|
بتكون قاعد كده زيك زينا..... ولا بتجيب المواضيع حقت النقاش دي من وين لأنه كل واحد أحلى من التاني...
.فكرة الحب عموما أكيد جميلة ...العلاقات في الجامعة واحدة من مشاكلها انها مبنية على الاستعجال ... واالمظاهر ... فا الطالب أو الطالبة في السنة الاولى بكون اعتمادهم على الشكل والبت السمحة والبت الكسارة وديك وجيهة وغيرو فتبدا العلاقة من دون تعميق المعرفة حتى تتضح الفروقات الكبيرة في في الطباع والتفكير وحاجات تانية كتيرة دي حاجة ... الفترة التي تبدا فيها العلاقة هي بداية الفترة التي يتعرف فيها الطالب على بيئته ا.. والتحول من نظام الثانويات الى الحياة الجامعية والاختلافات الكبيرة في كل شيء من حيث الطباع ... الثقافات وأكيد وجود الجنس الاخر.. والواحد اول ما يكون برلوم بكون عايز يصاحب الكل..نازل بتقلو.... وبكون غالبا فاقد لاولويات التفريق بين ..الزمالة.. والصداقة ..... والحب فأي نظرة أي كلمة من أي زميلة ما بتفسر با الصورة المطلوبة ويقوم يفسرها على هواه
الحب في االجامعات زيو زي أي حب في العالم ممكن يكون فاشل لو كان مبني على التسرع والاختيار القائم على السطحيات ... عشان كده العلاقات البتكون بين طلبة كبار (سناير يعني ) بتستمر بصورة اكبر لانهم عرفوا الجامعة وكل واحد كان عندو فرصة ان يعرف الآخر بصورة اكبر(شاف أكتر) ..في نفس الوقت ما ننسى انوفي علاقات بتكون مبنية على الحب الصادق لكن الظروف بتمنع الاستمرارية ... مثلا..العلاقة ممكن تكون لطالبين من نفس السنة وطبعا تجي البت بعد التخرج وتقول انها ما بتستنى...
شخصيا في جامعتنا في كثير من العلاقات انتهت النهاية الطبيعية لأي علاقة حب وباركنا ليهم في العرس ( كتار والله) وفي ناس تانيين بتشوفهم نازلين طالعين وانت المابتعرفهم ببتحس انو ما جايين على بعض لاختلافات كتيرة بس اللهم البت سمحة وهو وجيه (شكل بس طبعا) مثل هذه الفئة نادرا ما تنتهي نهاية جميلة ...
الحب في الجامعات احيانا كثير أحس انه مظلوم واتعاطف معه لا لشيء .. بل لان كثيرا من الحماقات ترتكب باسمه... فلو قمنا بتصفية تلك العلاقات من غربال صدقوني سيبقى منها...
القليل...والكثير منها بعيد كل البعد عن مسمى الحب
أحييك مرة أخرى وأشكرك على اتاحة الفرصة ....
|