رساله الي مصطفي

elfatihshowaa · 30-01-2007, 14:48

رساله الى مصطفي
..........
وكت شائفنا ما تطلع
خلاص
ما الكل هناك
مستنينك في الشروق
لحظة تروق الدنيا
من غضب الشمس
والليل ملك اعماقنا حس
هشم اساريرنا ومشاك
ما كان تمش
والدنيا محتاجاك هنا
والغيم مرق نعسان
بتكل في السما
والغيم همى
هامر علي خد الخريف
شارد شرد
لكن فِرد
كلمة حنان كانت
تفي وتدي الغرض
لكن فَرد
خُصل الضلام
وانمد في تا لاي قمر
تاوقني والاشواق بحر
نادتلك الاعماق تعال
قنب حداي
بنبر غرامك ما انكسر
قنب حداي
شاي العصر
مشدود علي لهليب جمر
لو كان نجض
لاصبح رماد
لاصبح عتاد
تصبح عتاد
للدنيا في
نفس الميعاد
تطلع مع الفزع الخلا
ترجاك بلا
واقف علي عتب البلاد
والمبتلا كان الفؤاد
الشال عيونك وابتسم
حزنان بغالط في الحزن
رسمك علي كتف الضراع
ضد الصراع
مقياس رسم
رسمك وشم
دغمك علي طرف الغنا
ولاقاك لحن
عجز كمان
اوتار مغني
علي الوطن
اتعب عوين الشوق حرن
فارق مساربك
ومن طريقك قلبو تاهـ
يا دنيا آآهـ
لو يدي خاطر المستحيل
كان انعدم مني الالم
والفرحه تنلقاهو نيل
شاقي البلاد
همس الرسول علي غار هواي
عنكب حمام والشوق رسم
اتنين وتالتنا الاله
قلبين وسايقنا الغرام
روحين مقسمه في نفر
آيات مدردره في الكلام
غنوات خلاص
صنن بعد
رسمن ملامحك للانام
اجمل تمام
من احتمال
انو الغرام قادو الجنون
او الجنون قادو الغرام
وانا بيك بقيت
زي مستحيل
انضم بعد...
كمل معاك قلبي الكلام
وانا زي تقول قلبي اشتهاك
قبال اروح منك وامش
قبال اشيل بعد نفس
خرمان دقس
احساسي وكتين ما اشتهاك
واتعودك
او عودك تالاي رماك
يوماتي قاعد في ضراك
ما غبت عن دنياك يوم
الا وطريتك يا البراك
سادي المسافات اشتياق
ويا البراك قلبي البراك
باراك اتر قص وفتر
راكب ركوب المتعبين
وبرك علي بركان حماك
ركبن حواس الدهشه
في مركب شذاك
واتراكبت كل الظروف
مرتكبه في حقك جرائم المستحيل
والبي وراك
راود ملامحك في الحجا
وحجاك للشفع شعر
ومع المعاك
اعيت حروفك مد بحر
وانبعزقت في الجراح
وعلي وقع حكم الغرام
اشتاقك المسا والصباح
واكتب قصايد الفرحه نوح
وابراك من نبض المسيح
وارجاك جوه الحوت كنوح
وابراك وانوح
واهواك وانوح
وامشيك واروح
مع لكزة بريقك للقمر
واعيا واطيب
وابرد جمر
واحرق حشاي
من طول مساس اكسيد
هواك الاشتياق
من روح ملامحك في الجسد
من شوق شهق كل الشواهق في سنين
الفرقه والاشواق مدد
مدد
مدد
مديت يميني علي الفرغ
جابد فراغ
اتفرغت كل المشاعل من بريق
واتقرفت كل المداخل ليك شهيق
يا زفرة الموت البقت سايقاني بين
اصحي وافيق
او بس اشيل
جواي ملامحك
يا حنون
يمكن اطابقبك
عيون
او قلو اشبهبك
شجون
قمة جنون داخل
