* اشتقت ليك لما الجفون تتلاقى
في لحظة منام
اشتقت ليك لما الطيور عند الصباح بتقول سلام
اشتقت ليك كل ما الدموع تنزل من شوق أو ملام
اشتقت ليك ياا لوحة معجزة كل الكلام.

* أدسك كيف من الأيام
من الدنيا البقت جانية
اقول مرات اهاجر بيك نسافر لي بلاد تانية
بلاد ما فيها ناس ظالمين
موشحة بالظلال حانية
نمشي نوقف الساعات ونتقاسم الثانية
ويا ريت نتقاسم الانفاس وادسك من عيون الناس

* اجمل حاجة تكون متعذب بإنسان متعذب بيك
تقاسي الزمن القاسي عشانو
وبرضو يقاسي زمانو عليك
تكون بتفتش عنو وتسال
وبرضو يكون بفتش فيك
وتبقى الريده عذاب متواصل
وتشتاق ليهو وييشتاق ليك

* حياتك عندي غالية شديد
وحبك فيني اصلو اكيد
حكاية تقطع اخبارك لمن انت تبقى بعيد
بكون الحال صعيب دونك
وغيرك انت ببقى شريد
بكون ضايع بفتش ليك
لأني معاك ببقى سعيد
بكون مليان حنين وحنان
وشوق دفاق وفرحة عيد

* من ضجيج زحمة الايام اشيل خطواتي
وامشي ليك اهاجر بيك لمرسى بعيد
وعن اشواقي احكليك
حكاية زول بيشتاق ليك
وانت معاه في الخاطر يناديلك
يدون في الخيال رسمة
وبأروع معاني الشوق يغنيلك

*انا لو اقول اشتقت ليك
ما اظن قلت الجديد
لكن بقول احتجت ليك
والحوجة افضح للبريد
والوحشة في البعاد
تتنازع الاشواق شديد

* بقيت اعشق هوى الدنيا
بقيت اسرح مع الاحلام
رسمتك في ضفاف النيل
سمعتك في صدى الأمواج
حلمت معاك اكون انسان
اسوق الدهشة في الواقع
اشوف اللهفة في عينيك
بتغمر طرفك النعسان

*خايفه ان الزمن يبعدك عني
تقفي وتزيد من نزف الجروح
ان الغير يسرقك مني
وعلى صدي صوتك ابكي وانوح
بحق الغلا صارحني وعلمني
اديني من الأمل قصر وصروح
وحياة عيونك ريحني وطمني
انا استاهل قلبك
ولا امشي واروح

* لو تمادى الدهر مرة
والستار بيناتنا سدلوا
والا طالت بينا مدة
والتلاقي امتد اجلو
المسافة اكيد ما بتقصر
والرسايل تبقى بدلوا

* بتمنى ليك كل السمح
لا تشوف عذاب لا تنجرح
واتمنى ليك سعد العمر
لا حسرة ولا احزان تمر
ويا ربي تنعم بالصبر
ويديك كمان طولة العمر

* كنوز جواك ما بتكمل تضوي الليل
وتتجمل زي عصفورة حامت فوق وركت في قليب انبل
كنوز من شهدك الفياض ونكهة روحك الصندل
ما انته سواحلك الافراح
ومنبع نيلك المنهل
وصورتك شرفة الاحلام
ومشاهد نجمة تتجول

* تبقى كل الدنيا سمحة لما بس هاتفك يواصل
ترحل احزاني العميقه
ويستقر فرحي المسافر
اصلو شوقك فينيراسي منتظر عينيك تراسل
ابقى واصل ما العيون الفي انتظارك زي مطر الفواصل

* يا سلام لو كنت تعرف انت ايه بالنسبة ليا
ما بقول ليك انت روحي
احتمال اكبر شوية
بس تاكد انو ريدك في الضلوع نيرانو حية
مستحيل في يوم حتخمد طالما الدم جاري فيا

* منو الزيك يحس بالناس
منو االزيك جميل حساس
ومشتاقين يا اعز الناس
اعين فيك الاقي خطاك معاي ديمة
واشوف عينيك مع الغيمة
واشيل ذكراك صفة وسيمة
يا اروع زول
قدر يكسر رتابة الكون
ويتحكر في الاعماق هوى وقيمة

* لو قلت عايز تحتجب عشان تحس بشوقنا ليك
او قلت عايز تختفي وتبعد عشان ما نشتهيك
خليك عارف يا حبيب انو لو طول غيابك انحنا ارواحنا بتجيك