رحلة في الدواخل

Mr_Left · 27-09-2006, 13:29

وانا عائدٌ من معركة الهوى
مهزومٌ ومجروحٌ أحمل معي ما تبقى
من أشلاء ذاتي المبعثرة على ساحة
اليئس المرير وجنون الكبرياء الأعمى :

ما شي أترنح براي
ما شي اترنح وجاي
جوا الدواخل ومنجرح
أتبتب الضلمة واساي
داير أشوف حجم الجرح
مجروح كما جرح الشمش
لامِن هلك حيلا النزيف
وإترنحت لما إتكت
تالا الأصيل
نزفت
يِنَقط دمها فوق
السما
صَبَغت
حمار المغربية
وكيفما
صَقَطت
بقبلها كم قضية
إِنْتَرتعت
وقعت
وراها بحضن ليل
***
أول دخولي علي القلب
ما ني حايم في الدواخل
نزف الجرح
ضاعت علي
كل المخارج والمداخل
شرقت من سيل الألم
خارت قواي
غمرت مرت بي
احاسيسي و رُؤاي
أتغخيلك موجودة جمبي
وماسحة بي عطفك أساي
اتحسس إيدك في الجبين
ترقد شياطين همي في عشقك
وتهدا وتستكين
فجأة انتفض
أتذكرك
مقسوما لي زولا سواي
أزعل أفوتك أعترض
أمسح ملامحك من غناي
شان ما أصون عِزة دماي
أديك قفاي
وأبقا صادي
علي جاي
أديك قفاي
وأبقا صادي
علي جاي
*******
****
**
*

شكرًا لكي

محمد الامين عبدالرحيم · 27-09-2006, 14:02

مجروح ما برك

مجروح معاك

انا و خاطر الجنَه(الولد)

وفوقنا الهم ما تاكِ

صنقعنا فوق

بعد الصلاه

رددنا دعوات النجاه

ياالله الكريم

ياالله الكريم

يا الله نور

أدينا من قبسك ضياء

كان خاطر اللبن يصبح صفاء

يا جنه هوي ياجنه

شيل جراحك .. ورشرشه

وبي حبت تريبات عطره

وشفوف من شجر النخيل كفنه

ما تدفنه .. ما تدفنه

خاطر الجراح

جواي الجراح

زقرد صهيل

واعلان خلاص

الدم ساب الجروح

صبح صباح

من غير جروح
من غير نزوح

وبس كفا

حمد لله الف علي السلامة

والله العظيم إشتقنا ليك

الحكيم · 27-09-2006, 16:04

جلسا لبعضهم يتواسون , بحب الم بهم وبحروف العشق يتناجون , فمتعا وامتعا وسيمتعان ونحن الجمهور في قيام وقعود بشد وجذب متفرجون ( سكارى وما هم بسكارى لاكن أتخذ الحب قراره) ودمتم لنا كاتبين صارخين مجلجلين بأحلى الحروف. وكل عام وأنتم بخير
الحكيم

شايقية · 28-09-2006, 23:14

مكانك في قلب مجنون
بحبك جد وفيك مسجون
مكانك كان رحلت بعيد .. بكون باقي وما مسكون ..

أخوي الغالي شديد : مستر ليفت
ليس بجديد عليك الأبداع والتميز .. فعندما يغني قلمك فهو يطرب ويشجي كل مستمع ..
فليك كل التحايا ودمت بخير ..

