معلومات العضو

عمران عامر عضو فضي

إحصائية الترشيح

عدد النقاط : 136

 

 

الموضوع غاية من الأهمية فهؤلاء الناس وليس جلهم فهم قلة يظنون كامل الظن بأنه سيعيشون في بلاد الخليج أبدا متناسين بأن لديهم أبناء سيحلون مكانهم عاجلا أو آجلا وكلمة شكر لن يجدوها منهم وإنما يطردون شر طرده ، هي سلبيات الغربة التي لا تحصى ولا تعد ولكن الذنب هو ذنب الكبار لانهم لم يدعوه حتى يكمل اجازته وإنما الأم بدأت تتذمر من السودان لانها تعودت على الراحات هنا الواحدة فيهن تنام لحد ما بعد الظهر وحتى في الصباح عندما يهب زوجها المصون عشان يمشي العمل والذي من وراءه ترفل في هذا النعيم تستكثر أن تقوم لتعمل له وجبة الإفطار أو شاي الصباح وإنما تلاقيها تغط في نوم كالغول ويا حليل محمد جبارة وهو يصدح " قائمة الصباح متكفلتي شايله الحليلة على المراحل " بالله عليك هل يستقيم هذا التشبيه وهذه الغربة .

عشان كده ما تستغرب لما الولد يقول ليك بهذا الصورة فاذا كان الكبار لا يرضون بالسودان فما بال الصغار لكن ما كلهم طبعا أنا عندي أولاد أختى معي هنا بالرياض جاووا من السودان ولم يكملوا شهرهم الاول الا وطلبوا من والدهم أن يرجعهم مرة أخرى للسودان والى الان يصرون بان يعودوا للسودان ونهائي كمان قالو ليه بالحرف الواحد المره دي كان نزلنا تنزل معانا نهائي ما عاوزين لا سعودية ولا غربة .

يبقى الأمر على الوالدين فهم من يزرع فيهم حب البلد والوطن ولكن هيهات لمن رضي عيشة الرغد هذه والدعة وللاسف هنا حتى ما في راحة فالرجل يكد كما الثور في الساقية من أجل حفنة ريالات أكثر من 12 ساعة عمل خارج البيت يجئ حيله مهدود يلقى الولية مستناية عشان يمشوا السوق ويتفشخروا والاولاد عاوزين يلبسوا كيف كيف واللهجة عليك أمان الله اللهجة دي خليها ساكت لا لامه كده ولا كده يعني كلام الطير في الباقير .

ففي ظل هذه الأشياء كيف عاوز ولد زي ده يقول ليك بأن السودان حلو يا اخي ما كثيرة منهم الى الان محتفظين بالجواز السوداني وده لانه غصبا عنهم أنظر الان لمن يقدم للجنسية اذا كنت بالسعودية عشان تشوف المهازل يعني من كبارهم خربانة أنا بعرف دكاتره والله مقدمين للجنسية دي في حين أنه لو نزل السودان واستثمر فلوسه كان العائد بيكون ضعف ويعيش نفس العيشة الهنا دي في السودان ولكن تقول شنو لميتة الضمير من الوطنية .

لا تستغرب أخي من تصرف هذا الصغير " فاذا كان رب البيت للدف ضارب " فما تنتظر من الاسرة سوى الرقص والمجون والخلاعة ، انت خليه الشافع ... الكبير ذاته حا يقدم لبلده شنو ؟ والله زي ما قلت ياربي الناس ديل لو خرجّوا ليهم نهائي بعملوا شنو ؟ حا يقعدوا يتسولوا هنا لحد الواحد حقوقه ما تنتهي ده اذا اصلا استلمها . أخى للاسف معظم القرارات هنا تنبع من النسوان أنا ما عارف ليه مع أنه الواحد فيهم لو نزل السودان يمكن يتزوج أكثر من واحدة بس هنا التشبث بالزوجة غريب جدا وهي تصبح راجل البيت .

تعرف كل الشعب السوداني على مختلف سنحاته ما عنده وطنية يعني حتى ناس الداخل أنفسهم ما عندهم وطنية أخي شجرابي قبل ما أجي الغربة دي كنت شغال بالسودان في مؤسسة ليها وضعها وأقسم بالله صادق الوطنية وحب السودان لم أشهده إلا عند الاسلاميين ولاني كنت معهم فأنا بعرف مدي حبهم لوطنهم ، نعم لكل قاعدة شواذ وقد تجد منهم شخص خلاف ذلك ولكن الغالبية العظمي بتعشق السودان عشق جنوني .

اما ما ذكرت من هؤلاء " كحادثة " فهم أصلا لا يهمهم أن يحرق أو يغرق السودان ففي عيونهم رمد فيكيف يستطيعون أن يروا ضوء الشمس فلا تأسى عليهم فهم لا خير يرجى منهم أو من ولادتهم .

ولي عودة باذن الله اذا قدّرلي