ماذا يريد الشعب السوداني - الصفحة 3

ليمونة · 20-06-2008, 18:23

اولا يا اخوانا البلد دى اول حاجة خسرتها الحكومات المتعاقبة ،،وممكن تسأل حبوبتك او جدك الدنيا زمان كانت كيف الناس حنينة والقلوب بيضة لكن الفقر هو الخلا الناس تبقى طماعة وانانية كل حكومة بتجى ما عشان تغير للاصلح بس عشان تشيل الحكومة القبلها وتسجن قاتدها وانا فكرتى انو اى زول يعتبر نفسو سودانى وبس لاقبيلة ولاانتماء طائفى ولاعنصرى والاوراق الرسمية الفيها الكلام ده يشيلوهو بره منها ،،والملاحظ فى كتير من الناس الواحد لمن الفقر والزهج يعصروا يقول ليك ياخى ينعل ابو دى بلد دى والله الكلام ده ما كويس والله البلد دى هى بي فقرها ده علمتك واكلتك وشربتك وسوتك بنى ادم المفروض تدافع عنها ..اما بالنسبة لموضوع السودانيين دايرين شنوا انا بفتكر انهم دايرين شربات ليمون وطنية عشان يقدروا يعرفوا البصلح البلد شنو ويبعدوا من المشاكل الما ليها داعى ..الناس اتطورا ومشوا السما ونحنا لسه بنوقع فى الاتفاقيات ..بس الله يكون فى العون.وشكرا

ahabb_2001 · 21-06-2008, 12:18

بعد وجبة سمكة القرش

أظن ليمون الوطنية جيد...!!!

يا اخوي:::

الناس لو اهتمت بصناعة وطن وتركت الجري وراء الامور الما نافعة...!!! ذي شيخ الكاروري... البطلع لينا في كل خطبة جمعة ويعصر جل فكرة في صياغة خطبة كلها عن امريكيا واليهود... لو بذل نصف جهوده هذه في توعية وتبصير الشعب على الوحدة... بدلاً من الدخول في بث الكراهية بين الامم والشعوب والتفرقة الدينية (لاننا اصحاب دولة متعددة الديانات)... اظن ستكون جهوده افضل...!!!

مع تقديري

hemeda2 · 24-06-2008, 13:44

السودان مدرسة الفشل.....

السوداني اصلا شايف نفسو حاجه كده مهمه...
مع انو مع الاخلاق الشايفنها في الاماكن العامه التي تمتحن في اخلاق الشعوب ما شايفين لينا اخلاق تنكلم ونعتز بيها غير معاكسات و حقد بين كل من له لون ومن له لون اخر وبين من له شكل وشكل اخر وكذاك القبيله .....
انتو لسع حتقولو سودانيين...
امسك الشباب السوداني في الجامعات وكل ما تتناقش مع واحد في خير يتعلل لك (بالحكومه) اقوليهو يا اخ لي انتا نحن نتيجنتنا الدراسيه كده يقوليك: من الحكومه الجننتنا والكرهتنا ونحن نقرا ليه اذا مافي شغل ,,,,طيب وانت التاني يا(حبه ) ارحكاك نمش علي المسجد داك نصلي الضهر, يقوليك :والله ماقادر اتحرك هي (الحكومه ) خلت فينا حيل ولا وفرت اكل كلووو منها ,وهو الجامع داك ذاتوووو حق ( انصار السنه)..الناس ديل عاملين فيها مكملين الدين ,,كرهنا البلد وكرهونا حياتنا ذاتو....كدي ارحكاك نلعبلينا ماتشmatch بتاع (بلياردو)؟؟؟؟؟
ومن ستر مؤمنا ستره الله يوم القيامه لكن عندما تكون البلوه جماعيه لابد من الامر بالمعروف والنهي عن المنكر بالقوه قوة اليد...

وما بالك بحال الفتيات...مسكينه مخدوعه بالشباب السوداني التافه....مشكلتا ما بتعاين للماشي عديل في نفسو وحالته,,لكن تعاين للمفلفل شعروا ولابس cut وغيروا حسي انا بتهمك انت يالبتقرا الموضوع دا انك بتحاول تستنج انو الزول ده من ياتو قبيله وياتو حزب كوز ولا انصار سنه ولا..
و.....
لأننا نحن ما نقدر نتكلم مع بعضنا الا عندما نقوم بتحميل الصوره القبليه في الذهن والصوره الحزبيه....

وانا بحلف يا(ahab 2001) انو بكلامك حاصل وانا برئ تماما من مثل هؤلاء
السودان يا سودانييييييييييييين انتهــــــــــــــــــــــــــــــــــــــــــــــ ي ,,
وسوف يغير الله ويبدلكم لأن الجيل الجاي اسوأ ....
(واتقوا فتنة لا تصيبن الذبن ظلموا منكم خاصه)

*** يا سودانيين يا خطيريين انتو ما نفعت معاكم حكومة شيوعيه ولا حكومه اسلاميه ,,,,,,,
جاكم المهدي مشيتو ا وراهو............................................
جابليكم الخمور زمان في الدكاكين شربتوا لحد ماقلتوا كفا .....
بنو ليكم مسجد في كل حي وقريه و جامعه صليتو لحد ما قلتو كفا .!!!
والان ...
اصبحنا ننتظر رمضان لرمضان ...
او منتظرين الحكومه تقولينا امشو صلوا سريع ....ها ها

