وصية غريب لغريب

البلبل المغترب · 06-09-2006, 16:49

أن تعيش الغربة تتملك الاحساس الذى يعطيك الحق فى نصيحة الاخر حتى ولو شعراً وربما عاشها من قبل ولكن تفكيره فى الرجوع يثير عندى الشك بانه لم يتعظ او ان الجليد غطى القلب فما عاد يحس ويشعر وربما شعرى يعطيه نوعاً من النار التى تشعل فيه الدفء ،، على كل قصيدة شوق لصديق ينوى الرجوع وما احوجنا الى بعضنا فى هذه الايام التى تحمل سحابات كآباتها الكثير ،،

تانى ما تفكر تسافر وتمشى تنساهو الوطن
غربة الهم خوفه كافر وشهقة الموال شجن
وراحة البال طيب خواطر ماب تقدر بى تمن
يا رفاقة زمان وباكر طببوا الجرحو الزمن
الوطن ضامى الكواسر وللقمارى صبح سكن

**********************

مازمان قبال تسافر وتهدى لى موال حزن
ياما كنت شديد وصابر وشاد رواحلك بالرسن
وقمت هاجر يا حنين زى الطيور الهاجرن
لى بلادا فى سروره وصوت غناهن ما انسجن
ونحن صابرين فى المشانق حتى لو بكت الكرن
************************

بس كمان الغربة تكتل فى القلوب روح الوطن
وفيها جر النم مناحة وكل غريب ناسج كفن
هاجس الموت فيها اكبر من قروش طايرات وجن
ورحلة الشوق فيها اطول من خطوط رسمها الزمن
*****************************
تانى ما تفكر تسافر وتمشى تناسهو الوطن
وعيش مع الناس الغلابة من هنا ودنيا الفنن
برضو احسن من جروحك ومن دميعات طير بكن
راجى منك رد محنة بلبل الريد ما انسجن

Mr_Left · 07-09-2006, 17:36

الإغتراب ذلك الشبح الذي صبغ رلونه على كل شباب بلادي بما فيهم أنا رغم أن ما خصنا الله به في وطننا لم يعطه لوطن سواه الماء العذب البترول الأرض الخصبة المعادن المساحة الضخمة الصالحة لكل شيء الجمال الطبيعي الثقافات المتنوعة والتراث الضخم كل موارد الدنيا التي يتطلبها بناء وطن متطور ورغم ذلك تجنا نركن للهروب والفرار من المواجهة والتضحية من أجل الوطن فأين العلة ئذ.

لك التحية وانت تلقي علينا هذه النصائح القيمة علنا نصحو قريبا

Mr_Left · 07-09-2006, 17:37

للأوطان في دم كل حر
يد سلفت ودين مستحق

شايقية · 09-09-2006, 00:02

الغربة .. وجع مدفون جوانا .. وشوق قلوب حزنانا ..
وشهقة موت خانقانا ... وغيمة حزينه في سمانا ..

أخونا : البلبل المغترب
ليك كل الجمال والابداع .. على الحروف الاجتحاتنا بقوة ...
ودمت بخير ..

شفاف · 09-09-2006, 00:27

وصية زول

هوي يا زول اخير تعقل
وترجع للبلد تتلم
ما تكمل سنين عمرك
تقوم في اخرن تندم
ما تسرح مع الغربة
لأنه حصادها كله وهم
تهد الحيل توريك ويل
تنشف فيك عروق الدم
تراني بقول وقولي صريح
اقول ارجع بملء الفم
من غربتنا مافي عمار
لأنه الناس دي قاعدة عشم
عشم ابليس واصلو محال
لانو ابليس في جنتنا ما بنعم
اخير من بدري قول اتلم
ارجع للبلد وانعم
تلقى هناك حبايباً ليك
اقعد جنبهم وانجم
هناك صُلاح وناس مُداح
هناك الخال وناس العم
هناك نخيل هناك النيل
برد الروح ويزيل الهم
هناك الدنيا في السودان
دنيا جميلة قول بلسم
بتشفي الروح ومافي جروح
لانو هناك انت مهم

البلبل المغترب · 17-09-2006, 17:01

لكم الشكر مسر لفت وشايقية (بت عمى) على المرور ودائما فى الخاطر الابداع ياتى من رحم الذين يمنحونك الدفء ، بالمناسبة اين طائر النورس فى هذه العجالة بلغوه عنى انى افتقده بشده

البلبل المغترب · 17-09-2006, 17:01

لكم الشكر مسر لفت وشايقية (بت عمى) على المرور ودائما فى الخاطر الابداع ياتى من رحم الذين يمنحونك الدفء ، بالمناسبة اين طائر النورس فى هذه العجالة بلغوه عنى انى افتقده بشده