الفنان المبدع / طه سليمان: لو ما حسيت بالاغنيه ما حتقدر توصلها للمستمع بالشكل المطلوب - الصفحة 3

REMIX_2006 · 15-10-2006, 22:48

اقتباس:

المشاركة الأصلية كتبت بواسطة ود المتمة

و كيف .. كيف .. كيف .. كيف .. كيف ،،،
لما الفراق يحصل إن شاء الله ما يحصل ..
وإن شاء الله ما يحصل الفراق
يا سيد الكلام والأذواق
مرحب بيك يا أستاذ معانا في عشاق السودان ..
ورمضان كريم ..،،
أولا : البطاقة الشخصية
تانيا : طه سليمان الفنان بداياته في سطور .،
ولي عودة تاني سمح الريد أذاني ...
"" تخريمة ""
حبيبنا أبو الطا - تسمح ندلعك - بالله دايرين أوتوغرافات خاصة بي موقعنا ..
وواحد خاص بي كده على جنب ممهور بي خطك الفنان

جميع الردود هي بقلم الفنان / طه سليمان

بسم الله الرحمن الرحيم

التحيه لمنتدى ( عشاق السودان ) والتحيه ( لريميكس )
وكل عام وانتم بخير ورمضان كريم

ود المتمة

الجواب :

1/ البطاقه الشخصيه :
طه سليمان حماد حسن
مواليد مدينه الخرطوم –بحري – شمبات
عازب

2/ البدايه :

كانت في المرحله الابتدائيه تقريبا لكن الظهور الفعلي كان في
عام 1992 مع فرقه ( آل البيت ) ثم بعد ذلك
كان انفصالي في عام 1998 وبدايه رحلتي الفردية.

REMIX_2006 · 15-10-2006, 22:52

اقتباس:

المشاركة الأصلية كتبت بواسطة طائر الحزن

الرائع طه سليمان لا لا لا دي طفرة خيالية منك يا ود يا ريمكس
حبيبنا وروحنا شرفتنا كتير في الحلة الجديدة وغنيت وكفيت يديك العافية يا سيد الطرب ......................
اها النسالك:-
** عايزة اعرف طه الانسان
** لو في طريقة كنت حاطلب اغنية ( حبيبة تعالي اليا) بس برضو ما بخليك عايزة كلماتها
** رايك شنو في الكوكبة دي :
فارس ارباب ؟
محمد عيسي؟
عبد العزيز القلع ؟
رفعت الـ 11؟

برجع ليك تاني ومعاي كمية من الاسئلة الزي دي استعد ساي يا طه ؟

طائر الحزن

اولا تحيه خاصه ليك ولكل اهل الحله الجديده والديم والقوز والسجانه....

1/ طه الانسان....( زي أي زول عادي مازايد أي حاجه ) .

2/ كلمات اغنيه حبيبه تعالي ليا حتوصلك .

3/ طبعا مافي زول بيطرح نفسو كفنان بيبدي رأيو في فنان زيو لأن الحكم بيكون
للجمهور لكن حأقول ليك رايي الشخصي لأني عاشرتهم وعرفتهم وهم شباب ممتازين وحلوين شديد ورائعين خالص وبتمنى ليهم التوفيق من جوه قلبي .

REMIX_2006 · 15-10-2006, 22:55

اقتباس:

المشاركة الأصلية كتبت بواسطة جمانة

طــــــــــه سليمان

كل سنة و انت طيب و رمضان كريم

وصراحة نوووووووورت الكرسي و اهلين بيك معانا في عشاق السودان

نبدا؟

اوكي...

اولا

اغانيك الخاصة ..... حدثنا عنها و كم عددهم؟؟؟

اكتر فنان تحب تغني ليهو ؟؟؟

اكتر فنان ...بتحب تستمع ليهو ؟؟؟؟؟

نتعمق اكتر ؟؟؟

طيب

هل انت مرتبط ..عاطفيا ... ( الدنيا رمضان و كضب مااااا معانا )

وما هي مواصفاتك لفتاة احلامك و شريكة حياتك ؟؟؟

باقة ورود لمن تهديها :

وردة حمراء :

وردة بنفسجية :

وردة فوشية :

بجيك راجعة اوكي ....

كل سنه وانتي طيبه والكرسي الساخن منور بوجودك....

1/ اغنياتي الخاصة هي ليست بالكم الهائل وانا حريص على اختيار اغياتي وحاليا مابقدر اقول عددها كم بس ممكن اقول ليك اسامي بعض الاغاني واتمنى انك تكوني سمعتيها ولو ماسمعتيها انشاء الله حأبعتها ليك في موقعكم الراقي ده.
اسماء الاغاني :
سيد الحلا – غيره – فرحني – ايامي يا قاسية
انت ماسعيد ( شقي ) – قمر زي ده – مقاطع ريد – عيون وجمال
الم الجراح – دمعة شقاي .
2/
3/
4/ اما بالنسبه للأرتباط العاطفي ( مع انو السؤال محرج شويه )
لكن حأقول ليك انا ما مرتبط بصوره رسميه .
5/ مواصفات فتاة احلامي بسيطه لكن صعبه شويه في الزمن دا
اولا: تكون مخلصه وبتحترمني وتقدر ظروفي وتثق فيني
بعد داك الباقي هين .
6/ هسي في داعي لكل الالوان دي؟؟؟
على العموم انا حأشيل الثلاث ورود واهديها لكل رواد منتدى
عشاق السودان
.

