شخبطت دفاتر

طائر مهاجر · 04-09-2006, 19:52

خاطرة
بقيتي براك.............

بقيتي براك
جاييك ملفح بالوجع
مليان
صبح فينا وجدد للعذاب
ألوان
وبقيت انا وعيدان خريفك
للمطر ولهان
بقيتي براك
اوصافك مابتتشابه
شتتي الزكرى
عمقتي مآسي
قلعتي جزور الفكرة
وبقيتي براك
مابفارقك همك
يامغبونة
بنريدك فطرة
ساسقنا دروبك
يا مسجونة
حنحلك بكرة
وبقيتي براك
رشحت حرفك
للوجع غنوات
جاييك الزمن
يتنهد الآهات
مطر الخريف
لملم غمامو وفات
لي متين ولي وين
مشاويرك ضياع
عمرك والزمن
مابين
سلام وصراع
وبقيتي براك
وانا جاييك
في كل المخارج
بفتش فيك
في وهج الحروف
بلقاك
في حلو الكلام
مغناك
في ضو القمر
ممشاك
وهديتك
ومن عمق الذات
اديتك ومليت زاد
كتبتك لوح وزكر
وقريت اوراد
الله .......الله
دريويش بيناجي
شايلو صفيحة
الدينو معتق
دينو نصيحة
جاييك بالفال
الفالو مديحه
لي وين لي وين
ماشين لي وين
ماشين لي ضريحه
ختوك هناك
ورجعو بلاك
مالدنيا شحيحة
الدنيا سواك
عريانة فضيحة
وبقيتي براك

محمد الامين عبدالرحيم · 05-09-2006, 10:56

انت من زمان وين ......؟
إنشاء الله ما تكون براها ويكون الخير مضناها
ارجو منك ان تواطل في الشخبطه

Mr_Left · 06-09-2006, 00:38

يعني الواحد ما يغيب ليهو يومين يلقا البلد عمرت بي وراهو عموما

ما تسيبنا نسرح بي وراك
نفتش الحرف الجميل
غنينا من صادق غناك
الشيل صعب والهم تقيل
وانا لسا قاعد في جفاك
مستني في ضل المقيل

نبض الحنين · 07-09-2006, 04:15

..وبقيـــتي ..بــــراك..
لي غربتك..
لي وحـــدتك..
شوفي القمر ضواي هناك..قمرية في شجر الأراك..
قولي للخلوك بـــراك..
أنا مابـــراي...
عندي القمر ضواي هناك..
عندي النجوم..تعزف سكوني..
مع الشجون..
عندي الدموع تنزل..تشيل ..مني الهموم..
عندي الأمل..أخاذ شموع..
ما بتنطفي..
رغـــم الحزن..وبعد الصحاب..
خلوني لي خاطري الحزين..
أنسج خيالي مع السفين..
..وأبحر هناك..
من غير حـــراك..أنا مابراي..
ما براي..مابراي..مابراي..
.................................................. ............
المبدع بمعنى الكلمة..طائر مهاجر..
..زادك الله..إ‘بـــداعا..

شايقية · 09-09-2006, 00:39

أخونا الجميل والرائع : طائر مهاجر

والله عجزت حروفي عن التعبير .. ووقفت أناملي عند روعة الكلم والفن الجميييل ..
أبدعت .. وأدهشت .. وأشجيييت ..
فليك كل التحايياااا ..وما تحرمنا من قلمك .. ودمت لينا بخير ..

عاشق شقاك · 09-09-2006, 07:15

يا طائرنا المهاجر

دا دا دا الكلام الغربال زااااااتو

ومن الغربال للبال وتقول لي شخبطات

تحياتي ليك أخونا المهاجر

الحكيم · 09-09-2006, 08:47

سقط القلم من يدي , ماذا أقول , قد فوقت الخيال

الحكيم

طائر مهاجر · 03-03-2007, 14:48

ما للدرجة دي يا شباب