(واتقوا فتنة لا تصيبن الذبن ظلموا منكم خاصه)

عاشق النجمه · 30-06-2008, 02:16

عارفين ياشباب انا مشيت حسب شغلي لي اماكن في السودان ده الناس بتشرب مويه معفنه ومعدومه والناس دي مش علي الخريطه اساسا احمدو الله انتو البتخشو النت

على الخضر · 01-07-2008, 01:03

يا اخوتى اذا كان تلفزيوننا القومى ما زال يدعو الى القبلية فى معظم برامجه حتى اصبحت واقع ملموس فى حياتنا . واصبح السؤال عن ماهية جنسك هو اول سؤال يدور فى عقل أى شخص تتعرف به مبدئيا ليحدد بعد ذلك شكل العلاقة التى ستجمعكم و استمراريتها من عدمها . وبنفس هذه الصيغة يسأل المتقدم للزواج .فأصبح الفيصل وألمعيار فى جميع علاقاتنا الجنس و لكن على حساب ماذا (الصدق والامانة والشجاعة وكل الصفات الجميلة ) لست من هواة طمس الهوية و لكنى ادعو الى الاستفادة من التباين العرقى الموجود عندنا لنخرج كل العادات الجميلة فى ثقافاتنا المختلفة ونصهرها فى قالب واحد لنخرج بجيل واعى سليم ومعافى .

ahabb_2001 · 05-07-2008, 11:09

الاخ علي... سلام

هذه هي الرسالة الجملية التي نأمل في ان تكون ديدن كافة الجيل الحديث... ولماذا لا تكون هناك شعارات تذكيرية توعوية (بتلك المفاهيم) تلصق على كافة واجهات الشوارع الرئيسة في كبرى مدن السودان... وعلى وجه الخصوص العاصمة المثلثة... لتغيير تلك المفاهيم المتحجرة منذ القدم في العقول محدودة الفكر...

مع تقديري

على الخضر · 08-07-2008, 14:45

أخى لك التحية بقدر روعتك . وبعد السلام

بل ولماذا لا تكون هناك مناهج تربوية تعليمية تدرس فى المدارس تهدف الى تثقيف الطلاب و خاصة ( الصغار منهم ) على خطورة العادات السالبة المترتبة على الانتماءات العرقية و القبلية و الاستفادة من العادات الجميلة و الدعوة الى تعميمها على الجميع و جعلهم تحت مسمى واحد ( أنا سودانى ) .
و لماذا لا تنظم ملتقيات كبيرة تناقش فيها مثل هذه الامور الحساسة و يدعى لها الكل فتنظيم الملتقيات للحوار فكر و طرح راقى . و أشدد على هذه النقطة لأهميتها و أنا بصدد طرحها عبر المنتدى انشاء مالك روحى متى ما اكتملت الفكرة فى رأسى . فكم من عاشق ذو فكر عالى و كلمة هادفة يهوى تراب هذا الوطن و لكنه يشكو قلة الفئران فى بيته فضلا على ان يدخل الى شبكة الانترنت . وكم من كلمات نتناولها عبر هذا المنتدى تكون حبيسة عقول الاعضاء فقط واسيرة خطوط الشبكات

.
فكيف نخرجها للوجود ؟

ahabb_2001 · 09-07-2008, 13:02

اخي... لك كل الود

لدينا مسميات احزاب جميلة:::

حزب الامة
الاتحادي الديمقراطي
المؤتمر الوطني
المؤتمر الشعبي

وضع خطين تحت مسمى (حزب الجبهة الاسلامية)

اخي::: عندما تأخذ كل اسم على حداه تجده يعطيك معاني الاحزاب الاخرى... ولكن عندما تأتي لبرامج كل حزب منها تجده حزب عنصري رادكالي قبلي ديني لا يمت للامة ولا الوحدة ولا الوطن ولا الشعب بشيء... لان في اعتقادي برامج حزب واحد من الاحزاب المذكورة أعلاه كان كفيل بأن يجمع كافة اصحاب التوجهات الدينية تحت مظلة واحدة... ولكن عدم توحد الصف الاسلامي في السودان والتعدد الاعتقادي القبلي للشعب هو الذي اتاح الفرصة لظهور مسميات مختلفة وأيضاً غياب الوعي السياسي الذي استغله هواة السطلة ساعد في ظهور مسميات وطنية منفوخة بروحانيات دينية لم يتمكن احد من قادتها تجسيدها على ارض الواقع بالشكل والمضمون الذي يدعو إليه...

للتخلص من تلك الاحزاب... لا بد من ولادة احزاب وطنية (بالمعنى الحقيق) جديدة لكي تلم الشمل المشتت...

والاساس للتخلص منها لا بد من صناعة مناهج مدرسية... ولكن من هو الذي سيضع تلك المناهج ان كانت البلاد محكومة بعقليات متحجرة...؟؟؟

لي عودة

على الخضر · 15-07-2008, 17:15

نعم اخى الجميل الوعى السياسى غائب و لكن هذا لا يدعنا نضع ايادينا فوق بعضها و نغض بصيرتنا عما يحدث و لكن لنحاول فان لم ننجح نكون قد ربحنا شرف المحاولة .