السواقي
لا سلام منك وما منك تحيه
للوراك خليته عايش في الأسية
ما حرام يا الفنجري ما تسيب وصيه
قمت زي طيرا غريب سافر عشيه
ما قبيل .. وصوني يا حليل الوصيه
كنت مكضب .. كنت ناسي
ودابي صدقت .. المفارق عينه قوية ..
السواقي النايحة طول الليل .. حنين الدنيا ممزوج في بكاها
زي طيورا في الفروع محتارة بتفتش جناها
والبيوت والناس بتـســأل عن صــبية
فارقت حلتنا زي طيرا غريب ســافر عشيه
ما قبيــل وصــوني يا حليل الوصيه
وكت مكضــب .. كنت ناسي .. دابو صدقت المفارق عينه قوية
أوعى ليل الغربع ينسيك ريحة الطين في جروفنا
والتميرات البهبن ديمة راقصات في جروفنا
والدعاش والغيم رزاز في العصير بالفرح بلل كتوفنا
ونحن راجعين في المغيرب ..للديار ما حد يشوفنا لا نشوفو لا يشوفنا
الي كل مهاجر عن أرض الوطن..أهديه رائعة الراحل / صلاح أحمد ابراهيم والتى تغنى محمد وردي فأبدع ..كلمات تثير الشجون ..وتحرك المشاعر..
الطير المهاجر /صلاح أحمد ابراهيم
غريب .. وحيد في غربتو.....
حيران .. يكفكف دمعتو
حزنان.....يغالب لوعتو
ويتمنى ...بس لي أوبتو
طال بيه الحنين...فاض بيه الشجن
واقف يردد .. من زمن
بالله ياالطير المهاجر للوطن....زمن الخريف
تطير باسراع.......ما تضيع زمن..أوعك تقيف
وتواصل الليلة..للصباح...تحت المطر...وسط الرياح
وكان تعب منك ..جناح...في السرعة زيد في بلادنا ترتاح
ضل الدليب أريح سكن
فوت بلاد وسيب بلاد..وإن جيت بلاد
وتلقى فيها النيل..بيلمع في الظلام
زي سيف مجوهر
بالنجوم من غير نظام
تنزل هناك وتحيي
ياطير باحترام
وتقول سلام
وتعيد سلام
وفاي ليها
وحبي الأكيد
على ..
نيل بلادنا
وشباب بلادنا
ونخيل بلادنا
بالله يا طير
قبل ما تشرب
تمر على بيت صغير
من بابه ومن شباكه
بلمع الف نور
وتلقى الحبيبة بتشتغل
منديل حرير
لحبيب بعيد
تقيف لديها
وتبوس إيديها
وانقل إليها
وفائي ليها
ما حرام ماضيك يصبح ليك أســيه
يا ســــلام لو كـــان جفـــاك بي حســـن نيــه
كنت نســـيتنا الوصـــيه
والمفـــارق عينــــــــــه قويــــــــــــــــــــه
عينيك
كلمات الشاعر/ صلاح حاج سعيد
اداء المرحوم مصطفي سيد أحمد
عينيك مدن منسية
في كتب التواريخ والزمن
عينيك وطن مشدود
علي وتر التباريح والشجن
ممدود علي حروف الكتابة
مكدود عنا ومكتول صبابة
فيه حط النيل سكن
عينيك سفر مكتوب أعيش في غربته ..