REMIX_2006 · 15-10-2006, 23:00

اقتباس:

المشاركة الأصلية كتبت بواسطة ود المتمة

أها يا طه .....
هل انضممت إلى اتحاد الفنانين ....؟ إذا كانت الإجابة بنعم أولا .... في نظرك هل تعتقد أن اتحاد الفنانين يقدم للفنان شيئا....
=============================

هل لك علاقة بالإنترنت ؟؟
ومتى كانت بداياتك فيه ؟؟؟
هل ستسجل في موقعنا..... ؟

مدينة تحب تزورها.... ؟ على المستويين الداخلي والخارجي... ؟
ما هو أكثر فنان تحب التعامل معه ؟؟؟

ود المتمه

ازيك يا عسل شكرا ليك كتير وان شاء الله اقرب حفله أنا عازمك أنا حاهدي ليك اغنية
( عيون وجمال ) وان شاء الله تعجبك .....

1/ لسه ما انضميت لكن الفكره موجوده لأنو اتحاد الفنانين يضم كم هائل من الاساتذه والعباقره لو الواحد قعد معاهم بس حيستفيد كتير فما بالك لو بقيت عضو معاهم

2/ علاقتي بالانترنت ضعيفه شويه لاني مابلقى زمن كافي الوقت البلقاه بكون عايز انوم فيه لكن ان شاء الله انا بعمل في صفحه باسمي فيها كل حاجه عني وكل جديدوكل اختباري الشخصيه
والفنيه

3/ احب ازور مدينة كسلا والقاش وناسا الحلوين واحب أزور مدينة باريس (أوعدنا يارب)
أنا بحب التعامل مع كل من له علاقه بالفن والفنانين لو ما كلهم ثلاث ارباعهم اصحابي
(بس ما تقول كذاب)

REMIX_2006 · 15-10-2006, 23:04

اقتباس:

المشاركة الأصلية كتبت بواسطة REMIX_2006

وانا كمان عندي كم سؤال كدا للفنان الكبير / طه سليمان

السؤال الأول :

رأيك الشخصي في الفن السوداني ( الحالي ) وماهو السبب في نظرك
في عدم انتشار الفن السوداني الى الدول الاخرى؟؟؟؟

السؤال الثاني :

هل ترى بصفتك فنان من فئه الشباب فرقا كبيرا بين طريقه تأديتكم للأغنيه السودانيه
وبين الفنانين الكبار ؟؟

السؤال الثالث :

لماذا يعمد كثير من فناني اليوم ان يبدأو مشوارهم الفني بالاغاني
القديمه وليس بأغانيهم الشخصيه الخاصه بهم؟؟

السؤال الرابع :

لما لا يقوم الفنانون السودانيون بإنتاج ( فيديو كليبات ) خاصه بهم تجسد اغانيهم وتزيد من شهرتها؟؟؟

السؤال الخامس :

حدثنا في اختصار عن مشاريعك الفنيه القادمه؟؟؟

ولي عوده انشاء الله

تحياتي

ريميكس

شكرا ليك كتير على لقب الفنان الكبير وأنا شايف أنو لسه ما عملت حاجه تخليني استحقو لكن اوعدك أني حأعمل المستحيل علشان يكون اللقب في محلو....

1/ رأيي في الفن السوداني زي ما قلت للاخت رندا انو نحن عندنا كل المقومات لكن تنقصنا الشجاعه وأنا قاصد بالشجاعه دي أنو لو أي فنان أجتهد وطور عملو وحاول يواكب العالم بنقدر نوصل اغنياتنا لكل العالم ممكن نقول اعلامنا ضعيف لكن نحن ما نتعلل بالحاجه دي لأنو في فنانين عرب كتير ظهروا في غير بلدهم يعني ممكن الواحد يجازف ويسافر بره ويعمل ليه (فيدو كليب) وما يخاف وزي ما قلت ليك الاغنيه السودانيه اغنيه ناجحه ( خلقه ) وعندك أمثله كتيره على كلامي دة مثلا اغنية الراحل سيد خليفه بتغنيها فرقة ميامي (اودعكم) ودي فرقه ما سودانيه فما بالك لو قدمنا غنانا برانا....

