كيف

Mr_Left · 29-08-2006, 23:02

الإهداء إلى ود الأمين:

كيف
كيف ...إتواترت غنوات
وقمنا عليها عصرية
وكت مرق الكلام حيران
وقفت مع الشروق
يمكن
نمارس روعة النسيان
ونتقالد نتم الخاطر المشروق
حكاوي وشوق
ومن لمة مشاعر الناس
لقيت كل الحزن غايب
وإتوسدت روعة اندهش فنان
كما طلعت مشاوير الشعر ألحان
ومابين رمشة السكة
وكت يطبظ شعورا الضي
تغمد يبتسم إحساسنا والكلمات
تفتح فينا صوت أطفال
بنادو علي الخريف الفات
تعال لي جاي
لسا شليلنا في جرح الغياب ساكن
وقالو علي البكوس لقاي
تعب فينا الصراخ كل يوم
شليل وين راح
نشيل الليل
نواصل في ندانا صباح
شليل وين راح
ولو ترتاح
تمدد في بحور الذكرى
أو انسا أنتظار الشوق
ما مستني من عينيك
قوة شوف
إذا فاتت نهارنا الشمس
يقيد إحساسنا بالوطن سباهو الهمس
ولو ماتت رؤاك بالأمس
تأكد من صدق بكرة
وطن واقف علي حيلو
ولا مكسور
ولا محسور
ولا سوسا نخر نيلو
أكيد نحنا بنغنيلو
ونركز أو نموت حالا
في الجاياهو والهيلو
نمد ساس العمار قدام
نشيل فوق البنا المسدار
ومن جوا الحروف نفتح
طرق للقصر الأطفال
وننشإ في خطاهم دار
يصلو ويعبدو القهار
ويشيلو بدل سلاح
كراس
وريشة
وفاس
ويمشو علي الصباح أحرار
يرجعو بي غناوي شليل
شليل وين راح
شليل مرتاح
مع إيدينا
ختا ركيزة الوطن
الملان إصلاح

محمد الامين عبدالرحيم · 30-08-2006, 14:33

بين العتمه و صوت الريح...
حرفي بينزف و ضلي كسيح...
صابر و نازح...
املي فسيح...
وانا وانت نطارد الريح...
وزي شافع بجي وبنداح...
خطاهو اليهو فيها صلاح...
يشق العتمه في زاتها .. ونلقاء صراح...
نقسم الُقمه بيناتنا .. وخوتنا هي سلاح...
منو البنساكِ ياغاليه .. وإنتِ بتنسجي الافراح...
وليه ننسه .. مادام ماضينا فيهو جراح...
شليل وين راح ...
نشيل الليل ...
نواصل في ندانا صباح...
شليل وين راح...
شليل مرتاح ..
معاو سر القلب مفتاح...
مسامنا شليل.. شليل نصاح...
وفي أمُتنا نحن .. فصاح

ليك بس كل القصئد ولي شيقيتنا كل الفرح

اخوكم محمد الامين

شايقية · 30-08-2006, 16:21

أخوي العزيز : Mr_Left
يا شعاع أمل.. راجينك ..
يا همسة شوق ..فاقدنك ..
يا رعشة فرح.. منتظرنك...
يا حلم جوانا .. كايسنك ..

وخليك فينا مبدع وملهم .. وخلي حرفك نجم ضواي يسعدنا ويرسم الفرح بدواخلنا ..
وأخونا الجميل (ود الامين ).. منتظرين بشوق .. بس اتذكر سريع ...
ويديكم العافية ..