واعشق عذابه وحرقتو.. وليلو الطويل
أتخيلك ياحلوة زي نسمة سحر
جيتي ومعاك حلمي المطول منتظر
وعدو الجميل
عشقك زمان جواي رحل
يتناها في الأعماق أمل
ضمخ رؤاي إحساس نبيل
أذهل طيوف خاطري القبيل
جاشت ملامح روعتو
وضج السكون في وحشتو
والكان أمل في عيوني لاح
زورق مدارات فرح الوهج النضير رياح
فجأة إنحصد قبضة رياح
وسكت الكلام ياحلوة في القول المباح
وقام الصباح بعدك رحل
والكان أمل في غيم سماك
أيقنت أنه عدم بلاك
وأنه البيحلم بي علاك
بختار ظروف أحلاها مر
عينيكي لو تصدق معاي الأمنية
عينيك لو أعرف ختام الأغنية
بدأ الكلام والمنتهي والمستطاب والمشتهي
كل المباهج في المواويل والغناء
والعاشقين قبلي وانا
هزتنا في عينيك تصاوير المني
ياأمنيات من كم سنة
ويا أغنيات كل الأماسي المستحيلة وممكنة
المستحيل عينيك تهون
والمستحيل قلبك يخون
ما القدر ما طبع الوفاء والصدق ماشرط إانتفا
وأنا حالي في بعدك كفي
وأنا حالي من بعدك كفاهو
المغني والحب والشجن
والوحشة والشوق للوطن
العمر قبلك ضاع سداً
والعمر بعدك أيه يكون
لويبقي إحساس الزمن
الشاعر اسماعيل حسن
قلبي الحابيك ما خان لياليك
ما ناسي الماضي ماتقول ناسيك
ما بدل حبو ابدا ماتنكر ليك
لكن الأشواك والنار حواليك
يانور العين
يانور العين انت وينك وين
في اللون الأسمر ذوبت شبابي
وعشقت الجنة وفي الجنة عذابي
صابر وبتألم والمر دا شرابي
ياحليل الراحو ياحليل احبابي
يا نور العين
يا نور العين انت وينك وين
الشعر الناعم بي عطرو اسرني
والوجه الناير بي نورو غمرني
عيونو النعسانة برموش تجرحني
خلتني متيم وين راحت مني
يا نور العين
يا نور العين انت وينك وين
انا والأنغام والعود في ايدي
بحكيلو حكايتي ويعيد ترديدي
واشكيلو همسة أو عذب نشيدي
ياما الأوتار تفضحني من ريدي
يا نور العين
يا نور العين انت وينك وين
في الليلة ديك
في الليلة ديك لا هان علي أرضى و أسامحك
ولا هان علي أعتب عليك
شلتَ الجراح و الابتسامة وكل حرمان اليتامى
جيت أهنيك و أصافحك…… جيت أقول مبروك عليك
و مديت يميني بلا كلام
ما قدرت قدامك أقيف
ورجعت حابس أدمُعي
*******
في الليلة ديك
و الناس تشارك فرحتِك
حسيت بأني غريب هناك
وغريبة أنتي في دنيتك
حسيت معاني الفرقة حسيت …… بالوجود ماخد سواد من حنتِك
شفت الدموع خلف الرموش
مكبوته بى حسرة وضياع
ورعشة الكف الخضيض
مقرونة بي نظرة وداع
جابُ القدر في سِكتِك
****
في الليلة ديك
جيت أهنيك وأصافحك…… جيت أقول مبروك عليك
الفنان عثمان حسين
من أجل حبي ..
حسين بازرعة
جاي تترجاني أغفر ليك ذنبك
ما كفاية الشفتو من نارك وحبك
أنت فاكر تاني أرجع لك واحاسبك
لا يا ناكر دربي أصبح ما هو دربك
كنت تحلم بالسعادة في كلمة مودة
وهي غير ما إنت فاكر
وهي في نبضة مشاعر
في القلوب الما بترد أي طارق أي زائر
شايلة هم الدنيا زاده ومالية كل الكون بشاير
إجتمعنا علي المحبة في ثواني
في طريق مفروشة بي حبي وحناني
وافترقنا كل واحد في طريقه
انا ضائع وإنت مخدوع بالأماني
كل زادي في ضياعي
قلبي مفتوح للأحبة
للجمال الأشجى روحي
في شعوري سحره شبه
ورسالة فني سامي
تدعو للخير والمحبة
إلا قلبك يا حبيبي
لسه ما أدرك وشبه
غناء الفنان عثمان حسين
كلمات عثمان خالد
يا احلى البنات ..
