منتديات عشاق السودان - عرض مشاركة واحدة

دار جعل · 09-07-2006, 20:50

الاخت الغالية رغد

لم أجد غير أن يكون ردي ( بيان بالعمل ) احتراماً وتقديراً لشخصك

دعوني احكي ليكم حكاية عشان الموضوع ما يبقى ممل, وعشان نستفيد كلنا من مثل هذه الحكايات.

هناك اناس لديهم معتقد راسخ في مسألة الشيوخ وانهم بحلوا المربوط ( سواء حيين أو ميتين ) عندي جدي منهم ( اسال الله له الهداية ).

كانوا راكبين مركب ومعاهم نسوان وشفع, وعازين يعدوا للضفة التانية... في نص البحر المركب
( انغدت ) والموية بدت تملى المركب والجماعة خافوا خوف شديد من الغرق ( لان كثير منهم لا يعرف العوم ) قام جدي بدل ما يمسك في اسم الله ... قعد يقول ( يا بحر السد ) وهو شيخ واصل قالوا قلب الكريسيدا مارسيدس, وقلب الحمار حصان ( العهدة على الراوي ) المهم ما اطول عليكم قام رمى حجر في مكان ( الخرم ) قامت الموية وقفت... سبحان الله... طبعاً ما عاوز اشرح الباقي لانكم بتكونوا استنتجتوه براكم...

وهناك قصة واقعية أخرى حدثت لي شخصياً مع احد الدجالين في منطقة ( عشش فلاتة ) طبعاً كتيرين الان ما بكونوا بيعرفوها المهم صاحبنا لمة فيني وكان معاي جماعة واختارني انا من دونهم وكانه قرأة على وجهي آثار الحب والهيام والشاكوش الذي اعاني منه... فقال لي عندي ليك ( إرق محبة قوي ) وجعلنا نضحك وانصرفنا....

هذه اشياء قد تحدث لكل منا ( بقصد أو دون قصد ) ولكن يبقى مفهومنا لمسألة المنجمون والدجالون والتبرك بالشيوخ في مجتمعنا السوداني قضية تحتاج لكثير من النقاش.

واختلف مع من يقول أنه لا يمكن تغيير العادات السلوكية للإنسان... نحن في زمن تخصص الكثيرون في هذا المجال... وخصصت له كليات في الجامعات....

ولن نتقدم شبراً ان استوطن في مفهومنا كلمة أننا لن نستطيع... هي دعوة للعمل والاجتهاد والمثابرة... والبحث والتدقيق... والنحت فوق الحجر ان احتاج الامر لنصل إلى ما نريد..

لكي التحية والتقدير