مـنــو ؟؟ القــال ليــك؟؟ - قصيـدتي الجـديدة -
منـو القال ليك إنـو الشعب
لمن واجه العدوان
أكـان قـاصـد يـدافع عن حكم
سموهو يوم جابوهو بـالإنقــاذ ؟
منـو الغـشاك يـوم قـال ليـك
إنـو نصرنا كان يوم داك
بفضـل جنودك الأفذاذ؟
منـو الصـور لك الأحـداث
في أم درمـان
مع الأيـام
بتحسب ليك عـز و إنجــاز؟
يخـلي النـاس تصـوت ليك ..
تعيدك لي للقصر سلطان
تبايعك وتبقى إت الساس وإت الراس والربان
منو القال ليك إنـو الشعب من يوم داك
بيحلف بيك ..ويحلم بيك .. يهاتي بيك
يأمل فيك .. تعيدلو كرامة الإنسان ؟
منـو الأصلاً بهنـدس ليك ..يحلل ليك
في كل لحظة بيخدع فيك
وإنت غشيم بتسمع ليهو ..تخضع ليهو
ذي ما تكـون مخـدر تب
وذي شايلك حمار النـوم ومـا دريان
ولاك عارف في كم مليون
صيامن ديمه .. ما شرطاً يهل رمضان
لكين الفقر غلاب .. يخلي الكل شقي وجيعان
وما بيقدر يقرب تب .. من سوقاً صبح ذي غول .. نهم سعران
هو كيف يقدر يواجه الغـول بعد ما صار ضعيف نحلان
تشوفو تقول شبح زولاً صبح كملان
وكيف يا زول .. تصدق زول .. يقول لك قول
ويعيد القول
في ناس عشقت رجال الثورة .. ريحة الثورة .. إسم الثورة
رسم الثورة .. حكم الثورة .. جيش الثورة
ديمه كمان .. تحب الثورة .. تفدي الثورة بالأرواح
ودمـاً جــاري في الشريــان
هي يـا مغشوش .. ويا مخـدوع .. ويا مربوش
يمين بالله بحلف ليك حليفة حق
واكرر أغلظ الأيمان
الحـا يكـون وكـل الكــان
حصل .. شان ما بنرضى للسودان
في يوم يتذل او يتهان
وما فيش اصلو فـد إنسان
بيبذل روحو دون عنوان
وما بننزف
عشان خاطرك قطيرة دم
وإنت ونحنا ما بنتلم
وما حارنو فيك عشم
واصلاً ما بنقولا نعـم
وأنا واخواني ديمة
عليك وليد العم
وكان جاء دخيل
بندحرو ليك
ونطردو ليك
ما شان إنت تتنعم
لكين بس ..
نحنا في التاريخ فدى السودان
الخـرطـوم
الجمعة 27 / 6 /2008م
| التوقيع |
|
|
|