معلومات العضو

عمران عامر عضو فضي

إحصائية الترشيح

عدد النقاط : 136

 

 

أولا نهنئ أنفسنا بالطلة من جديد لاننا اشتقنا لريحة الدخان وهي تخرج من طاقة التكل لتعلن عن بدء العواسة وحتى نعلم بأنه مجرد لحظات ويأتينا طبق الكسرة خارج يتلوي من أثر الكوجين عليه .

قلنا نلقى لينا ثغرة في موضوعك الرائع ده عشان نلج من خلالها لكن لقيناك مقفله كل القدود بالعجين غايتو انتظرنا لحد ما نشف العجين وتشقق ومررنا من خلاله ، اتاري انا زمان بقول طلاب الجامعات ديل وخريجنها من الجنسين لسه فيهم باقي طفولة لم تكتمل بعد .

تعرفي يا غاليتنا نحن في السودان أو في السلم التعليمي بالذات لسه بنتبع نظام متأخر نوعا ما وكل مادة تلقيها متفرعة لعدة أبواب وكل كتاب من هذه الأبواب يحتوي على أكثر من أربعين صفحة لما تشوفي الولد أو البنت شايل الشنطة تحني عليه وتشفقي عليه من أن تسبب له حاجة من ثقلها . بالتالي تحصيله بيكون في خلل عاوز يقرأ أكبر كمية من المعلومات حتى يمر في الاختبار المرحلي وما تنسي في نفس الوقت صغر سنه بالتالي القدرة على الاستيعاب بتكون نوعا ما صعبة لديه بالتالي بعتمد على القراءة لاطول فترات ممكنة حتى يستطيع أن يعمل ليه مخزون كافي من المعلومات تساعده في الدراسة ، زماااااااااااااااااااان الواحد لما يدخل أولي ابتدائي يكون ليه وزن " حجم " سواء البنت أو الولد يعني الاثنين لما يكلموا مرحلة الابتدائي يكونوا جاهزين نوعا ما للعرس يخشوا العام يطلق عليهم لفظ " عتاولة " يعني نشيد العلم ده تسمعه على امتداد الفسحة ما بين المدرسة والحلة وتهتز له جنبات المكان لكن الان زي ما قلت والله هم لو في الجامعة وقالوه ما تسعمي ليهم صوت أو تحسي ليهم ركزا وده لاختلاف الناس والزمان .

من ناحية التحصيل فهم كما ذكرتي قراييييين قراية شديدة لكن طبعا الواحد فيهم بعد ما يخلي المرحلة الهو فيها تقولي ليه لخص لي السنة دي يقوم ينظر ليك ببله وكأنك سألتيه عن أحوال ناس المريخ ما يقدر يكتب ليك صفحة واحدة ودي طبعا الطآمه الكبرى لاننا بنكون مخرجين لينا حفظة ساااااااااااااااااااكت والفهم في خبر كان . يعني خريج الابتدائي ايام زمان يعتمد عليه في اشياء كثيرة ولكن الان وفي هذا الزمن وهذا الجيل خريج الجامعة لا يعتمد عليه لانه بيكون لسه صغير السن لم يحصل مرحلة الادراك الفعلي للامور .

زي ما قلت ليك السلم التعليمي ليه أثر هنا في السعودية مثلا نفسي الشئ تلاقي كمية من المقررات لكن الطالب يخرج خاوي الوفاض لان سلم التعليم هنا تعبان وموجه ولكن نحن برغم كثرة موادنا لكن دارسنا بيكون ليه وزن ثقافي نوعا ما احسن من غيره، فعلا اصبح الطلبة نوعين عشان كده في الجامعة ذاتها تلاقي هذا التذبذب في العلاقة ما بين الولد والبنت داخل اسوار الجامعة ولانهم صغار نضجوا قبل أوانهم بيكونوا غير مسؤولين حتى فيما يسمى بالحب وتحسي فيهم عدم المسؤولية الان عمر الولد أو البنت البيكون داخل الجامعة زمان يكون لسه يا دوب في مرحلة العام يعني طالب زمان لما يتخرج من الجامعة بيتخرج ولو أدوه رئاسة الجمهورية يقدر يديرها ولكن الأن والله الواحد فيهم لو أدوه كشك بتاع ليمون يغلبه يديره والقول ده ما بينطبق على الكل فلكل قاعدة شواذ .

طيب نعرج بيك على حاجة ثانية وهي المعلمين أو المعلمات أنفسهم زمان معظم المعلمين قرأوا معهد بخت الرضا وكان في قمت وهجه كان كما الشهادات العليا الان "فوق الجامعية " وكمان كان في البعض الذي لم يدخل هذا المعهد ولكنه كان بمستوى رائع المهم في الأمر أنهم كانوا بيقوموا بعملية التدريس بكل أمانة وبكل تفاني يعني لما يقولوا ليك ديك معلمة أو معلم خلاص الكلام كمل وهم يقولوا ليك نحن بنعلمك عشان بكره تتخرج وتبقى أحسن منا ولكن الان عملية التدريس شبه سطحية في معظم الحالات أتخذت كوسيلة معيشة فقط " دخل " وما دليل التدريس الخاص والمسائي الا أكبر دليل على كلامي يعني زمان كان الحصص المسائية تتم في المدرسة وللجميع وبدون مقابل ولكن الان الحصص في البيوت ولمن يدفع اما في الشأن العام بيكون التدريس فقط من أجل حفنة الجنيهات هذه وتلاقي الاستاذ يتذمر من الوضع ولا يهمه أن يفهم هذا الطالب أو لا وأن كان هو في قرارة نفسه بيتمني أن لا يفهم حتى يكون في حاجة اسمها دروس خاصة ويكون هنالك دخل أكبر وده كله نتاجه بيحصله الطالب أو الطالبة .
عشان كده لما تلاقي الواحد بعد التخرج همه أصبح مادي أكثر من أن يعمل بما علم فلا تستغربي فمن شب على شئ شاب عليه وانظري لكل مؤسسة أو أي حاجة تحمل لفظ خاصة ما عملت الا لكي تدر دخل أكبر وليس الهدف منها توصيل خدمة ممتازة .

المشكلة التي تأتي بعد أن يتم هؤلاء الدارسين مراحلهم التعليمية ويتخرجوا هل سيكونون قادرين على أن يباشروا ما تعلموا في الحياة بموضوعية ومسئولية ؟ أم أنهم يحتاجون ايضا لسنوات مماثلة لسنوات التعليم حتى ينضجوا ؟ وهل يمكن الاعتماد عليهم في ادارة شئون الحياة ؟ ام يظلوا لسه تحت عون الأهل ؟ وهل الواحد فيهم اذا عمل هل معني كده أنه خلاص أصبح يعتمد عليه لانه عرف يدخل فلوس أم ماذا؟ وهل حياتهم الخاصة يستطيعون ادارتها ومواجهة عواصف الحياة التي لا تقف على حال أم سيستسلمون عند اول طارقة ؟ والكلام ده طبعا للبنات والاولاد على حد السواء فالمسؤولية اصبحت شراكة بين الاثنين في ظل الاوضاع الحالية .

والله من وراء القصد