|
رد: من شعر الشايقيه
ميسره
الزمن مهما كان عنيد شكل افعالو وصورا
برضو ننسى سواتو ونقول حكمه والله مقد
عاش نعيم بين والد عطوف وبين حنان والده مبطره
الزمن غير كلو شى الا والدتو ماغيرا
لف دار دولاب ازمن والقدر يتم ميسره
مات ابوه الكان حنين وليها كان الضل والضرا
خلا لى شابه اترملت زهره يادابه منوره
خلا لى ام ورثة الهم النحيب ودموع ممطره
دابه فى ريعان الشباب حلوه مريوده واثره
وذاد فى نظر الناس سماح وفى عيون الناس كبرا
صارت نموذج يفتخر وللخلوق صبحت مفخره
كانت بتحلم بى وليده يبقى كبتن طائره
ولا يصبح باش مهندس ولا يتخرج دكتره
الشويفع اصبح كبير فاتا يادوب العاشره
وفجأه يوم الحله جاطط وقالو انو سعيد دايره
كان سعيد راجل مهذب وبرضو كان حالتو ميسره
قام طلب ايد ام الولد نيتو صافيه لبن طاهره
دار يكون لها راجل امين ويبقى والد لى ميسره
ختت الشافع امامها ومغريات الكونبى ورا
حست انو امام امتحان قاسى بين اتنين خيرا
رفضت الفكره وبى ادب رسلتلو جواب معذره
ورتو انها داب الولد وفى الزواج ماها مفكره
قام سعيد نادا الشويفع رغبوا وقاليهو اقرا
جيب لى قليب امك حنين وكل طلباتك امره
كان طلبت الشى المستحيل يبقى ممكن عشان خاطرا
قام فرح ميسره واندفع لى ديارو فرحان جرا
فتحت امو احضانه راجيا عشان تضمو يطيب خاطرا
وبين ضلو امو الحزينه غزا سكين لى اخرا
وانتزع قلب امو عجلان زود السرعه وكترا
وبى كتر سرعتو قام وقع لاعرف حاجه ولادرا
غير سمع قلب امو ينضم بيه كم انات عاصره
بى كلام اشبه بالبكا وفى الحلق ساده عبره
ياوليدى لعل مانضرب ياحبيبى انشالله طيب وبى وقعتك متاثره
حس انو عمل جريمه ومستحيل يلقى المغفره
سل سكينو عايز يموت وبين ضلوعو يوكرا
عايز يموت لو يرضى الضمير او يكون للزيو عبره
ولا تانى قليبو نادا رجع السكين لاورا
لاتقتل امك مرتين ياوليدى كفايه مره
|