شكــــــــــــــــــــوة 3

العماد · 15-01-2007, 23:50

اسع ياتو فيهم يا خلق الله عاد أوعاد يات مصير لى وللولاد
تبدا أمونة رحلة ماكان فى الحساب باراها الزمن شبعها فى العذاب
من يوم سافر أحمد قاصد الجنوب باكى أمونة فرقة هزت للقلوب
زوجها ابو الولاد الخاتى العيوب مفقود من سنة واعلنوا للحداد
وتمر السنه بى فوق السنه تمو اربع سنين مرت محزونة
فكرو فى الكفيل وبيناتن جنا ومحل الأبو بقى عم الولاد
عقدولو الأهل سولو المتبع من مرت الأخو الفات ما رجع
تنداس المشاعر أو قول اقتنع لازم الناس تضحى شان لبنى وعماد
ويتم العقد بينات الدموع لا فرحاً كتير لا ضوت شموع
عجلات الزمن ما بتقبل رجوع وما بتمشى الحياة زى ما الزول اراد
سنتين بالكتير كان جابو الولد والحزن القبيل جواهم برد
سمو على الفقيد الراجل الصمد شان حفظ الإسم وتأكيد للوداد
وما كان فى الحساب الزمن العنيد ينسج فى الخيوط من زمن بعيد
فى يوماً عصيب وما فى البال أكيد من أول جديد اتكال الرماد
فى لحظة سكون عماها الديار حس الباب نقر قايله أمونة جار
تاريهو الفقيد كان فى الإنتظار مفقود الجنوب يرجع تانى صاد
كان صدمة قاسية فوق الإحتمال خلتا بين جحيم واقع ام خيال
إختل العقل وكان آخر سؤال أسع ياتو فيهم يا خلق الله عاد
أو يات مصير لىّ وللولاد ؟؟؟

الحكيم · 18-01-2007, 18:30

مسرح الشعر ظهر , من بين الغيوم مطر , نعمة أصابتنا في الرؤوس , بحزين ضاحك , وسعيد باكي , وتنوع الطقوس , جميل ماكتبته , بالأحرف وما صنعته , فحس الحياة فيها نبض , والقلب للأحساس أنقبض ....

مع جزيل الشكر ......
تحياتي

الحكيم

شايقية · 20-01-2007, 17:56

حروفك تهز من الأعماق .. وتخلي الدمعة في الأحداق .. والغصة مخنوقة بالآهات ..

أخونا الجميل : العماد
أكتب واشجينا .. ففي حروفك يكمن الإبداع ..
يديك العافية .. ودمت بخير ..