيب الراس وسمعت انو الحكاية دي بيداولوها في مجالسم وانديتم العامة في دول المهجر الواحد خاتي في راسو انو اول نزلتو من المطار ح يلقى بنات حواء بالمايوهات وزجاج الوسكي منتظرين طلتو يا اخوانا الكلام ده عيب زي ما في الفساد في كل العالم السودان جزء من العالم ده وبتجتاحو رياح تغير كتيرة غصبا عنو وعننا وانفتاح الحريات والثقافات بقت هي البوابة الرئيسية وبدل ما تقعدو تلوكو في سيرة بناتكم وفسادن شوف انتو ممكن تحلو المشكلة دي وماتنسو انو البت الانتو بتتهموها بالفساد ماهي براها الرجال جزء اساسي في المثلث زو الاضلاع الثلاثة وبالجد حاجة تزعل خلو مشاكل البلد كلها وهمهم انو يلقو السودان فاتح ازرعو النسائية ويستقبل الجيل الكبتتو الغربة وحرمتو زمان العادات والاعراف من انو يندلق في بؤرة الفساد على العموم حبيت انبه انو سودانا بي خير وزي ما فيهو الطالح فيهو الصالح وكبرو فهمكم يا ناس عشان كدة نحن بقينا نعد العد التنازلي ومنو نقع في الهاوية وما يسمو علينا وسيبكم من الشرذمة الضالة القلة العايزين الناس بي افعالهم الشنيعة يلصقوها بالعافية على حواء السودان
ولكم التعتبى ان كانت كلماتي جارحة بس ده الحصل معاي وحبيت اتكلم فيهو ولا انتو رايكم شنو ليكم الحق تردو على الاتهام
ودمتم سالمين

jOojOo · 27-05-2007, 14:28

الاخت العزيزة عزة محمد........
بعد التحية......
المشكلة ياعزة أصلا ما من حواء السودانية ومافى زول اقدر اقول انها مصدر للفساد ,المشكلة أحنا السودانين بنحب تأويل المواضيع و تضخيمها بحيث تاخد حيز أكبر من حيزها .
تانى حاجة انو احنا ما اتعودنا نشوفا بالشكل الحالى دة (لبسها,حركاتها, جرأتها الزايدة عن اللزوم,بيع شرفها.......وغيره) زى ما عارفة... (أظن انتى معاى فى النقطة دى)...!!!
اضافة.......
بس انا داير أقول (كلنا عارفين انو فى الاونة الاخيرة دى بقت فى حاجات غريبة قاعدة تحصل مابتشبهنا ولا ممكن يوم الايام تكون فى المجتمع السودانى المعروف ب الكرم والعفة والشرف ....و.و.و.و.و.و...الخ ,و الما عودنا على كدة , ودى طبعا" راجعة الى تغلغل الحضارة الغربية في نفوسنا...(أخواننا وأخواتنا).وزى ما قلتى انو الفساد موجود فى أى مجتمع .., ليه نحنا تكون نفوسنا ضعيفة و نعمل زى ما بعملوا هم ( المجتمعات التانية)..!!!؟؟ليه نحنا ما نخليهم هم اعملوا زى ما نحنا بنعمل...!!؟ المشكلة ياعزة فينا نحنا و المشكلة نحنا ما معترفين بالحاجة دى.....!!! أرجو من أخوانى و أخواتى الأعزاء الوقوف على مثل هذه المشاكل ووضع حدا" لها, وتبقى الصورة زى ماهى (سودان العزة والكرامةو الشموخ.....).
واخيرا..........
ما زلنا ولا نزال نعتز بحواء السودان وندافع عنها بكل ما نملك من قوة في سبيل ان لا يذكرها أو يمسها احد بكلمة تطعن في شرفها
ولكى كل الود و الأحترام..........

الفنان · 27-05-2007, 17:59

الأخت العزيزة عزة
لك التحية على غيرتك وعلى عضبتك من أجل حواء ، وما حواء إلا أماتنا وأخواتنا وبناتنا ، وكما ذكرت فإن التعميم آفة الكلام فإن التعميم كذلك على المغتربين فيه شيء من الإجحاف ، فكل يرى بنظارته فكم وكم سمعنا مما سمعت وعند نزولنا ما رأينا الشيء الذي سمعنا عنه . فإذا كنت ممن يبحثون في هذا الإتجاه قطعاً ستجد مبتغاك وإن كنت من غير ذلك سترى أن الناس يقولون كلاماً هراءاً ..
ما نؤمن به هو المتغيرات الحاصلة على كل العالم كل بلاد الدنيا ، ولا نعفي السودان منها ونحاول جاهدين أن لا ننساق وراء التيار الجارف .
حفظك الله يا عزة وحفظ كل بناتنا من كل سوء ومكروه ..

**رغــَــد** · 27-05-2007, 20:17

عزيزتي عزة
المجتمع تغير واصابه ما اصابه من ثغرات نفذ منها كل مستهجن.. واصبح الكلام اسهل من التنفس..
فكل من تخيل شيئا يقوله ,, وكل من رأى الخطأ مرة.. ضربه في ألف (X1000).. وعممه...
ولكني ما زلت أؤمن ان السودان والسودانيات والسودانيين ما زالوا بخير..
وسيظلون بخير طالما يوجد مثلك اصحاب الاصل الطيب..
فجزاك الله كل خير على هذه الروح الغيورة الساعية للأفضل..

واخيرا لندعو الله بالستر دنيا واخرى .. (آميــن)

عاشق ألسمراء · 24-01-2008, 19:45

واخيرا لندعو الله بالستر دنيا واخرى .. (آميــن)

هو دة كل المطلوب أحسنتي يارغد
الفساد موجود وين ما كنا وكل متوقف على هوى النفس
فمن أراد الصلاح علية أن يصلح حالة ويكبح جماح نفسة
والأمر غير منوط بالتربية ولا بالشارع
فالصالح إن لم يضبط أهوائة فسيفسد لا محال
وكل الأسر تحسن التأديب لوليدها ولكن يفسد حين تنازعة نفسة
ليرضي هواها
وإن لم يستطع إنــــــــــــــــحرف وإنجرف