روتانا عيون

elfatihshowaa · 21-09-2006, 15:59

عيون حبيبتي
مش حتقدر
تفتح عينك
والله يعينك
لو شافت لك
ترسل سهم
اللحظ الكاتل
وتعلن قتلك
تطعن قلبك
وتشغل فكرك
دي..........
عيونا
من ما قمت
ما لاقتني في الاحلام
ولا حاور بريقا خيال
ولا فُطرت من الاوهام
عينيها آآآآه
قول يا عظيم
يا بر..
ويا قادر عليم
عينيها سر
عند الله بس
لكنو ظاهر
للاديم.
عينيها جنة ونار جحيم
ولو أن ابليس الرجيم
شاهد شعاعا
وكت شرق
كان انحرق
او اهتدي
وامن عديل
عينيك سفر
في طولو ما
بكفي العمر
عينيها نيلين في البلد
موجِ بغالط
ما انقدر
عينيك غمائم في الخريف
هِن رحلتاي
وشتائ وصيف
هِن قبلتاي
اقصى وحرام
وانا ما حريف!!
لكن اقيف!!
ديل يا لطيف
قلوة وودع
بتحمِّد القلب الرهيف
هن دم وجُب
وانا قلبي يوسف
ما رسول
لكن
وقع جواها رُبْ
شهدت نفسي وقت يا رب
آآآآآآآآآه
يا قلب
عينيك يا مَرَةَ
العزيز
هي الراودتْ
نفسي الغرام
وبدون سلام
نطقت!!
وقالت:
هيتَ لكْ
وايضا عيونك
هي الختت!!
قدتني من
دُبري الأمام
اوانا لسه
طالع فيني شك
انك مَلاك
او
دا العزيز
كابسنا.....
في نفس المكان
الا الجَنان حقك
شهد...
إنو العيون
كيدن عظيم
وإنو العيون لو
عاينوك
يبهدلوك
يبشتنوك
يبهدلوك
جن بهدلا
عينيها
يا كافي البلا
حلوين حلا

الحكيم · 22-09-2006, 14:21

أسمع العيون دي سلاح فتاك , عشان كده بلغو مركز مكافحة الأسلحة الفتاكة , هوووي العيون دي متقابلني في الشارع , قلبي رهيف .روعة يا أمان
الحكيم

شايقية · 22-09-2006, 17:05

عيناها زهرة لوتس وعطر ريحان
عيناها شعاع قاتل وأمل كلو حنان
عيانا بيتي .. وراحتي .. وجنتي الفيها بلقى الأمان ..
عيناها وأأأه من عيناها واحتين من جنان ..

اخونا الجميل : elfatihshowaa

حروفك أكتر من رائعة .. وبتتسلل لي دواخلنا بكل جمال وانسياب ..
فليك كل التحايا .. ودمت بخير ....