تخريمة :
ود الأمين .. Mr_Left
شاااايفاكم شغالييين هدااايا ... شنو يعني إتذكرو أختكم المسكينة دي بي حاجة ..
غايتو أنا عارفة دي غيرة واضحة وصريحة مني .. لكن أعمل شنو حروفك بالجد مبالغة ..
غايتو ما ليكم حل شوفو ليكم طريقة .. أرمو لي كم كلمة .. عشان أخليييكم :C_laugh

:

محمد الامين عبدالرحيم · 30-08-2006, 17:29

اهو انحنا نفزنا بس ما بيعملوها واضحه كدي
ولاشنو.
هعهعهع
هههههه

وشكراً ليك يا بت ناسي

شايقية · 30-08-2006, 18:13

أخونا العزيز : ود الامين

يا نسمة شذاها جد فواح ..
ويا طيف ألوانو كلها صباح..
ويا ضي وهجو قوي وصداح..
ويا فن ظاهر بكل صراح..
ويا روح فنانة وجمالا وضاح..
ويا أمين ويا كلك بهجة وصلاح..

منو البنساكِ ياغاليه .. وإنتِ بتنسجي الافراح...

أخوي ( ود الامين ).. تب ما قصرتا معااااي ... غايتو الله حلاك من نقتي الكتييرة
والله عملتهااا واضحة لمن شيييييييييينة

محمد الامين عبدالرحيم · 30-08-2006, 18:52

يا شايقيتنا الحنيه الكلا م ده كتير علي
والله بي الجد انا هاوي فقط
وياستي مشكوره علي هذا الإطراء
ولكي ان تطلبي ونحن ننفذ

Mr_Left · 30-08-2006, 22:25

يلا ولا تزعلي يا شاقية يا احلى أخت في الدنيا، دي تمامة النص

الإهداء إلى أحلى شايقية في الدنيا(طبعا البهية كتيرة شوية) لكين ماعلينا:

...

...

شليل وين راح
شليل مرتاح
مع إيدينا
ختا ركيزة الوطن
الملان إصلاح
نهمل في ورانا شعار
فتق جوانا أقسى جراح
قبيلتك لو تكون كل شئ
ما تبراها خاتي الصاح
وماتدي الفساد صوتك
وأوعا تبيع رؤاك بالمال
جنوب اللوحة ما بيصح
إذا ما تم رسمو شمال
وكيف بنقول هداك الشرق
إذا ما الغرب في الإهمال
كفانا سكوت ..كفاك تعال
حدانا وطن.. نقيمو تعال
جنوبنا فتر ..بلاك تعال
غربنا سأل.. عليك تعال
شرقنا بكن..دموعو تعال
شمالنا إنهد..حيلو تعال
تعال لينا
نلملم دمعنا وعينينا
شان نبني الوطن وإدينا
ونرجع بي وطن كامل
وطن مافيو وشمال جنوب
وطن مافيو سجم وحروب
وطناً ما بميز يوت
ما بين دينق أو أدروب
وطن نحنا و إنتو و هم
وطن بيلم غناوي الزنج والتمتم
وفي جبنة شرقنا الحر
بيتمايل كِرن مردوم
نشكلو في جسد واحد
إذا مابعضو صابو الهم
يقيف كل الجسد ساهد
يشيل أطرافو بي إيديهو
مايْهَمِل فَرِدْ واحد
فيا حلماً معاي وليو
متين تصبح معاي شاهد
فيا حلماً معاي و ليو
متين تصبح معاي شاهد
متين تصبح معاي شاهد
متين تصبح.........

Mr_Left · 31-08-2006, 00:06

اقتباس:

تخريمة :
ود الأمين .. Mr_Left
شاااايفاكم شغالييين هدااايا ... شنو يعني إتذكرو أختكم المسكينة دي بي حاجة ..
غايتو أنا عارفة دي غيرة واضحة وصريحة مني .. لكن أعمل شنو حروفك بالجد مبالغة ..
غايتو ما ليكم حل شوفو ليكم طريقة .. أرمو لي كم كلمة .. عشان أخليييكم :C_laugh

