وجاكم الاشتر تانى .....الاشتر..... وهلال مريخ !!!!!!!!!
أكتر حاجة قاعد تجيب لي وجع الإلتواء البطني والإنزلاق القضروفي المخي وتجهجه عصيبات كرعي الرقاق ديل هي كلمة (ملايين) .. من أسمعه طوالي أقعد (أنكرش وفي الواطه أنبرش) وتقوم علي الجيوب الأنفية والقميصية والبنطلونية والجلابية .. بيضاء مكوية .. وقادر الله أكان كمية القروش فاتت العشرة مليون دي بقه بتجيب لي (شلل أطفال عديل) .. عشان كدي أنا بتحاشى التجار وأصحاب العقار والوليدات الحناكيش .. ديل أبوه الصباح يديه مصاريف الجامعة (مليون جنيه) ويعتذر ليه يقول ليه ( أسف جداً يا تامر ده كل المعاي .. لو ما بتكفيك خد من مامى) .. حليلك يا أمي ويا حبوبتي .. عليك أمان الله من القروش دخلت (المفحضة) حقتهم ما طلعت تاني إلا أيام (إستبدال العملة) وبالتعب كمان .
ويومه داك الخرتوم مولعة نار .. وأنا في قمة (الرومانسية) متوهط (بنبر) حبال في سوق الناقة .. وقدامي صحن (الكمونية) وصحن بصل وصحن شطة .. يشحتفوا مصارين العدو .. وأنا مشغول بي مغازلة الصحن بكل شراهة وشغال في التلاتة صحانة ديل (زي بتاع البنقز) .. أهان أسمع ليك الجماعة يتناقروا بأعلي صوتهم في كورة الليلة دي بين (المريخ والهلال) ويتكلموا عن اللاعبين .. أهان عبدالله سيد الموية (الصاقطة) قال .. نحنا خلاس سجلنا (عوض المشعف) بي مية مليون جنيه تاني ما بتغلبونا يا (رشاشات) (وراء مؤمن).. وكمان (عادل السمبرية) شفى من الإصابة وراجع لي أقوانه في راكوبتكم الإسمو (على حيطة الغنم ) قال مسجلنو بي خمسين مليون .. والله ده ما ينفع (تضحوا بيهو) خلي توقفوه (قون) .. وكمان مدافعكم الكان عازم الفريق (طهور أولادو داك) .. ده مدافع ولا (صول بوليس) .. أها قام (حسن بتاع الكارو) نط محتج وقالو .. نسيتو التوالي يا صهاينة .. بتمشوا وين الليلة من (علي أب سردبه) و (هيثم الطنباري) و (عيسى أب تلاليش) .. نحن إشترينا (عصام مرفعين) و (شداد مراكيبو) مخصوص لي يوم الليلة ده وخلي حارسكم (موسى ضنب فار) ده أكان ينفعكم .. بالله في ضنب فار يشتروا بي خمسة وسبعين مليون ليه مطلي دهب ؟ .. أهان قامت (مرضية) ست الشاي .. لعلعت بي صوته في نص الرجال وقالت .. نحن نادينا خسر تلتمية مليون عشان يشتري اللاعبين ديل ومشوا عسكروا (في شلعوها الخوالدة) .. كلمني ود عمي (أدم أب ضفرين) باقي بلعب معاهم وحالفين يغلبوا بس الله يكفينا شر (البنبان) باقي يا الرشاشات ياها عادتكم من (بخيت سرج العجلة) يجيب فيكم القون تقعدوا تفلقوا بي قشر القصب وأكياس (التنباك) .. أها حالفة وأعدم (كانوني وعدتي دي) أكان فزنا الليلة بكرة الشاي (مجاني).. قام هارون (بتاع الصعوط) قال ليها .. هو عليك الله إنتو عندكم كورة .. (ماحلفتي إلا وأنتي عارفة إنكم ما بتغلبونا) .. أنا خايف من أول قون نجيبو فيكم (تشيلو الكورة وتشتتوا بيها) وبعدين إنتو ما عندكم مدرب زي المدربين سمع أضاني في (التلفزيون) اليوم داك قال ح يلعب بي خطة للمدافعين (زحي مني) وللمهاجمين (طقها وألحقه) .. ماشفتي مدربنا القدير خطتو شنو قال اللعب (تومان تومان) . والكور في التماينات مباشرة .
