يا ناس المنتدي ... اعرفوني

محمد ابوعاقلة · 17-08-2006, 22:08

خلوني امارس طقوس الذبح الحلال والتفريط خارج سربكم (احلي حاجه الطيران بالليل والناس نايمه) . قررت اني امارس المنتديات . بما انو ما من أكلاتي المفضله. تفاصيل كتيره وهواجس بتشبه ضهر صاج العواسه (الجهة الأكثر سوادا من حيث المضمون)
كنت فاكر نفسي تعيس وبتطاول عليكم. لكن انتو عباره عن استنساخ لغة في معامل الانترنت. ولادة مفردات غالبا بتكون متعسره للزول العندو مروه علي الكتابه.
ظنيت انو الشدر الواقف نيم. والحنضل تيراب. وضل الزير مجرد سكن عشوائ لصارقيل الوجعه الطلع عين البذره الناشفة ونشف ريق الكوز. ولم تقطع المويه. بحل محلها ضفر غيظ وحاجات ما مرتبه بتطلع في شكل شخير او ذبحه عنصريه ضدي وضدك. شنو الخلاك يا مويه تقيفي في العتبه وما تدقي الباب. امكن من الوسخ الفينا. وامكن فنطاظ وهياكل والنشف فينا اكبر من بلة ريق. امكن الريحه العفنه بتطرد. رجعت موية البحر القدره صفيحه. وامكن نحن نخاع لينه وبتتأسف علي الجيه.

لاقيني براك ..انا طوفي طرور وموجك دفر
لاقيني براك... انا في خطر
لاقيني براك...من غير مجاري وموج بحر
في الحته ديك

كان الطريق مجرد كلبه والده والزقاقات الجريوات ما بتمشي عديل زي كانها بتفتش عن قوت اليوم او عضم باكر. الشارع كان سكران وبترتح علي الفاضي ومنافذ مسدودة. الناس كانت واقفه والشارع بعاين فيني بعين حمرا.شاور للزقاق الضيق.

شاورني لو نفسك بضيق
شاورني لو مات الرفيق
شاورني في عز الحريق
شاورني لو طال الطريق
عشمي في آخر محطه
دين المحطات لو بقت لافته ومظله
لو بقت وقفه ومذله
وانتظار ساكت

النوراني · 19-08-2006, 12:13

مليووووووووووووون مراحب بمحمد في عشاق السودان.. أرجو وأتمنى أن تفيد وتستفيد...

جمانة · 19-08-2006, 12:22

ههههههههههههههههههه

عسسسسسسسسسسسل يا محمــــــــــد

واتفضل جوةةةةةةةةةةةةةة و البيت بيتك

وحقيقي المنتدي نووووووور

محمد ابوعاقلة · 19-08-2006, 22:20

اقتباس:

المشاركة الأصلية كتبت بواسطة النوراني

مليووووووووووووون مراحب بمحمد في عشاق السودان.. أرجو وأتمنى أن تفيد وتستفيد...

مليون اس مليون مراحب
طبعا انا ح استفيد

شايقية · 20-08-2006, 00:49

اخونا : محمد
اهلا بيك .. وحبابك الف .. ابقى داخل لي جوة سريييع .. منتظرين جديدك ..

طائر مهاجر · 20-08-2006, 14:09

مرحبتين حبابك عشرة بلا كشرة
الدار دارك مليااااااااار مرحبابك

عمران عامر · 20-08-2006, 15:10

حبابك أبو عاقلة ونحن عرفونا بأن الجواب بيبين من عنوانه وعنوانك فاحت منه ريحة الابداع فلا تجعلنا نطيل الوقوف على أرصفة الانتظار .

ومليون الملاييين من الترحيبات

محمد ابوعاقلة · 21-08-2006, 08:53

اقتباس:

المشاركة الأصلية كتبت بواسطة شايقية

اخونا : محمد
اهلا بيك .. وحبابك الف .. ابقى داخل لي جوة سريييع .. منتظرين جديدك ..

أتيت في زمن الوجل...
لو كنت تعرف كيف ترهقني الجراحات القديمة والجديدة ..
ربما أشفقت عليا من هذا العناء ..
لو كنت تعرف أنني من اوجه الغادين والآتين استرق التبسم
استعيد توازني قسرا ..
وأضمك حينما ألقاك في زمن البكاء ..!!

روعة لا تحتمل التأجيل ...
دعوني اقتات قليلا ... ومن ثم ........
ودي

محمد ابوعاقلة · 21-08-2006, 08:56

اقتباس:

المشاركة الأصلية كتبت بواسطة طائر مهاجر

مرحبتين حبابك عشرة بلا كشرة
الدار دارك مليااااااااار مرحبابك

كان تعب منك جناح
في السرعة زيد
اوعك تقيف
فوق الرصيف
وكمل الباقي كداري

تحياتي

محمد ابوعاقلة · 21-08-2006, 09:01

اقتباس:

المشاركة الأصلية كتبت بواسطة عمري انا

حبابك أبو عاقلة ونحن عرفونا بأن الجواب بيبين من عنوانه وعنوانك فاحت منه ريحة الابداع فلا تجعلنا نطيل الوقوف على أرصفة الانتظار .

ومليون الملاييين من الترحيبات

رصيف الانتظار ممل
ومحطات الوداع ضجت

الف مرحب بيك ... وامكن اكون حاجه كده
المشكله .... روحي

طويله

وسلام