انا قايتو داير الانفصال

emadjaryj · 01-02-2007, 15:03

ياعاشقى السودان سؤال... الوحدة أم الانفصال ؟؟؟

انا قايتو داير الانفصال
والانفصال واقع اكيد مافى احتمال
واحدين يقولو ليك محال
واحدين يقولوا ليك بينجح لو قعد حزب اليمين مع اليسار
هو منو اليمين ومنو اليسار
على كل حال
انا قايتو داير الانفصال

ياخوى تعال
نحسب شهيد فى كل دار
نحسب الم فى كل حى
فى كل اقليم فى الجنوب اوفى الشمال
فى شندى او فى كسلا او بحر الغزال
ودموع بتنزف من رجال
على شهيد مات فى الجبال
لكن دوام الحال محال
سنوات وجات العولمة ونسينا شهداء النضال
بعد الجهاد كان الشعار
همومنا اضحت بى وضاعة بنوك ومال
ومقاولات وصكوك وعملة يورو وريال
عاد لينا تانى الاحتلال
بس مختلف افكار ومال
ولو ترفض المطلوب تجوع مافيش خيار

منعول ابوة الاحتلال
ختاها عقدة نقوم ونقعد فى الكتال
لاقدرنا نطلع منها
لاقدرنة نحسمة بالحوار

اديك شمار
قالوا الجماعة تحت تحت رضو بى حكاية الانفصال
حسبوها ياخى يمين شمال
ولقوها مابتلفق مدام امريكا داعمة الانفصال

وواحد شمالى كتب مقال
فحوى الكلام فى الهيمنة والاحتلال
أمريكا تصبح فى الجنوب والصين يكون ليها الشمال
القسمة تبقى حلال دلال
وجايب كلام فى العولمة والاحتكار
والعملة والتقيير وعن سؤ القرار

دة كلام كبار
لابفهمو لابعقلو لااللة قال
انا ذاتى ماطالب كتير
انا طلبى ليك ياخ باختصار
داير امان فى كل دار
داير انوم فى حوشى ياخ وسط العيال
لاجانى ناطى ولاكسر لاقالو شال
داير اشخر للصباح
توغظنى حئ على الفلاح
واقوم البى نداة قادر ذو الجلال
شايل عصاية من الكلاب وفى كتفى شال
وهواى يبقى من الشمال
وغناى يبقى من الشمال
وجيرانى يبقو من الشمال
مافارقه من تنقاسى او من قوز بلال
من التى اوتندلتى او من العكد وابو حجار
ياخ باختصار
انا قايتو داير الانفصال

mejo_33 · 01-02-2007, 15:19

منعول ابوة الاحتلال
ختاها عقدة نقوم ونقعد فى الكتال
لاقدرنا نطلع منها
لاقدرنة نحسمة بالحوار

الحكيم · 01-02-2007, 18:20

طلب الأنفصال محال , مادام بين الشعب وصال , الصبر والأمال , بأن يجمع الله الأوصال .
يعطيك العافية , على كتبك الوافية , وأفكارك الوافية .

تحياتي
الحكيم

elfatihshowaa · 02-02-2007, 15:45

ما عارف انا انت تابع لي ياتو حزب
لكن نصيحة الانفصال اكبر غلطة حتكون لي السودان
فعندما خلق الشمال
خلق الجنوب وعندما خل الجنوب خلقالشمال
اي لا جنوب من غير شمال ولايوجد شمال من غير جنوب
فانا اسف جدا جدا لو كلامي ازعجك لكن القصيده عموما جميله

ابوسماح · 05-02-2007, 00:53

تحياتى على القصيده الجميله جدا وانا معاك مافى حل الا الانفصال وتانى انفصال

emadjaryj · 07-02-2007, 13:42

يا mejo دة واقع الحال
لو بى وحدة او بفصال
نسال ربنا ونقولو ياستار

emadjaryj · 07-02-2007, 14:04

رافض الانفصال ياحكيم ؟
داير الوحدة شايف فيها كل نعيم ؟
خايف اسمعك وبالوحدة أمشى أهيم
وابقى معاك فى رايا ظاهرو عظيم
ونصبح بكرة غلطانين وناكل نيم
__________________

emadjaryj · 07-02-2007, 14:07

واللة يالفاتح كلامك ماكعب
والوحدة سمحة لو تكون لكن صعب
كيفن تكون مادام دعايم الانفصال مصبوبة صب
القصة ماقصة اقارقة اوعرب
القصة قصت شعب اضناة التعب
داير يعيش من غير حروب لاتقول غلب لاانغلب
القصة يالفاتح قلوب اتوسخت مليانة تب
اقدر اقول توحيدة يالفاتح صعب
فى ظنى لو تنجح يكون التيس حلب

emadjaryj · 07-02-2007, 15:15

ياأبوسماح انت الوحيد الجيت معاى
الباقى كلو وقف وقال لى عندو راى
ياابوسماح داير اقول ليك فى غناى
انا بى وجودك مابراى

Mr_Left · 07-02-2007, 20:57

وأنا أضم صوتي إلى الفاتح والبقية
وبقولك:

شليل وين راح
شليل مرتاح
مع إيدينا
ختا ركيزة الوطن
الملان إصلاح
نهمل في ورانا شعار
فتق جوانا أقسى جراح
قبيلتك لو تكون كل شئ
ما تبراها خاتي الصاح
وماتدي الفساد صوتك
وأوعا تبيع رؤاك بالمال
جنوب اللوحة ما بيصح
إذا ما تم رسمو شمال
وكيف بنقول هداك الشرق
إذا ما الغرب في الإهمال
كفانا سكوت ..كفاك تعال
حدانا وطن.. نقيمو تعال
جنوبنا فتر ..بلاك تعال
غربنا سأل.. عليك تعال
شرقنا بكن..دموعو تعال
شمالنا إنهد..حيلو تعال
تعال لينا
نلملم دمعنا وعينينا
شان نبني الوطن وإدينا
ونرجع بي وطن كامل
وطن مافيو وشمال جنوب
وطن مافيو سجم وحروب
وطناً ما بميز يوت
ما بين دينق أو أدروب
وطن نحنا و إنتو و هم
وطن بيلم غناوي الزنج والتمتم
وفي جبنة شرقنا الحر
بيتمايل كِرن مردوم
نشكلو في جسد واحد
إذا مابعضو صابو الهم
يقيف كل الجسد ساهد
يشيل أطرافو بي إيديهو
مايْهَمِل فَرِدْ واحد
فيا حلماً معاي وليو
متين تصبح معاي شاهد
فيا حلماً معاي و ليو
متين تصبح معاي شاهد