قنبلة عيون

elfatihshowaa · 10-10-2006, 16:16

مدخل:-
بت عز الشمس
تجهر...
بت كالقنبله..
وكضاب كبير
البسألا..
او يوصلا..
نص:-
بان شعاعك
في سماي
شاع شروقك
في الجسد
ارتعش..
فارت دماي
وانكشح حبك مدد
قال شعاعك لي هواي
(ثابت عندك..
لا تتحرك...
ارمي سلاحك
وارفع يدك
فوق لي راسك
نزل ركبك
انزل ارضا)
....
بركْ علي عين الركب
مسكْ علي يدك قفاي
دمن خطاي
من كتر....
ما فكرت اجيك
من آه..
ما الفيني منك
ومنك عينيك
ومن حرس حبك
وكت جرجرني
قصبا شان اجيك
وراني معني الاعتقال
عذبني ما وسع المجال
مستخدمين...
كل الوسائل في القتال
رشاش وقنابل يدويه
عينيك قنابل نوويه
بتفجر فيني وما بترحم
حلتنا وقرية عيني
الغامك شالت في سلامك
الدهشه الشلت ايدي
لا قدرت افوتـك يا رائعه
لا قدرت اواصل في الجية
اتحالف جيشك والضدي
احزان نيران تاكل فى...
الآم في الدخل متكيه...
كتلتني عيونك يا رائعه..
بي سهم اللحظ الفتاك
ورمتني صريعا في حبك
مكتوب في الخاطر بهواك
بهواك.....
بهواك قدر
ما اوحي..
رب العزة للناس الكلام
بهواك قدر...
كل القلوب الراسمه
في الدخل غرام
بهواك..
ما طال السكات
بهواك..
ما كانت كلام
بهواك..
سلام بهواك وئام
سلام بهواك سلام
سلام.....سلام
راافع رايتي البيضا وجيتك
استناني رهابك بره
رغم غموضك..
اتشابيت....
بي قوة مشيتك
وكت ناديتك
واستنيتك
واترجيتك
واترجيتك
يبقي البينا سلام الشوف
لاتتعدي حدودي تعايني
ولا اتعد حدودك مره
ولو بادرني الشوق ملهوف
يا مراوداني
في لب احلامي
أن احتجتـك ما بنتكلف
سرعة بنرسم نفسك غيمه
في احساس
الشوف والأحرف
وأن احتجتي بلاقي
شعاعك....
قي الافاق اتناغم رفرف
الا بقولك
فيك حقائق
ولو تتمادى..
بتبقي حرائق
خائف منك
وخائف ليك
ومنك خائف
قدر الفيك
وبرضو عيونك
خائف ليها
من امريكا
وناس وحوليها
بس لو عرفو السهم
الفيها...
اليوم ما شفتك
واقع... فى..
كان اتناسو
الحنك الاول
ناس بلادن
والارهاب...
والارهاب
البيههو عيونك
خل الشافك طنطن
وغاب...
وبرضو حقيقه
وما بتتخفي
باي طريق
لو باريت
عينيك سنين
شان ما اعرف
سر الفين
ما ظن بطلع بي نظريه
اصلك ورده وزوله رقيقه
طاعما وناعما
ورامي بريقه
ولو رجعنا العلماء
الماتو....
ناس آلبرتو
وماكس بلانك
وهايزن زاتو
شان ما يعرفو
الضئ الفيك
ما بعرفوهوا...
ولو ادينا
الواحد فيهم
ضعف حياتو
ياخ ما تعقلو
وانسو عيونا
وخلو الضئ
انشر علينا
واضوي الليل
الدمس فينا
وبرضو حقيقة
انك هاجس
دئما كاتم
دائما حابس
نفس الغيم
والقمر الداقس
شمس الكون
نحن.. الكون
الناس..العالم
وبرضو الحور
والجن.. و ابالس
آه من طرفك
ولونو الناعس

شايقية · 16-10-2006, 22:23

بالجد مباااااااااااااااااااااااااااااااااااااااااااااااا ااااااااااااالغة ..
عيون الصيد بتقتل جد..
تأسر قلوبنا بشوق ما ليهو حد..
ونهيم بجنون وريدتنا ما ليها عد ..

أخونا الجميل :elfatihshowaa
بالجد مباااالغة .. وحلوة شدييد ..
فليك التحايا .. ودمت بخير ..

جمة حشا المغبون · 16-10-2006, 22:39

ياخى غريبة جدا المقلطع دى لدرجة إنى بحاول أحفظ فيها
شكرا لبك شديد
كتر

Mr_Left · 16-10-2006, 23:56

اقتباس:

خائف منك
وخائف ليك
ومنك خائف
قدر الفيك
وبرضو عيونك
خائف ليها

شيدت نضمك قيف
ختيت كلامك سيف
طوعت حرفك كيف
روعة ومحنة ريف
لحظات معانا أقيف
زايرني منك طيف
يا زول خريف في خريف
يا زول غباشو نضيف