فواد....
انمد في الاحساس انين
يا منتهى..
نار القلوب اتواقدت
ووصلتبك حد
انتهى
علي قدر ما
تهوى العباد
انا بهوى ليك
وعلي ما كان الرماد
انا كل يوم كان بنصهر
شان بشتهيك
شلتك علي كل القلوب المرهفه
وغشيت حواسي وابتديت
اهواك وراي
من غير علم نفسي المعاي
لكن لقيت نفسي
بتحبك قدر ما
بهواك وبتعذب براي
يا منتهاي انا قت فيك
بلقي الفرح منمدي في عين الجبين
وكتين تبين
او بس تبين
يا مصطفى اذا انصفت دماي عليك
واذا هبت علي نسمات
بكون بحلم بنرسم فيك
علي الغنوات
في الوشوش الياما تعبت
شان تكاجر وتبتسم
والياما اتحدت تجاعيد
الزمن
وبقيت وشم
علي كل حس
حساس بيشعر بالغنا
حساس ومرهف بالوطن
يا وطن
منك بديت اهوي المحن
وانساب بقدر الانسياب
علي كل زول حباك فهم
انك نغم انك لحن
انك تعاني وتبتسم
شان نبتسم نحن الغلابه
المنهكين
المفترين
الواقفيين
بعدك بعيييد
او بين بين
خربشنا صورتك من مشيت
بشتنا فينا وراك غناك
وقعدنا نضحك بي وراك
ونلوك كلامك بالغصب
ومشينا لاعنو الهلاك
اطلع كفاك
اطلع كفاك
ارجع قفاك
ضحكات هناك ضاعن سدن
داخل شفائف الاحتمال
كل الرمال اتواعدن
يبكن ملامحك
في اليباب
الا الصحاب
قاعدين صفوف بتوسوسو
لامن مروق الدنيا
زاتن سوسو
واحدين بجادلو مع الفراغ
وتانين ضميرم ملصو
من كلمة الحق البقت منتهيه
زاتا وعنست
والباقي من باقي الوطن
عايزين شغل ويعرسو
مافي البشيل شيلك وراك
كل الصفات اتغيرت
حتي الضمائر في الخداع
خسرت رست
غنوك كتار وادوك اكتر من غناي
لكن براي المشتهيك
والفيني تاورني الحنين
عشم السنين الجايه
لي طلة وشيك
في كل وش
وطني ونضيف
وطني وشريف
وشريف فقط
حاسس معانات الوطن
ليك الف طن
مليون تحيه واشتياق
قدر اعتناق الدمعه
لي خد الزمن
ليك يا حبيب
ليك يا وطن
منحوت
وخالي من الانا
مشتول وشاتل في الغنا
زهرة نضال
للمتعبين
طلقة كتال
للظالمين
ليك يا انا
يا قمة الشوق والحنين

شايقية · 03-02-2007, 00:42

تتـــوقع أقـــدر أقــول فيك الكــلام اللسة ما تعـــرف واتـــقال (ما اظــن )
تتـــوقع إني في حالــــة إنـــدهاش وذهـــول مـــن حرفــك (اكيـــد )
تتوقــــع إنـــي سحــر كلماتـــك اسرنـــي (طبعا أيـــــــــوة ومافـــــــيها كلام )

أخـــــــــونا الجميــــل:elfatihshowaa
خليـــك المطر البـــروي أراضينا ويخليهـــا تختضر ..
ودمــــــــت بخيـــــــــر..

توتا · 03-02-2007, 00:53

كل الصفات اتغيرت
حتي الضمائر في الخداع
خسرت رست
غنوك كتار وادوك اكتر من غناي
لكن براي المشتهيك
والفيني تاورني الحنين
عشم السنين الجايه
لي طلة وشيك
في كل وش
وطني ونضيف
وطني وشريف
وشريف فقط
حاسس معانات الوطن
ليك الف طن