الأخ نوراني:
مواضيعك مشتقة من اسمك.. نور بسطع .. فبجذب الناس ليهو..
أول حاجة بشكرك شدييد إنك فتحت باب النقاش في الموضوع دا .. وفعلا دا الحاصل إنو الحب موجود .. والعاطفة بتكون واصلة التشبع.. بس عدم البوح بيها دي أكبر مشكلة ...لأنو غير الجفا والبعاد ما بتعمل حاجة .. وزي ما قال أخونا (عمري أنا ) تلقى الناس أيا م الخطوبة أنسى بس ولا روميو وجولييت وبعد العرس الراجل بكون ماشي قدام مرتو بي 10 امتار وهي بتحاول تلحقو .. رغم إنو مفروض الزواج يعزز الترابط والتواصل ويعمق المحبة .. الى أن الإفتقار لي الكلمات الحنينة وكلمات الحب في البيت بتكون مشكلة .. ولي أسباب ما معروفة؟؟ وامكن أخونا ( عمري أنا) حسي أوجد سبب قال الهموم ممكن تكون سبب.. لكن دا برضو ما يمنع الزوج إنو يقول لي زوجتو كلام جميل .. وحنين .. وهي بالمثل طبعا ..
عارف لمن تشوف الجنسيات التانية تتحير تلقاهم ماشاء الله لحدي ما بقو عجايز مترابطين شديد وتلقاهم ماشين في الشارع وماسكين ايدين بعض .. بخلوك تشعر بالعشرة الطويلة البيناتم.. والريدة العمرها ما قلت ولا الهموم والمشاكل اثرت فيها ..
وإحنا شعب حنان الدنيا كلو في قلوبنا ... شعب حنين .. وحبو دايما قوي ومن الأعماق .. وصدقني لو كلو واحد مشا خطوة لي قدام وعرف كيف يعبر عن مشاعرو ..حتتغير حاحات كتيرة..
فليك كل التحية .. ولنا عودة ..