شجراوي يا شجرة اللبخ فوق شارع النيل لكن ما جنب القصر الجمهوري
للخوف رائحة مزعجة , ولنقطتك وسطرك الجديد رائحة منعشة, الإيمان بقضية أصبح نادراً وشيل هم الوطن بقى أندر , نقوم نشيل النقطة مؤقتاً قبل السطر الجديد وقبل ما يدخل العيد ويمكن نعيد ويمكن ما نعيد - كلو في علم الله - ويمكن نلقى ندي عيدية ويمكن ما نلقى عشان أطفالنا يفرحوا وما مهم نحن -
مرت علينا حكومات كثيرة منها ما أرتضيانه بأنفسنا ومنها ما فرض علينا وفي الحالتين نحن الضايعين ده كلو عشان ما بنوعى الدرس وكل ما تجي مواسم صيف نشيل الأمل في الخاطر ونقول بكرة يجي الخريف - تجيك سموم مبشرة بصيف طويل تشيل طرف الملاية تعطنو في الموية وتغطي بيه وشك وبرضو تلقاهو صيف
نحن من نملك حق القرار ولكن عندما يكون فردياً تصعب القضية, همنا الوطن همنا التراب همنا أهلنا الغلابة, للأسف الشديد لا نملك إلا أن نسطر حروف علها تعينهم أو تطعمهم خبزاً أو تجد لخريج عمل حسب تخصصه أو تعيد من اختار البعاد قسراً ليكفي آخرون فكان هو من يحتاج الإعانة ومن يدخله إلى وطنه ويعرفه به بعد سني غياب.
الحرقة في القلب والفكرة في الراس لكن وين الدفتر والكراس عشان نكتب بنحبك يا وطن من غير حكومة ظالمة, بنحبك من غير ضرائب ولا زرائب, ولا زيف مشتت في الشوارع.
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــ
تولستوي
ـــــــــــ
المعنى آجنا انقطعت قطعة شديدة خلاس وشوقنا اتدفق كتير لامن فاض أبقى قريب
