زواج البت القدر قدر احسن من البت الصغيره ولا رايكم شنو

كركوج · 16-07-2006, 18:46

الاخت جمانه والناس الجم جمانه وبنات الجيران واخوانهم واولاد الجيران واخواتهم وكل محبي عشاق السودان تحيه طيبه وكيف قيلتو , وكيف كانت ليلة امبارح ,انا !! الحمد الاااااف والشكر اردب بس الا الفقد حاصل والشوق من كترتو مقسم كيمان كيمان وممدد علي ضهر الفريق راجي الشمش تقع والليل يقيف متل الوتد المشدود علي راكوبة بت حامد وبعد داك اقوم اجيكم واحكيلكم الفي خاطري بعد ما اقعد فوق (كوم البيوت التر ) واحدين قالو الكوم البيجيب التر بس انا كحلتها شويه , اها النقول ليكم الحاصل شنو والناخد رايكم ونشوف اراءكم عشان في ناس كتيرين فهمهم بالمقلوب وعشان يتصلح وينعدل لازم يسمعوكم وبعد داك يقررو .
السلام عليكم . .........عايز اعرف رايكم في موضوع الزواج حق البت والولد البيكون سنهم متل بعض هل فيهو سلبيات ؟ ولو فيهو ادوني رايكم ولو مافيهو برضو ما تقصرو وكمان الايجابيات ماتنسوها معاكم .عشان زي ما قلته ليكم انو الناس وخاصه الاولاد بيعاينو لي سن البت ودي من اول الحاجات المطلوبه ودايما بيختارو البت الصغيره بيقولو انو بعدين لامن الواحد يكبر في السن ويعجز امهم بتكون صغيره وتمسكم تربيهم . التقول هو ضامن نفسو يعيش كتير .طيب ليه البت هي زاتا ما تختار الولد الصغير وتقول بعدين لامن اعجز الاولاد يلاقو ليهم زول يصرف عليهم بدل ما يكونو عاله علي الناس . بعدين ياجماعه درجة الفهم ومساحات التفاهم بتكون ضيقه لامن الولد يتزوج بت صغيره عليهو والعكس وبرضو لامن الواحد يعرس بت في سنو بتكون هناك مشاكل لانو اي واحد فيهم عايز يثبت للتاني هو افهم في الامور لو كانت الدينيه ولا الدنيويه وكده حاره وكده حاره والاخيره فيها نقاش . .

عاشق الوطن · 17-07-2006, 11:46

الأخ / كركوج ...

تحية طيبة ...

من إيجابيات الزواج في سن متقاربة هو أن مستوى الفكر والثقافة يكون قريب لدى الزوجين .. وبالتالي يساعد على التفاهم وبالذات في تربية الأبناء ...

ولكن في كل الأحوال أفضّل أن يكون عمر الزوج أكبر من الزوجة ... ولكن ليس بفارق كبير ...

شكرا ...

جمانة · 15-08-2006, 13:01

سلمات اخونا كركوج و مشتاقييييييين كميات

آسفين علي التأخر بس عزرني اقبح من ذنبي فيهو

عشان كدة خجلانة منو شديد .....

موضوعك جميل

بس خليني ارتب اوراقي و اجيك

تحياتي

توتا · 15-08-2006, 13:11

انا في رايييي انه الأفضل أنه الرجل يكون اكبر سناً من المرأة
وبرجع اضوح لييييييييييييييك

الدهبايه · 15-08-2006, 14:28

الاخ الرائع موضوعك مهم جدا وبيمس المجتمع السودانى

لانو كان زمان موجوده ظاهرة زواج البنت الصغيره برجل

اكبر منها بى كتير(فوق العشرة سنوات) بس اليومين ديل

الحال اتغير والزمن بقى عصر السرعه يعنى الواحد ما بيستنى

البت لما تكبر وتستوعب فكرو عشان كدة احسن عرس القدر قدر

ما قدر قدر شديد لكن اقصى حاجه سته سنوات. عشان ما نبقى

فى ما فاهمانى وما قادر يفهمنى.

كركوج · 05-09-2006, 15:56

اشكركم اخوتي علي هذه الاراءالجميله بس في ناس قالو حايمشو يرتبو اوراقهم ويجو انشاء الله حصل خير وما تكون المطره وقعت صريف البيت ولا شالت الراكوبه علي العموم شئ جميل انو الناس تشارك بي مفاهيمها حتي لو كانت ما قادره تعبر بس المهم المشاركه وانا متأكد انو المفهوم بيكون وصل للجميع وليكم تحياتي .

ود المتمة · 05-09-2006, 22:12

كركوجيا ظريف .،.،.،.،
أحييك على الموضوع الراقي .،،،,,،،..
أول حاجة من الإيجابيات بالنسبة لي زواج الرجل بفتاة تصغره بفارق سني كبير إنو بيكون داير يربيها على كيفو """ تجي على طوعو يعني """
وبعدين وقت ما تكون الفتاة صغيرة في لسن بتكون بالنسبة للرجل ماسبة من نواحي عدة _ أنوثتها و...... _ .
أما بالنسبة للزواج الرجل بالبنت التي في نفس سنه فهو من الزيجات المناسبة في نظري لأنه قد يكون مبني على علاقة حب وشراكة وتفاهم ...,
ومنه مشاركة كل من الزوجين الآخر في تفكيره وطريقة ترربية أولاده ....
أما بالنسبة للفارق الزمني بين الزوجين - من وجهة نظري ما يكون فايت حدو - أن يكون ما بين 5-4 سنوات على الأكثر سواء بالنسبة للرجل أو للمرأة...
ولي عودة.،.،.،