وأنا في الوكت داك سامع الكلام كلو بعدم فهم كدي .. علا أنا مستغرب في تلاتة حاجات .. أول بالتبادي (مرضية ست الشاي) بتفهم في الكورة أحسن مني !!.. تاني هام في القروش الكتيرة البدفعوها في (الناس المخلقنين ديل) أسامي بالله زي (أسامي الاسبيرات) .. تالت شئ (الخوالدة دي مشلعنه ليه ؟ والشلعه منو؟) .. قلت في خاتري معقول أكون مسطح كدي والناس كلها تفور وتنجلق بي المريخ والهلال .. الليلة أكان أمش الميدان الليلم وأشوف (الملايين) البتلعب في الكورة دي .. ومن أمست مشيت على الميدان وقطعت (تظكرة) غالية بالحيل .. عليك أمان الله تجيب لي (طلبين) (أم فتفت) وتلاتة طلبات (كمونية) علا الله غالب .. لزوم الثقافة الكروية الدخلتني فيها (مرضية) شكيتها علي صاحب التكية .. ومن دخلت أتاري الميدان هو حوشاً كبير متل (حوش البهم) مزروع سعده من أولو لاعن أخرو ومنورنو متل الإستديو ليل (الصور) مسمنو (الاستاذ) (خسارة الإسم) .. وبالله خلق الله دي كلها محشكنة في الحوش ده ملصقه مع بعض أنا قلت تب ( القيامة قامت) .. ناس تدفر .. وناس تصفر .. وجو اللاعبين داخلين بالله يطيروا رحمن القلب .. شكلهم زي (المرتزقة) .. مخلوعين كدي .. وصارين وشوشم .. التقول داخلين حرب . الكرعين (زي القنا) وأشكال عينة تستاهل الفرجة لكن ماهو ده محلها ...وبقوا واقفين وشوف عيني واحد من الزرق قال لي واحد من الحمر (أصبر) بي أيدو كدي .. وبتاع الحمر أشر ليهو علي (كدارتو) وقال ليهو دي الليله بدخله ليك في خشمك) ..
أهان قامت الكورة بدت .. وأنا ممني نفسي بي كورة جميلة بي حجم المليارات المدفوعة .. وبي حجم حق (تظكرتي) كمان .. وعينك ما تشوف إلا النور بدت (العيتنوبة) والمصارعة الحرة .. محل ما مشت الكورة الـ (22) لاعب والحكم وراها بالله ساكينها زي (حرامي الحلة) يلمو فيها يطقوها وتاني يسكوها كلهم والحكم بالله زي (زير المدرسة) كرشو متل (الدروة حقت ضرب نار) مفنجط بي وراهم وماسك في (سروالو ما يقع منو) . بعد شوية تلقى (تلاتة لاعبين) واقعين في الواطة معوقين.. خسائر .. يقوموا .. يقعوا إتنين تانين .. مرات تشوف رميات التماس وكترته تقول دي (كورة يد) مرات تشوف الضرب والخبط تقول دي (رجبي .. كرة القدم الأمريكية ديك) .. لا باصات لا أقوان لا خطط ولا أخلاق ولا خلقه ..والجمهور عليك أمان الله كواريكو تسوي (إنتفاضة) .. غايتو ما بتشبه الكورة البشوفها في (التلفزيون) نهائي والغريبة الناس تدفع وتشجع .. واحد جنبي (حرق عمتو) لامن جابو قون بالصدفة ويكورك لي (عوض المكجول) عشان جاب القون .. قلت في خاتري .. (العمه) دي مو كرب أصلي لو كانت كرب أصلي ما كان حرقه ..
طلعت من الحوش وأنا محروق بي المغسة ولي (الملايين) وعقول الناس الطايرة .. وإتأكدت إنو الشعب السوداني شعب طيب وغلبان وساهل جداً خداعو وغشو ... وزي ما بقولوا :
رزق الهبل على المجانين !!!!!
| التوقيع |
|
......زمن الوجع.... |
|