وريني مالك ياجنا
زيي التقول ماك مننا
ليه انت محتار في غناي وصعبانا عليك فهم الغنا
انا جبتو من وين دا الكلام ماك عارفو جاريفي دمنا
قبال تقول من وين تعال اعرفني من وين جيت انا
ولدوني في بيت طين هناك سريقتو سيدا العاجنه
بصماتو عاشت للابد منحوتا فوقا تزينا
ونعالو من حسحوس وبوص وصورا عراض وحزم قنا
مفروشه بي واطة بحر والاوضة بتشيل كم رحل لو توزنا
من ضلفة واحدة سدادتها يا حليلا راحة مسكنا
بي فوق قندول عيش عشان كل الشياطين يلعنا
****
لمن كبرت شوية كان الخلوة لي عز الطلب
بالجيرة ياما مسحتا لوح سويتو كراس من خشب
ودوايتي بالصوف والسكن وقلم الكتابة من القصب
بينبدا بي اسم الله كان درب الاليفات والشغب
سيدنا كان بيملي الناس عموم اخلاقو زي حبل السلب
ياسيدنا ابو لهب وتوب يا ود ابو لهب وتب
تعديل مع خبطة عصا او نهرة او نظرة عتب
***
وبعدو بنروح المدرسة عاد يوم فرحا كبير
مشوارها مهما يكون بعيد نحن بنقربو بالحمير
في صرة كورية لبن وفي صرة كسرة كر وحرف فطير
وتبدا النقاحة الفي الهجير
طورية في اليد اليمين كراسة في اليد اليسير
ومعاك تور في الساقية بس وهمبول هناك واقف غفير
وعبوب ملان كاويق وريش امو بدرلو لبن غزير
يكون عندك مطرق سلم وصفيح ملا ن حصحاص كتير
تكون زارع عيش للبهم وتحاحي من قدولو طير
واكان دي الحضارة اريت تطير
اكان الحضارة نفش شعر وتطيق لبان
لو الحضارة لبس رهيف وكلام سخيف
اكان الحضارة بحب فلان
لو التخلف في الاصول غرقني فيهو انا يا زمان
داير اعوم ضد العرق يسكت يحارب قلمي انا
ما يلا يا اولاد البلد يا الشعراء ناسنا المننا
تراسنا زي داير يضيع والهوس الغرب قرب دنا
ومعايا اخوان البنات زي سد نقيف جنب بعضنا
قولو الرباية خشم بيوت لمن ابو داك الجنا
يعرف حقيقتو واصلو وين ولي ولدو حرة يبينا
عشان يشم ريحة الارض ويفهم كلامنا الفي الغنا
ولمن اقول "هوي يا وليد " ما ابقى متخلف انا