إنمرتق روعا .. وجاتنا تغني

جمة حشا المغبون · 01-10-2006, 17:48

ومنك وين يا كاشفة عينيّ
بنور الإلفة .. ضيا الحنية
وحلم العالم ناس تنسالم .. والبني آدم صافي النية
والأطفال الناشفة ضلوعا
إنمرتق روعا .. وجاتنا تغني
غناوي البكرة الكم مسموعة
سماع بلاّل .. في الدنيا الصنّي
حسيس طمبارة مع نقارة
صفقةّ حارة ودارة تهنّي
زفاف اغرودة .. نهار العودة .. أو زغرودة في ليلة الحنّي
فيا حلتنا عليك ترابك
وإنت شبابك زينة الجنّي
أحلى عروس البلد اللتنا .. واللا الغبش الرابة تهنّي
واللا هدير المدن التصحى وتمحى ضلام الحاصل عنّي

محمد الامين عبدالرحيم · 01-10-2006, 21:31

اقتباس:

أحلى عروس البلد اللتنا .. واللا الغبش الرابة تهنّي

الزول دا جيبو لينا سريع

جمة حشا المغبون يا مرحب

ولتكون نهراً منهمر من هذا العشق المتسرمد من دون توقف

ايها الرائع إدفق فينا كم النيل

شايقية · 04-10-2006, 21:20

كلامك زي حلم حاير ..
بفتش ليهو عن مدخل يكون ناير ..
يرسم في مداخلو شوووق وريد جياش جد صابر ..

أخونا الجميل جدا : جمة حشا المغبون
خطت أناملك .. فأبدعت .. وأنارت .. وأشجت ..
فليك كل التحايا .. وأهلا بيك نجم جديد في منتدانا ..
ودمت بخير ..