المعلقة السودانية / فيصل الدابي


المعلقة السودانية
الفار فرفر في الفروة
شابكنا يوماتي فتاوي
كم أرنب جوه الطاقية
مستني منديل الحاوي!
الحاجة اليوم تتحرم
وينكتلو علشانا شباب
تتحلل في اليوم التاني
ويقولو لي ناسا حباب!
الجن من جنو اتجنن
واتعوذ من الجايات!
***
والهون رفع التلفون
في لحظة ضرب البليون!
والهم واقف طابور
من تصبح ما نلقى فطور!
الفات فات في جيبو الكنجالات
من مافي ركب العربات!
جالوصو أصبح صرايات!
والفلة وقعت في البير
محروسة بي كم خنزير!
لا محاسب لا كشف حساب
لا ذمة لا إقرارات!
***
الحالة بس زي الطين
في جيبنا مافيش ملين
وأي سعر أصبح سعران
ما بنقدر ندخل دكان!
والسوق أصبح مطلوق
وأي قرش أصبح ممحوق!
يا حليلو زمن الضيفان
ما بنقدر نعزم إنسان
على فطرة بموية فول
لا جبنة فيها لا زيت
لا سلطة لا طعميات!
***
بترولنا بى نسمع بيهو
بس منو ما ضقنا ثمار
العائد أكبر مجهول
وتوزيعو سر الأسرار!
أفتونا يا مدنيين
ورونا يا ناس الجيش
لى جدادنا ما نلقى العيش
لى غنمنا مافيش برسيم
لو جعنا بس ناكل نيم
ونحلى بحبة قرضات!
***
عمّي على ضاق بيهو الحال
ساب مرتو خلالا البيت
عمّي على باظت أعصابو
وأخلاقو قطعت كم خيت!
عمّي على أصبح نقناق
ومين يسمع في بلاد الواق!
عمّي على ضاق خيرا زمان
والليلة ما شايف حاجة
بتمنى الماضي يعود
ويحكمنا من تاني خواجة!
لا وطني نافع لا أمة
لا حركة لا مؤتمرات!
***
الشافع بس الله معاهو
الشافع ما لاقي اللقمة
الشافع ما لاقي دواهو!
الشافع أصبح ضبلان
الشافع أصبح بكاي!
كرشوه من جوه الاوضة
طردوه من الديوان
حرموه من أي حلاوة
حرموه من باقي الشاي!
في العيد ما يشوف عيدية
بي عينو ما يشوف لعبات!
***
الطالب طالب من الله
كيف يصبح من الشطار؟!
كل همو بقى بس في بطنو
كيف يقطع كمين مشوار!
الجامعة يا حليل الجامعة
لا صفرة لا داخليات!
الجامعة يا حليل الجامعة
لا معامل لا مختبرات!
***
تلفازنا بوظ أعصابنا
النشرة زي حفلة ظار!
بيجاي واحدين بيكوركو
بيهناك بيدقو الطار!
النشرة مجروس متحرك
والعسكر يلعب بالنار!
فنانا أصبح هناق
بيغني غنا ما مفهوم
بيعكر جو أمدرمان
بيفور دم الخرطوم!
وعكليتة يقدم برنامج
طفشنا من السهرات!
***
في النظري طالعين الاول
في العملي طالعين الطيش
في الشارع أجيال بتضيع
وكل كيلو نقطة تفتيش!
الشعب ممنوع ما يرقص
ما ينطط وسط الحفلات
والكاكي يرقص على كيفو
بي عصاية وبي رشاشات!
يا بله كيف بس نتحلا
شربكنا زولن اتشربك
واتورط جوه الشبكات!
***
مشروعنا القالو حضاري
غرقنا في حروب وحروب
فرقنا شرقاً وشمال
فرقنا غرباً وجنوب!
لا سلطة تنفع لا ثروة
ما دام ضاع الانسان
يا حليلو الكان سوداني
يا حليلو الكان سودان
الفاتحة على ناس عايشين
لاكين زي الأموات!