أنا أجدد البيعة لحكومة الانقاذ..

seed_alcarro · 08-10-2004, 23:37

بعد أن تم احباط العملية التخريبية التي كان سينفذها كوادر المؤتمر الشعبي حسب ما ورد على لسان الحكومة قام السيد المثير/ عمر حسن البشير بالوقوف أمام الجماهير الغفيرة والقى بيانا شديد اللهجة موجها إياه إلى الدكتور حسن الترابي التي تشير جميع التوقعات إلى أنه سوف يتحول إلى مائي بفعل التحلل ثم التقطير تتخللها عملية أكسدة و.. ولا أريد أن أخوض لكم في مسألة علمية قد لا تستوعبونها لذلك أنقلكم مباشرة إلى خطاب الريس :

" أحيي أنا ... داير تقلبا يا ود الترابي !! ... كويس أرح أها قلبا قلبا قبا قلبااا .. أها أها أها ... أقلب كويس يا ود والله انت تمنين سنة في طوة ما تقلبا .. أحيي أنا .. ما قتا زول دين غلبتك أسة قعدت تصفر ... والله انت يوم تقلبا دا يوم تجي نانسي عجرم تمدح مع أولاد البرعي ... وأنا من منبري هذا بقول أنو أعداء السودان مالأمريكان المتآمرين برة ولا الصهاينة المتآمرين برا .. أعداء السودان الصهاينة الجوا ديل الاسمهم زي اسمنا ولونم زي لونا ودينم زي دينا ودينكم زاتو .. يلا انتو زاتو الموقفكم هنا شنو ..كلو زول يمشي يشوف شغلو بلا يخمكم عالم رمم ".

كان هذا الخطاب الذي ألقاه السيد الرئيس ..
وأنا من مرقدي هذا بعد تجديد البيعة لحكومة الانقاذ شعبا وقالبا أعترف برجولتهم التي لا تخفى على أحد فهذه (الشفتنة) المتناهية النظير تثير الإعجاب لدى محبي فريق الليكرز ولأنني أحب الاسنيكرز وكلاهما سيان فقد أعجبني ذلك الخطاب الذي ألقاه أونكل عمر شوشو ولم أتوقف لحظة عن الهتاف

" أيوا أيوا أونكل شوشو .. يمين شمال أونكل شوشو .. فوء لتحت أونكل شوشو .. أيوا أيوا أونكل شوشو "

أنا لا أقول ما أقول لأن الحكومة استطاعت بفهلوتها احباط العملية التخربية التي نسبتها الى المؤتمر الشعبي وليس لأنها قامت ببسط الرخاء في أرجاء السودان ولكني أقول قولي هذا واستغفر الله لي ولكم وقبل أن تقيموا الصلاة أحيطكم علما بأن (شفتنة) الحكومة جاءت في تدبيراتها وتخطيطاتها الدرامية لهذه العملية القيصرية التي تمكنت عن طريقها من إعادة المؤتمر الشعبي إلى بطن أمه وطي صفحة ماضي مكتوب بالعذاب .. ويا عيني على الحملات التفتيشية التي أسفرت عن الكشف على عدة مواقع للأسلحة المخبئة، ذلك جعلني أرسل حماري في بعثة احترافية إلى حلة كوكو إلى أجل غير مسمى حتى أبتعد عن جميع الشوالات التي قد تجلب يوما وزير (الهناي) إلى مقر زريبتي مع وفد صحفي أكون بعدها جالسا فوق سطح الشمس أجرب نارها التي هي أقوى من نار الغيرة ..

همسة:
أنا لست شعبيا ولا مقصورة
أنا لست كوزا ولا جك موية
إنما انا مواطن سوداني تهمه مصلحة وطنه ورفعة شأنه.

نادر · 10-10-2004, 09:37

هي لله

نعم هي لله أولا وأخيرا

اسيرة القلم · 10-10-2004, 14:28

كلام جمييييييييييييل جدا ..
يا سيد الكوارو ...

الجنرال (جون) · 10-10-2004, 14:45

سيد الكارو ..

احم .. احم ...
بس ما اكتر من كده ..

seed_alcarro · 10-10-2004, 20:20

نادر , أسيرة القلم والجنرال جون

أشكركم على التعقيب وتقبلوا مني خالص التحايا..

اسير التفكير · 11-10-2004, 10:13

والله يا سيد الكارو ... لكن كلامك .. صحيح في المهازل البتحصل دي ..
وعلى العموم سخريه .. في محلها ...
جميله منك يا مبدع ..........

Sit_Elkisra · 12-10-2004, 04:35

سلام ده جاكم ... ناس بيتائين كارو ديل..

اول شى... الكلام القلتو (((همسة))) ده ياخوى بالززززززززاااااااااات قولو بالكلواريك عديل كده.... بس عشان انت عارف.. ماكا؟!!!

و بعدين نادر العضو القيافة ابو ميزان ده بالجد بالجد خلعتنى.. ميزان مرة واااااحده كدى... كدى كدى..!!!

ابو سما · 18-10-2004, 15:27

اسرة واعضاء المنتدى .. رمضان كريم
واعوذ بالله من الكيزان ومن الشيطان الرجيم .... اللهم اني صائم ، اقول ربنا لا نسالك رد القضاء ولكن نسالك اللطف فيه ..
ان حكم الامويين الجدد وغسيل المخ اليومي ان السودان قد تحول الى "جمهورية موز" يحكمها اباطرة المال وشيوخ الدين اللا اسلامي .. كل شيء في السودان مباح لك اذا كنت من صحابة البشير الكرام او من سايرهم طمعا في منصب او مشروع استثماري معفى من الضرائب ..
والخلاصة ان الامويين الجديد الذين يحكمون الان قد تخلصوا من الحبر الاعظم الترابي ، عراب النظام الشهير والسبب لا يخفى على ذكاء طفل .. الكعكة لم تعد تكفي الجميع .. واضيف انه من المؤسف ان السلام الذي انتظره السودانيون كثيرا قد اضاف الى عمر الانقاذ اكثر من 6 سنوات اخرى في حكم القهر والظلم .. وربنا يكضب الشينة
ورمضان كريم تاني

seed_alcarro · 21-10-2004, 19:11

أسير التفكير
أشكرك يا زين على كلامك الزين

تحياتي لك

ست الكسرة ..
أقولو كوارييك عدييييل كدا .. لكيين قالوا لي الهمس أبلغ خاصة إذا كنت تحب الوطن فاهمس له بذلك

وكمان النيل

لكي التحية يا ت الكسرة

أبو سما
جعلت ساميا دوما ..
أولا أشكرك على رأيك وكلنا لا نحب الظلم ولكنني من أشد المعرضين لإزاحة هذه الحكومة عن طريق انقلاب عسكري فإما أن تأتي حكومة جديدة عن طريق انتخابات حرة نزيهة أو تبقى هذه الحكومة كماهي فلا خير في انقلاب جديد ..

ولك التحية ..

وليد حسين · 22-10-2004, 18:48

الاخ سيد الكارو
والله الكلام يسر القلب ويورى انه لسه فى الشعب السودانى ناس بتكتب بى اسمه الغالى علينا وبجى اليوم البنرفع اسم السودان فوق للجميع

[foq1]يا كنا نبيعك يا نسرق واخترنا النار الضلها يحرق[/b][/foq1]