ابوطاهر · 29-09-2006, 01:26

كل الدلائل في طريقي بودي ليك
كل الإشارات والمخارج والسبل
مكتوبة فيها إليك ..إليك
كل السفر .. تعب المشي
ليل المسافرين الطويل الماعندو حد
شيل الهموم ..قولة الزعل..صوت المطر
طلة الخوف والرعد
ياحبيبي بحن ليك
بلعن في الظروف
البعدت كل القريب..كل القبيل خاتيهو ليك
زارعو في جواي
بفتش في مداهو..في مداخل نفسي
في كل النهايات الجميلة
بلقي الصورة واضحة
صورة الإنسان بلملم في رويحتو
بفتش لي رفيقا في عتمة الليل الحلف ما ينصبح
ما ليهو زاد إلا الأماني الطيبة بي الق الصباح
بي شوفة الزول الوفي
بي زكرتو المحفورة في حاضر دواخلو
بي طلتو المرسومة في زاتو
بي عشمو في حبو القبيل خلاهو
يا دوب بساسك في المشي
بسأل في الزمن
كيف الحبيب
كيف الصبر ..كيف الحياة
من دون حضورو وطلتو

اخي الرائع المستر لفت تحياتي واعجابي لك بكل ما تكتب ولك ودي

Mr_Left · 08-10-2006, 01:10

الرائع دوما ود الأمين

اقتباس:

من غير جروح
من غير نزوح

وبس كفا

وبس كفا
كيفن كفا
ما الريد بداخلنا إنطفا
وأثر الفرح
جوانا إيقاعو إختفا
وماتت حروف الأمنية
ضاعت نقوش الأغنية
وفازت دموعنا المزرية
لو قلنا عن وهم العشق
أجمل حروف
أو صغنا في بحر الصدق
أروع قطوف
جوانا هسي بيحترق
والقلب في الآم غرق
كيفن نشوف
صدق المحبين في الكلام
والريدة إيقاع السلام
والحب موازينو الوئام
بس داير أقول
الزيف والريدة
ولاد فد بيت
والفاصل بين
الحب والآهة بسيط
ومصير العاشق للنيران
متوكر في نص الأحزان
والصادق دايما
هو الخسران

Mr_Left · 08-10-2006, 01:19

عندما ينطق الحكيم:

تحترق معني الكلمات
يلمس عمق المعنى بالذات
ترتجف الاحرف والهمسات

شكرا لك

Mr_Left · 08-10-2006, 01:29

اقتباس:

المشاركة الأصلية كتبت بواسطة شايقية

مكانك في قلب مجنون
بحبك جد وفيك مسجون
مكانك كان رحلت بعيد .. بكون باقي وما مسكون ..

أخوي الغالي شديد : مستر ليفت
ليس بجديد عليك الأبداع والتميز .. فعندما يغني قلمك فهو يطرب ويشجي كل مستمع ..
فليك كل التحايا ودمت بخير ..

يا طيبة زي كل الغبش
مسقية من النيل أصالة و إنتما
مروية من هادي البلاد
مكسية من لون أرضها
مرسومة طولا وعرضها
كيف الخلق
بتغش ضميرا بيدها؟؟؟؟؟؟؟
وبرضو راجين ودها!!!!!!
ما علينا
وبرضو بنقول ما درينا

Mr_Left · 08-10-2006, 01:44

اقتباس:

المشاركة الأصلية كتبت بواسطة ابوطاهر

بي شوفة الزول الوفي
بي زكرتو المحفورة في حاضر دواخلو
بي طلتو المرسومة في زاتو
بي عشمو في حبو القبيل خلاهو
يا دوب بساسك في المشي
بسأل في الزمن
كيف الحبيب
كيف الصبر ..كيف الحياة
من دون حضورو وطلتو

اخي الرائع المستر لفت تحياتي واعجابي لك بكل ما تكتب ولك ودي

تسلم كتير يا .........

كيف الحبيب...
كيف الصبر...
كيف الحياة...

لون الحبيب باهت
فاقد صفات الشوف
او برضو قول زاهد
أهدا الألم والخوف
....
شكل الصبر موجوع
الحرقة في الخاطر
لمحة عشق مفجوع
إقاعو بات فاتر
....
طعم الحياة أصبح
ممزوج بطعما مر
إلا الوطن بفتح
لي الفرحة شان ما تمر
بهدينا شان ننجح
طعم الحقيقة الحر