الله يا احلى البنات
لو كان لقيت سر الغنا
كان طرت عانقت الخيال
حلقت عبر الأزمنة
وقلت الخيال يصبح حقيقة
ونهدي ليك خاتم المنى
شان تسرحي وتتخيلي
وتتوهي في بحور الخيال
تتمني فيها وتسألي
ويتم ليك كل المنى
****
تستاهلي العرش البشيل
حسنك يطوف بيك العصور تستاهلي
ويمر بيك عبر الزمان
شان تمرحي وتتخيلي
كيفن تجيك ليلى بتغير
يبين عليها وينجلي
وكيفن تجيك الغيث ترش
دربك ورود لو تقبلي
ويطل جميل وكتير يقولوا
بيوت شعر مرهف طلي
وتمري بي عهد الرشيد
ويغني ليك الموصلي
*****
تستاهلي لو ردتي من قلبي القمر
باقات أساور أو حلي
أو حتى من كل النجوم
عنقود مبهرج ومنطلي
كان خف لي لقاك القمر
منصات وقال ليك أسألي
وكان حفو دنياك النجوم
إتباكوا ليك شان تعزلي
وأنا في هواك يا ست هواي
لليلة دايب في الغنا
*****
شفتيني كيف حاضن هواك
غيران عليك من كم سنة
شفتيني كيف ساعة الوداع
أنا كنت دمعة محننة
والليلة يا نعمة حياتي
بذوب حنان وبذوب منى
والليلة عايش أمنيات
يا حليلة لو كان ممكنة
أحكيك حروف أشواقي ليك
وأسمع حروفك وأحضنا
والفنانة حنان النيل
كلو بمضى
كلمات د.. على شبيكه
الحان.. السنى الضوى
كلو بمضى وكلو بى الايام بروح
لا سعيد دامت ليهو فرحة ولا حزين دام ليهو نوح
لاهية بينا الدنيا لاعبة فيها نتغرب نتوه
القلوب بالشوق تحرق والجروح تشفى الجروح
كلو بمضى ومهما تقسى مصيرى انسى
انت ماشفت الصباح كيف بطل زى احلى همسة
يضوى بنورو الروابى ويضيف فى كل حسنى لمسه
وتنطلق ارواحنا فيه بى شراع ماليهو مرسى
وننسى او نتناسى انو كلو صباح لابد يمسى
كلو بمضى وكل ايامنا الخوالى
وكل ليلة بكرة تمضى
زى فصول دنيانا فى موسم رحيلها
والسنين واحلامنا والعشره النبيلة
تبقى ذكرى وفى صحارى الفرقة واحتنا الظليله
برضى ماضى ابتعادى وريدى زادى
ورحلة الاشواق طويله
الفنان محمد وردي وكل الشعراء الذين كتبوا اغنيته اصبحوا رمزا في عالم الاغنيه السودانيه ..... الطير المهاجر ... كلمه قويه واداء قوي ولحن ممتاز ...
واسمح لي اخي ود الفكي ان انشر القمربوبا ... للشاعر اسماعيل حسن ...
المقر بوبا ....
لصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل
العيون الما بدمعن
نامن أو صاحيات يبرقن
لا بصيدن لا بعشقن
سرهن في الجوف يحرقن
كشفن رموشن أو غمضن
كلو موت ماتقول برحمن
القمر بوبا عليك تقيل
الصغيرون الما كبير
الرقيبة قزازة عصير
السنون براقن يشين
العيون متل الفناجين
مابتحش قشة تناقير
مابتشيل جردل على الزير
الزراب فوقا تقول حرير
شتتي شبار يامضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل
الجزير ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سالمة
يا غرق يا جيت حازمة
القمر بوبا عليك تقيل
القديما قديما الحمام
الوديزين في موجو عام
يا مرايقة قليلة كلام
وا حلاتا تقول السلام
القمر بوبا عليك تقيل
الغزال الفوق في السلم
المحبة تزيد الألم
كل يوم اصبح لي في هم
سيسبان عودك منظم
شمعدان نفسك يامختم
البرتكان نهدك مدردم
القمر بوبا عليك تقيل
الصغيرون ام الجنا
ياكريم ربي تسلما
تبعد الشر من حلتا
جنة للأم الولدتا
الفي جبل عرفات وضعتا
تسلم البطن الجابتا
دي ترباية حبوبتا
التميرة الفي سبيطتا
الصفار صابغ خضرتا
معزورة امها كان دستا
وا هلاكي النار شافتا
معزباني انا ود حلتا
القمر بوبا عليك تقيل
الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل
الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل
بحر الدمير العض ونزل
مرة يسقي الفل والنخل
فيهو عام وزينا وقدل
ياهنينة البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل
المبارك شيخ الضهر
العليك ساسكت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قلي يا زول مرضك كتر
سببك كم شلاخا خضر
القمر بوبا عليك تقيل
