|
مهرجان الجمال
قصيده
نوال إنصاف بدور وعفاف مع حد الزين ورقش لصاف
في ليلة زانها قمر شوّاف اتواعدو بي ربط الأطراف
يعملو حفلة في قلب رجّاف كان لى فنّان بالحيل خوّاف
من نظرة ود وكلام شفّاف يتلاشى يذوب رقه والطاف
ويتوه في بحور لولي وأصداف
***********
كانن سمحات بالحيل وظراف ألوان ما طيف لا بل أطياف
أصفر جمري وأسمر خمري وأحمر تمري وأبيض كشّاف
وعيون تهتك للظن ينشاف وجسوم حاكت أرواحها رهاف
ولهيجات تتحاشى الرشّاف
************
كل واحده الديس فات الأكتاف فاحم لاحم ناعم هفهاف
من لفته يجيك الطيب عسّاف يحتار في تمييزه الكرّاف
يارب خمره يارب لاقراف يارب دي سواغ لونوار دوسواف
يارب ( أمواج ) غالي الأصناف لا أكيد ( بويزون ) مع بوخة شاف
**************
قالت بدهاء حدّو لإنصاف بنصل حدو ما قال عرّاف
ماقا ل غناي شاعر وصّاف في الحجر الصلد يجر القاف
وملصن لى تيابن دون الحاف ما مافي رقيب او زول شنّاف
قامن غنن بى صوت شنّاف سحرالشادي وبكى العزّاف
ورقصن رقصة غربال نسّاف ولامست الأكتاف الأرداف
والكون اهتز مع الأعطاف وصديقنا الحالته بقت تنخاف
محتار ماسك قلبه النزّاف نده الفقرا وكل الأشراف
ما خلى كمان ناس الأوقاف قعد يتحوى بسورة الأعراف
ويقول ألطف بي يا لطّاف ده جمال فايت حد الإسراف
عايزين نجده عايزين اسعاف التلفزيون لا الفونوغراف
يهذي يهضرب بكلام خطراف وين ناس محجوب بالناقره خفاف
وين ناس موسى وود النداف وصحى على صرخة مجنون كرناف
لقى نفسه وسط عرقه الهتاف يرجف رجفة محموم في لحاف
بسمل حوقل قرا سورة قاف ولامن روّق قال في استخفاف
يجي منك يا قلبي الخواف
|