طيب يا ستي أمسكي وصري:-

هَدِيْتِك لون بياض الخاطر المفرود
هَدِيْتِك صحة الوطن الصبح مورود
هَدِيْتِك نبني شان ما نعز أهلنا السود
هَدِيْتِك في الكرم والجود
هَدِيْتِك فينا غاية وراي
وعدا ليكي ما بنقيف
سواعدنا بتسند القيف
من الهدام
تَطَلِع من سموم الصيف
غنى وأنسام
تعز في الهجعة جية الضيف
وتبني معا الخدار أحلام
ولي قدام
نرسي بدل حربنا سلام
نخت من كتفنا الألغام
ونسقي خدار جرفنا النام
ونتواصل
فياشايقية من تمر الجدود تاتت
علي إيديها شتلات القصيد شالت
زيدي سمعنا بالدوبيت
بدت زادت
وختت في رؤانا الفال
ومن حس الغنا الميال
سلام قالت
سلام رَوْح معا المرسال
سلام للشفع الجهال
ونتغالت
محمد دينق أو ملوال
مهندس ببني في الآمال
يمد إيديهو للتربال
يشد ساعد بنا العمال
ويرسم فينا أحلى ظلال
يلم آيدينا نتكاتف
وننسا القيلا تب والقال
شعارنا عمار
عمارنا خدار
خدارنا نمدو للمسكين
بلا أسعار
ونفرح
وينكسو الإتنين
كفانا عفار
فيا طفلا معذب
من ظلمنا الحار
غتاهو المجرى
متلحف برود الليل
حافي سرح
ورا رزقا صعب بالحيل
حلاتم كان وكت يقرو
يقومو علي العلم يشرو
ويندشرو
أمل وقاد
في خاطر بلادم يوت
بلا ميعاد
يختو الصاح يعدو الزاد
للوطن البِقُولو عِمَاد
شقاتنا شقاوة
لو يجرو
ورا ضل الشمس يسرو
مصيرم إيه
ذنبهم إيه
جرمهم إيه
منو الفكر طراهم يوم
منو الساهر عشانم
وفات عيونو النوم
من البقدر
عشان دمعة عيونم إقوم
ملانا الذنب من
أفكارنا لا عِنْ همسنا و أشعارنا
فيها اللوم
ملتنا هموم
وعيب نضارا يوم من ذاتنا
من سوئاتنا
شان نقدر نحل عوجاتنا
نكشف كل خبايا صفاتنا
نمسح مختلف آناتنا
نصلح نفسنا و هناتنا
برضو علا العموم ما فاتنا
زمن يدينا فرصة
نرسم الوطن الصحيح
زي ما تقترح رؤياتنا
او نصبح فرح يمسح
دروب الدمعة رغم الهم
صباحنا نقول رجع يفتح
علي أطفالنا مجرا الدم
يبل عطش العروق فيهم
ويتقطر عرقنا يسيل ونديهم
أكان وطنا خسر يربح
تزيد آمالو إيديهم
أقيف جوايا ما أسرح
نقوم نعمل نلاقيهم
يغنونا ونغنيهم ..يغنونا ونغنيهم
يغنونا ونغنيهم

كفاك ولا أزيدك

...

...

شايقية · 02-09-2006, 01:46

اقتباس:

المشاركة الأصلية كتبت بواسطة Mr_Left

طيب يا ستي أمسكي وصري:-

فياشايقية من تمر الجدود تاتت
علي إيديها شتلات القصيد شالت
زيدي سمعنا بالدوبيت
بدت زادت
وختت في رؤانا الفال
ومن حس الغنا الميال
سلام قالت

كفاك ولا أزيدك

...

...

يا أخوي العزيز : Mr_Left

تب ما قصرتا معااااي ... وأديتني بوهية شديييييييييييييييدة
بعدين كفانا شنو .. إنتو بس أكرمونا بحروفكم الفنانة .. عشان ننهل منها ودائما نأتي بشوق للمزيد ..

فليكم كل التحايا أخواني Mr_Left و (ود الامين)...
وبالجد أكرمتونا بكل ما هو مبدع وجميل ..
ودمتم لنا قلما مشرقا ينسج حروفه بخيوط دهبية ..
ودمتم بخير ..