2/ انا لا أرى أي فرق غير انو الفنانين الكبار عندهم احساسهم الخاص البيدي الاغنيه نكه وطعم ونحن الشباب عندنا برضو الوان .....
( وزي مابيقولوا الماعندو قديم ماعندو جديد )

3/ ما قلت ليك الماعندو قديم ماعندو جديد فحيث كدا هم بيبدو بأغاني الفنانين القبليهم.....

4/ هناك العديد من التجارب لبعض الفناين الشباب الذين انتجو ( فيديو كليبات ) لكن لم تمجح بصوره كبيره لضعف الاعلام عندنا.....
وعلى فكره كل الفنانين الشباب في الفتره الاخيره بيقو يفكروا بالصوره دي
يعني قريب جداً ( حتسمع ) و ( حتشوف ) .

5/ بالنسبه لمشاريعي الفنيه .....لدي ألبومين
حيروا النور قريب...
واحد من الالبومين ديل انا والاستاذه ندى القلعه
والتاني فردي...

REMIX_2006 · 15-10-2006, 23:09

اقتباس:

المشاركة الأصلية كتبت بواسطة زياد ذو النون

بسم الله الرحمن الرحيم
والصلاه والسلام علي افضل خلق الله اجمعين رسولنا وحبيبنا محمد عليه أفضل الصلاه وأتم التسليم..

السؤال الأول:-

ما رأيك في الآيه الآتيه:

(( ومن الناس من يشتري لهو الحديث ليضل عن سبيل الله)) [لقمان 6 ]

السؤال الثاني:-

مارأيك في الحديث التالي:

(ليكونن من أمتي أقوام يستحلون الحر والحرير والخمر والمعازف… )

والسلام عليكم ورحمه الله تعالي وبركاته ..

زياد ذو النون

اولاً التحية لك اخي زياد وكل عام وانت بخير.....

بالنسبه لأسئلتك انا بقول ليك ربنا يهدينا ويهديك ويمتعنا بالتقوى والايمان ويحبب قلوبنا للخير

ويديم المودة والحب بيننا

( ان الذكرى تنفع المؤمنين )

شكراً ليك مره تانيه

REMIX_2006 · 15-10-2006, 23:11

اقتباس:

المشاركة الأصلية كتبت بواسطة ود المتمة

الفنان طه ::::
أغنية ترددها دايما ؟؟....

ما رأيك في ما يدور في الساحة السياسية ؟؟؟
ما هي نظرتك لقضية دارفور ؟؟

ود المتمه

1/( و يا عصفور ده حالك ) اغنيه ارددها دائما

2/ والله انا يا جماعه انا ماعندي قضيه بالسياسه شديد لاكن زيي وزي أي سوداني أنو البلد
تكون في سلام وتأني علشان نمشي لقدام

ويديك العافيه يا ود المتمه

REMIX_2006 · 15-10-2006, 23:16

اقتباس:

المشاركة الأصلية كتبت بواسطة randa saif

فنانا المبدع :

في رأيك الفن السوداني ليه مامنتشر في الوطن العربي يعني بنحسوا محصور بين السودانين

بس مازي الفن المصري واللبناني والخليجي وغيرو مع أنو عندنا ثقافات تقدر تبهر العالم!!!!

بس ده سؤالي الوحيد ويمكن أرجع ليكم تاني

رندا سيف

سؤالك جميل يا رندا فعلا نحن بنمتلك كل المقومات المطلوبه للأغنيه الناجحه من كلمات الى

لحن الى أداء بس مشكلتنا على حسب رأيي

ما عندنا الشجاعه الكافيه لتقديم أعمالنا وعدم الثقه ده كلو بيأثر على العرض علشان كده

بتلقى عروضنا مهزوزه وضعيفه

REMIX_2006 · 15-10-2006, 23:18

اقتباس:

المشاركة الأصلية كتبت بواسطة ابو اسراء

الفنان طه سليمان
رمضان كريم
وكل عام وانت بخير

الســــــــــــــــؤال

1/ما هى الرسالة التى تريد ان توصلها لعشاق طة سليمان؟؟
2/ كيف تختار الاغانى التى تؤديها؟؟
3/بكل صراحة عن ماذا يبحث المستمع السودانى الاداء الراقص أم الكلمة المعبرة؟؟
مع خالص تحياتى

ابو أسراء

رمضان كريم وكل عام وانت بخير وصحه...

1/ رسالتي لكل من يستمع لأغنياتي هي :
اسمعوني كويس لأني بغني ليكم انتو ولو ما أرضيتكم فذلك لأني ما كامل
لكنني ببذل اقصى جهد علشان اقدر ارضيكم وارضي ازواقكم
وربنا يخليكم لي .

2/ انا ابحث دائماً عن الاغنيه التي تترجم مشاعر الناس واحاسيسهم بروية
( لو ما حسيت بالاغنيه ما حتقدر توصلها للمستمع بالشكل المطلوب )

3/ المستمع السوداني يميل بطبيعته الى النمط الافريقي والايقاع الراقص وايضا يهتم
بالكلمه المعبره ( يعني جامعنهم الاتنين ) .